Ukraynanı Rusiyaya qarşı müharibədə dəstəkləyən Qərb ölkələri Kiyevə getdikcə daha müasir hərbi texnikalar ötürməyə başlayıblar. Bundan başqa, ABŞ və bir sıra Avropa ölkələri Ukraynaya Rusiyaya qarşı döyüşmək üçün muzdlu döyüşçülər göndərməyə davam edir. Elə bu fonda Rusiya hazırda Ukrraynada 30-dan artıq ölkəyə qarşı döyüşdüyünü iddia edir.
Ümumiyyətlə, hazırda belə hesab edilir ki, Ukraynada dolayı yolla olsa da Rusiya və NATO arasında savaş gedir. Amma bu savaşın birbaşa açıq müstəviyə keçmə ehtimalı da yüksəkdir. Artıq Rusiyada bu xüsusda daha açıq fikirlər səslənir. Kremlin əsas təbliğatçılarından biri olan rusiyalı teleaparıcı Vladimir Solovyov bu xüsusda bildirir: “Bizim bir damla da olsa şübhəmiz olmamalıdır ki, yaxın zamanlarda NATO ilə Rusiya arasında birbaşa toqquşma olacaq. Hazırda da biz NATO ilə müharibə aparırıq, amma bu, birbaşa açıq toqquşma demək deyil. Amma belə davam etməyəcək. Yaxın vaxtlarda açıq toqquşma fazasına keçid gözlənilir. Ukraynada Qərb silahlarına, xüsusi təlim keçmiş əsgərlərə qarşı mübarizə aparırıq. Müharibənin ilk günlərindən Qərb Kiyevə milyonlarla dollarlıq silah göndərir. Amma NATO birbaşa olaraq Rusiyaya qarşı müharibə etmədiyini bildirir. Bizdə olan dəqiq məlumatlara əsasən, yaxın vaxtlarda NATO Rusiyaya qarşı birbaşa müharibə etdiyini açıqlayacaq. Bunun isə insanlıq üçün böyük fəsadları olacaq”. Bu arada Qərb müharibədə dolayı iştirak səviyyəsini yüksəldən növbəti addım atmağa hazırlaşır. Belə ki, Avropa İttifaqı Ukrayna qüvvələri üçün ona qonşu ölkələrdə təlim proqramına başlanması məsələsini müzakirə etməyə hazırlaşır. İttifaqın xarici işlər komissarı Josep Borrel məsələ ilə bağlı qeyd edir: “Əlbəttə, bu, çox böyük missiya olacaq. Hər bir missiya münaqişənin səviyyəsinə uyğun olmalıdır”. O xatırladır ki, Ukraynaya ABŞ və Qərb tərəfindən verilən silah, texnika və kəşfiyyat məlumatları Ukrayna qüvvələrinə Rusiya ordusunun hücumlarını dayandırmaq olmasa da, yavaşıtmaq imkanı verib: “Bu tamamilə məntiqli görünür ki, uzanan müharibə və onun daha da uzanacağının hiss olunması maddi təchizatdan daha artıq dəstək tələb edir. Biz üzv ölkələrlə bu məsələni müzakirə edirik və siyasi müzakirə gələn həftə olacaq”. Borrel İspaniyanın Santander şəhərində keçirilən forumda bildirib ki, Avropa İttifaqının müdafiə nazirləri bu məsələni gələn həftə Praqada müzakirə edəcəklər. Avropa xarici siyasət idarəsinin başçısı bu təlimlərin praktikada necə həyata keçiriləcəyi barədə detallara varmayıb. O yalnız bunu deyib ki, nazirlər planı təsdiq edəcəklər. Borrel bunu da deyib ki, ukraynalı hərbçilərə təlim öz vətənlərində deyil, qonşu ölkələrdə veriləcək. O, Polşanın, Çex Respublikasının və əslində, Ukraynaya qonşu olmayan Birləşmiş Krallığın və Fransanın adlarını çəkib: “Bizim verdiyimiz silahlar olduqca müasirdir. Onlardan istifadə olunması üçün çox mühüm təlim də verilməlidir. Amma biz bunu Ukraynanın öz ərazisində etməyəcəyik”.Avropa mənbələrinin verdiyi məlumata görə, hərbçilərə təlim verilməsi ricası ilə Borrelə Ukraynanın xarici işlər və müdafiə nazirləri müraciət edib. ABŞ artıq Ukrayna üçün analoji proqramlar icra edir. İndi bunu Avropa da həyata keçirir. Ukraynaya müdaxilə başlanandan bəri Avropa İttifaqı Ukrayna üçün silahların alınmasına 2.5 milyard avro ayırıb.
