Sərhəddəki erməni təxribatı zamanı Ermənistanın siyasi elitasında maraqlı anlar yaşanıb. Bəlli olub ki, Ermənistan parlamentinin iclası sərhəddə vəziyyətin gərginləşməsi ilə əlaqədar yarımçıq qalıb.
Vitse-spiker Akop Arşakyan bununla bağlı bəyanat verib.
Məlumatda bildirilir ki, gündəlikdəki məsələlər, o cümlədən Ombudsman namizədliyi üzrə seçkilərin nəticələrinin açıqlanması təxirə salınıb.
Bununla yanaşı Ermənistanın müdafiə naziri Suren Papikyan işgüzar səfərini yarımçıq kəsib və İrəvana qayıdıb.
Ermənistanın bu addımlarını onların özlərinin hazırladığı Zəngəzur təxribatından diqqət yayındırmaq jestləri kimi qəbul etmək olarmı?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə bildirdi ki, Vətən müharibəsindəki şanlı qələbədən sonra Azərbaycanın yenə də humanist addımlar atmaqla Ermənistanı sülhə dəvət edərək, ona düşdüyü acınacaqlı durumdan qurtuluş yolunu göstərməsinə baxmayaraq, revanşist qüvvələr həmin ölkəni haqq yolundan yayındırmağa cəhdlər edir, məkirli niyyətlərini reallaşdırmaq məqsədilə təxribatlar törədirlər:
“Azərbaycan post-münaqişə dövründə bir-iki dəfə Ermənistanı cəzalandırıb. Bunlar hamısı Ermənistan üçün xəbərdarlıqdır. Ermənistan normal şəkildə münasibətləri nizamlamağa çalışmaq istəmədikcə, belə zərbələr alacaq. Ermənistan hesab edir ki, Rusiyanın regionda təsir imkanları zəifləyib və bunun nəticəsində Qərb qüvvələri bölgədə yerləşə bilər. Biz bunu Fransanın timsalında görürük. Fransa çox ciddi-cəhdlə Ermənistanın maraqlarının müdafiəçisi qismində çıxış edir və qərəzli addımlar atır. Bütün atılan addımların isə məqsədi odur ki, Azərbaycan və Ermənistan arasında danışıqlar pozulsun. Azərbaycan isə prosesi pozmağa yönəlmiş bütün destruktiv hərəkətlərə sülh prosesini sürətləndirəcək addımlarla cavab verir. Elə rəsmi Bakının Qarabağın erməni icmasına növbəti görüş təklifi də bunun tərkib hissəsidir.
Prezident İlham Əliyev tərəfindən dəfələrlə bəyan edilmişdi ki, Ermənistan sülh müqaviləsini imzalmaqdan yayınmaq üçün növbəti hərbi təxribatlar törətməyə çalışır. Bu gün Ermənistan üçün ən məqbul variant təxribatlardan əl çəkərək Azərbaycan tərəfinin təqdim etdiyi ədalətli sülh sazişinin imzalamaqdır. Məhz bu halda o da digər dövlətlər kimi yeni inkişaf perspektivi qazana və yaxınlaşan hərbi-siyasi iflasdan qurtula bilər. Bu təcavüzkar ölkə bir zamanlar Rusiyaya, onun ordusuna arxayın olub Azərbaycana qarşı müxtəlif təxribatlar həyata keçirirdi. İndi isə Paşinyan bölgəyə dəvət etdiyi Avropa İttifaqının missiyasına arxayındır. Hesab edir ki, indi də onların arxasında gizlənib bu kimi təxribatlarla nələrəsə nail olacaq. Bunu onların əsassız bəyanatları, guya gərginliyi Azərbaycanın yaratması ilə bağlı ittihamları da göstərir. Buna görə də, təxribatlarını pərdələmək üçün parlamentin iclasını təxirə salırlar, rəsmilər səfərlərini yarlmçıq qoyub, geri dönür”.
Azərbaycan xarici işlər naziri Ceyhun Bayramov Bakıda ATƏT-in fəaliyyətdə olan sədri, Şimali Makedoniyanın xarici işlər naziri Buyar Osmani ilə birgə keçirdiyi mətbuat konfransında bildirib ki, ötən ilin dekabr ayından etibarən Ermənistanın destruktiv mövqeyi nəticəsində birbaşa təmaslar dayandırılıb: “Beynəlxalq vasitəçilər Ermənistanı danışıqlar masasına qaytarmağa çalışır. Bu istiqamətdə ardıcıl addımlar atılır. Biz Ermənistan tərəfinə danışıqlar masasına qayıtmaq üçün çağırış etmişik”.
C.Bayramov vurğulayıb ki, Ermənistanın destruktiv yanaşması təkcə danışıqlar prosesinə təsir etmir: “Biz yeni hərbi təxribatların da şahidi oluruq. Belə təxribatlardan sonuncusu dünən (11 aprel-red.) baş verib”.
Məhəmmədəli QƏRİBLİ
