Xaricdə yaşayan azərbaycanlılar vəzifəsindən, tutduğu mövqedən, kimliyindən asılı olmayaraq daim Azərbaycan dövlətinin maraqlarından çıxış etməlidir. Təbii ki, dünya azərbaycanlılarının bir evi var - müstəqil Azərbaycan dövləti.
Azərbaycan 44 günlük Vətən müharibəsində qazandığı qələbədən sonra xaricdə yaşayan azərbaycanlılar çox böyük qürur hissi keçirir, qalib xalqın övladı kimi başı dik gəzirlər. Təbii, xaricdəki erməni lobbisi Azərbaycanın qələbəsini həzm edə bilmir, qələbəmizi qaralamaq üçün hər cür vasitəyə əl atırlar. Xaricdəki erməni diasporu, lobbisi bütün vasitələrdən istifadə edir ki, Azərbaycan və Ermənistan arasında sülh müqaviləsi imzalanmasın. Ermənilər yenə də Qarabağla bağlı dünyaya yalanlar danışmaq istəyirlər, hətta olmayan “Arsax”la bağlı müxtəlif ölkələrin parlamentlərində qondarma qətnamələr də qəbul etdirməkdə israrlıdırlar, bəzən buna nail olmağa yaxın da olurlar.
Bu kimi neqativ hallara qarşı mübarizədə xaricdəki Azərbaycan diasporu, “Azərbaycan ev(lər)i” vahid cəbhədən çıxış edə bilirmi?
“Biz öz işimizi yüksək səviyyədə qurmalıyıq”
AVCİYA-nın vitse-prezidenti, siyasi şərhçi, professor Məhərrəm Zülfüqarlı hesab edir ki, bu gün xaricdəki Azərbaycan diasporunun üzərinə böyük yük düşür. O, qeyd etdi ki, xaricdəki erməni lobbisinin pozucu əməllərinin ifşa edilməsi üçün soydaşlarımız vahid mübarizə aparmalıdır. “Çox aktual mövzuya toxunmusunuz. Bildiyimiz kimi daim azərbaycanlı erməni münasibətləri haqda danışarkən çoxları erməni diasporunun güclü olduğuna, ABŞ-da, Avropada, başqa yerlərdə onların təsiri ilə işlər getdiyinə bizi inandırmağa çalışırlar. Xaricdəki Azərbaycan diasporu da, müxtəlif ölkələrdə mövcud olan “Azərbaycan evləri” də bunu əsas gətirib öz işlərinə haqq qazandırmağa çalışıblar. Amma mən tamailə əksini düşünürəm. Həm Almaniyada, həm də Qərbi Avropanın bir sıra yerlərində diasporla görüşlərim olub, Almaniyanın şəhərlərində Xocalı soyqırımı ilə bağlı keçirlən tədbirlərdə iştirak etmişəm, məruzlər oxumuşam. Türkiyə və Azərbaycan disporlarının birgə təşkil etdiyi tədbirlərdə iştirakım olub.
Ermənilərin təşkilatlanması, burada erməni kilsəsinin onları idarə etməsi barədə çox danışılıb. Amma bizim təşkilatlanmağımız, görəcəyimiz işlər onlarla müqayisə olunmaqla həyata keçirilə bilməz. Biz öz işimizi yüksək səviyyədə qurmalıyıq, fəaliyyətimizi gücləndirməliyik. Hardasa zəif olmağımızı erməni diasporunun güclü olması ilə pərdələyimiz fikrimcə, doğru deyil”.
“Diasporumuzun üzərinə böyük missiya düşür ki, erməni təxribatlarının qarşısını yerində və vaxtında alsın”
M.Zülfüqarlının sözlərinə görə, bu sahədə olan zəifliyimizi, fəaliyyətsizliyimizi qaydasına salmalıyıq. “İndiki dövrdə dünya erməniləri tutaq ki, Qarabağ ermənilərinin Azərbaycan hakimiyyətini qəbul etməsinə, Azərbaycanla Ermənistan arasında sülh sazişinin imzalanmasına mane olursa bu onların uzun illər yeritdiyi düşmənçilik siyasətinin tərkib hissəsidir. Hətta deyərdim ki, bir biznes şəbəkəsidir ki, bundan qazanırlar. Amma fakt odur ki, bizim diaspor təşkilatlarımız işlərini elə də düzgün təşkil etmirlər. Adətən, Azərbaycana gələrkən böyük çıxışlar edirlər, amma kənarda onların çoxunun işinin güclü olduğunu görmürük. Məsələn, Almaniyadakı Azərbaycan diaspor təşkilatları əsasən qardaş Türkiyə bağlıdır. Bundan əlavə də onlardan yardım istəyirlər və alırlar, tədbirlərini də onların ofislərində keçirirlər. Azərbaycan diasporu özü özünü saxlamalıdır, güclü olmalıdır, dövlətdən heç nə istəməməlidir, özü dövlətə dəstək olmalıdır. Diasporumuzun üzərinə böyük missiya düşür ki, erməni təxribatlarının qarşısını yerində və vaxtında alsın, bu sahədə dövlətə dəstək olsun.
Mən bu yaxınlarda, konkret olaraq avqustun 12-dən 22-nə qədər İrlandiyanın paytaxtı Dublində oldum. Təsadüfən Azərbaycana qarşı olan bir təxribatı gördüm. Yəni Səfəvi dövlətinin miniatürləri adlı sərgi fevral ayından avqustun 28-ə qədər Dublin şəhərində nümayiş etdirilir. Orada Azərbaycan dövləti olan Səfəvi dövləti miniatürlərindən fars və erməni təbliğatında istifadə edilir. Şəkilləri çəkmişəm, məqalə ilə çıxış etmək fikrim var, elmi məqalə yazacağam. Fevral ayından indiyənə qədər orada təxribat gedir, Azərbaycan dövləti olan Səfəvilər miniatürləri təbliğ olunur, amma Azərbaycan adı çəkilmir. Elə bil ki, indiyə qədər Səfəvi dövləti barədə yazılan o dissertasiyalar, elmi işlər hamısı kənarda qalıb. Nəyə görə? Çünki onu təbliğ edən yoxdur. Səfəvi dövlətini Azərbaycan dövləti kimi dünyaya tanıtma işimiz zəifdir. Bu da diasporun gördüyü işlərin zəif olmasından irəli gəlir.
Amma diasporumuz buna münasibət bildirməyib. İrlandiyada səfirliyimiz olmasa da, İngiltərədə səfirliyimiz var, onlar buna reaksiya verməlidir. Bizim diaspor təşkilatlarımız formalizmdən uzaqlaşmalıdır. Fikrimcə, diasporumuz o qədər yaxşı təşkilatlanmalıdır ki, erməni diasporunun anti-sülh çağırışlarının qarşısını alsın. Ermənilər son iki ildə təxribatı daha da gücləndiriblər və biz onlardan daha böyük xoşagəlmzəliklər görə bilərik. Odur ki, diasporumuz bu həmlələrə qarşı aktiv olmalıdır. Azərbaycan qalib dövlətdir, Ermənistanla sülh istəyir, amma Ermənistan da, diaspor da anti-sülh mövqeyi tutur. Diasporumuz dünyaya Azərbaycan dövlətinin sülh istəyini çatdırmalıdır ki, biz sülh istəyirik, sülhü qarşı çlxan ermənilərdir. Hesab edirəm ki, diasporumuz öz fəaliyyətində dəyişikliklər etməli, aktiv fazada fəaliyyətə keçməlidir”- deyə M.Zülfüqarlı vurğuladı.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
