Jurnalist Darya Duqinanın qətlinin üstü açılıb. Bununla bağlı Rusiya FTX-nin İctimaiyyətlə əlaqələr mərkəzi məlumat yayıb:
"Təxirəsalınmaz operativ-axtarış tədbirləri nəticəsində Federal Təhlükəsizlik Xidməti tərəfindən 1992-ci il təvəllüdlü rusiyalı jurnalist Duqina Daryanın qətlinin üstü açılıb. Terror aktı Ukrayna xüsusi xidmət orqanları tərəfindən hazırlanıb və törədilib. Qətlin birbaşa içraçısı və təşkilatçısı isə 1979-cu il təvəllüdlü Ukrayna vətəndaşı Vovk Natalya Pavlovnadır. O, 23 iyul 2022-ci ildə 2010-cu il təvəllüdlü qızı Şaban Sofiya Mixaylovna ilə birgə Rusiyaya gəlib. Qətl günü Vovk və Şaban Duqinanın fəxri qonaq qismində iştirak etdiyi festivalda olublar. Duqinanın “Prado” avtomobilinə idarə olunan bomba qoyduqdan sonra onlar avqustun 21-i Pskov vilayətindən Estoniyaya qaçıblar. Duqinanın öldürülməsini təşkil etmək və onun həyat tərzi barədə məlumat almaq üçün Vovk qızı ilə Moskvada ölən şəxsin yaşadığı binada mənzil icarəyə götürmüşdü. Jurnalisti müşahidə etmək üçün cinayətkar “Mini Cooper” avtomobilindən istifadə edib".
Göründüyü kimi, Rusiya Duqinanın öldürülməsində Ukrayna amilini rəsmən qabardır. Bunu əsas götürən Rusiya qisas almaq üçün Ukraynada hansısa tanınmış adamlara qarşı terror həyata keçirə bilərmi?
Siyasi şərhçi Elşad Həsənov “Bakı-Xəbər”ə açıqlamasında bildirdi ki, Rusiyanın xüsusi xidmət orqanı bu qətllə bağlı rəsmi mövqe açıqladı: “FTX bildirir ki, qətli Ukrayna vətəndaşı törədib. Dariya Duqina hərbi müxbir olub və rus rasizminin təbliğatçılarından olan Aleksandr Duqinin qızıdır. Onun özü də atasının ideologiyasını dəstəkləməklə yanaşı, həm də onu təbliğ edirdi. O, dəfələrlə Donbasda olub, Ukrayna ilə bağlı radikal fikirlər səsləndirib. Şəxsən mənə hansısa ukraynalı bir xanımın bu qətli törətməsi inandırıcı görünmür. Hadisənin məsuliyyətini Rusiyanın Resbublika Ordusu adlı təşkilat öz üzərinə götürüb. Həmin təşkilatın manifestini Ponomaryov kimi tanınmış siyasətçi bəyan etdi. Bəyanatdan görünür ki, bu hadisəni anti-müharibəçi qüvvələr törədib. Rusiyada 30 –a yaxın hərbi komissarlıq yandırılıb. Bütün bunları Ukraynanın xüsusi xidmət orqanları həyata keçirə bilməz. Hesab edirəm ki, bütün bunları törədənlər Rusiyanın daxilində Putinə qarşı olan müxalif qüvvələrdi. Ukrayna özünü ancaq müdafiə edir. Onun elə gücü yoxdur ki, Rusiyanın dərinliyində belə hadisələr törətsin. Aleksey Duqin bir ideoloq kimi Ukraynanın millətçilərdən təmizlənməsi ideyasını təbliğ edir. Artıq Rusiyadakı siyasətçilər Kiyevin mərkəzindəki dövlət binalarını raketlə vurmağı tələb edirlər. Bir çox rus ekspertlər bu qənaətdədir ki, Duqinanın qətlini Rusiyanın özü həyata keçirib. Bunu hətta FTX ilə ordunun baş kəşfiyyat idarəsi arasında gedən rəqabətlə bağlayanlar da var. Duqinin özü də çıxış edərək deyib ki, qızını öldürən ukraynalı nasistlər təcili cəzalanmalıdır. Bir sözlə, Rusiya bu hadisəni əlində bəhanə etməklə Ukrayna ərazisində qəddar addımlar atmağı düşünür. Ukrayna kəşfiyyatı xəbər verir ki, Ukraynanın müstəqillik günü olan 25 avqustda Kiyevə ağır zərbələr endirməyi planlayır. Ukrayna isə rəsmi olaraq Darya Duqinanın qətlində əli olmadığını dedi”.
Məhəmmədəli QƏRİBLİ