Bununla yanaşı, Qərb ölkələrinin Rusiya ilə birbaşa müharibəyə daxil olması da fəal müzakirə mövzusudur. Hətta belə bir vaxtda Britaniya ordusunun yüksək vəzifəli rəsmilərindən biri deyib ki, ölkə qoşunları Rusiyaya qarşı döyüşə hazır olmalıdır və hərbçilər ailə və doğmalarına belə bir ssenarinin mümkünlüyünü izah etməlidirlər. “The Mirror” qəzetinin yazdığına görə, Britaniya ordusunun əsgər və serjant heyətinin ən yüksək rütbəli rəsmisi Pol Karney deyib ki, Birləşmiş Krallığın hərbiyyəsi hazırda özünü Rusiyadan gələn təhdidə hazırlayır və istənilən təcavüzü dəf etməyə hazır olmalıdır. Karney əlavə edib ki, hərbçilər ailələrini və yaxınlarını Şərqə göndərilməyin mümkünlüyü barədə xəbərdar etməlidirlər: “Vladimir Putin Ukraynaya müdaxilə edəndən bəri son 6 ayda dünya dəyişib və Britaniya ordusu yeni reallıqlara hazır olmalıdır. Mən istəyirəm ki, hamımız əməliyyatlara nə dərəcədə yararlı olduğumuzu yoxlayaq. Bu da mühümdür ki, sevdiklərimizi və ailə üzvlərimizi – bizim yoxluğumuzda ən ağır yükü çəkənləri buna hazırlayaq. Mənim ricam odur ki, potensial əməliyyata göndərilə biləcəyinizi yaxınlarınızla indi müzakirə edəsiniz. Bu sahəyə baxan sosial dəstək şəbəkələrindən telefon nömrələrini tapın və yaxınlarınıza dəstək ola biləcək adamları – hərbi həmkarların nümayəndəsi və ya hərbi birliyin keşişləri ilə əlaqə qurun”. O, izah edib ki, bütün bunlar hərbçinin uzun müddət evdə olmadığı dövr üçün çox mühümdür: “Əmin olaq ki, sevdiklərimizə bizim vermək imkanında olmadığımız dəstək evlə əlaqəmiz olmayan vaxtda onlara 100 faiz veriləcək”. Britaniya ordusunun keçmiş komandanı lord Riçard Dannat bu müraciəti necə anlamağın gərək olduğunu izah edib: “Bu, ordunun 1 nömrəli əsgərindən nəzakətli bir məsləhətdir. Bu o demək deyil ki, ordu elə bu saat Ukraynaya göndəriləcək. Hətta sülh vaxtlarında da müharibəyə və həyatın hər aspektinə hazır olmaq bütün orduların vəzifəsidir. Digər tərəfdən, Avropada müharibə, aqressiv Rusiya və Rusiya ilə həmsərhəd narahat ölkələrin olduğu bir vaxtda Britaniya əsgəri üçün baş verə biləcək real hadisələrdən ağah olmaq müdriklikdir”. Hərbiyyə rəsmiləri bildirirlər ki, xəbərdarlıqda ailəsi ilə əlaqəsi olmamaq təhlükəsizik mülahizələri ilə mobil telefonlardan istifadə edilməməsi deməkdir. Britaniya ordusunun komandanı general Patrik Sanders hələ iyun ayında demişdi: “Biz Avropada bir daha döyüşməyə hazır olmalı nəsilik”. “The Mirror” yazır ki, 10 minədək ukraynalı əsgər hazırda Britaniyada təlim keçir, Britaniyanın Kiyevdəki səfirliyi isə Kral dəniz piyadaları tərəfindən mühahafizə olunur.
Nahid SALAYEV
