Rusiyanın TVC federal televiziya kanalında Azərbaycana qarşı təxribat törədilib. TVC Moskva hökumətinin (meriya) kanalıdır.
Telekanalın efirində yayımlanan xəbərlər proqramında Azərbaycanın Qarabağ bölgəsinin Rusiya sülhməramlılarının müvəqqəti nəzarətində olan hissəsindən reportaj efirə verilib. Jurnalist Vera Kuzminanın müəllifi olduğu reportajda Dağlıq Qarabağ ayrıca “ölkə” kimi təqdim olunub. Azərbaycana qarşı təxribatçı fikirlərin yer aldığı reportajda Xankəndidəki erməni sakinlərlə müsahibələr də yer alıb.
V.Kuzmina reportajda Azərbaycanın ərazi bütövlüyünü şübhə altına alıb, Azərbaycanın 44 günlük Vətən müharibəsində iştirakını təxribat adlandırıb.
Daha sonra jurnalist Dağlıq Qarabağda ermənilərin çoxunun Ermənistan deyil, Rusiya pasportu almağı arzuladığını bildirib. Reportajda yer alan Xankəndinin erməni sakinləri müsahibələrində təhlükəsizlik üçün Rusiya vətəndaşı olmalarını və Qarabağın Rusiyanın tərkibində yer almasını istədiklərini vurğulayıblar. Beləliklə, ermənilərin sifarişi ilə hazırlanan bu təxribatçı süjetdə üç məqam diqqəti çəkir: jurnalist tərəfindən Dağlıq Qarabağın ayrı “dövlət” kimi təqdim olunması, erməni sakinlərin Rusiya vətəndaşlığı almaq istədiklərini qabartması və Azərbaycanın 44 günlük Vətən müharibəsini təxribat kimi qiymətləndirməsi.
Rusiya meriyasının telekanalında Qarabağın “müstəqil dövlət” kimi təqdim edilməsi hansı məqsədi daşıyır?
“Biz də hərəkətə keçməliyik”
Siyasi şərhçi Azər Həsrət “Bakı-Xəbər”ə bildirdi ki, o, TVC-də yayımlanan həmin reportaja şəxsən baxıb. Bu reportajın hiddət doğuran bir reportaj olduğunu deyən A.Həsrətin sözlərinə görə, jurnalist xanım açıq ifadə ilə “o tərəf Ermənistandır, bu tərəf Dağlıq Qarabağdır, o, bu tərəflər də Azərbaycandır” deyir: “Reportajda sanki üç ayrı bərabərhüquqlu dövlətdən danışılır. Əlbəttə, bu, Rusiya mediasının ilk belə təxribatçı əməli deyil. Heç vaxt Rusiya dövlətinə, bu ifadəni işlətməkdən çəkinmirəm, ruslara güvənmək olmaz. Dünyada ən güvənsiz ölkə Rusiyadır, elə ən güvənsiz millət də ruslardır. Biz qapımızı açıb onları evimizin içinə buraxmışıq. Yəni münaqişə bitib, müharibəni qələbə ilə başa vurmuşuq, üstün tərəfik, amma buna baxmayaraq, biz razı olduq ki, ruslar gəlib bölgədə sülhyaratma missiyasını həyata keçirsinlər. Bunu neytrallıq şəraitində etsinlər, tərəflərin işinə qarışmasınlar. Ermənistan dizə gətirilib, Azərbaycan qalibdir, biz öz aramızda qalan məsələləri həll edəcəyik. Amma nə müşahidə edirik? Onu müşahidə edirik ki, Rusiya sülhməramlıları öz səlahiyyətlərinə uyğun olmayan işlərlə məşğul olur, hədlərini aşırlar. Rusiya telekanalının belə bir təxribatçı reportaj yayımlaması təsadüfi deyil, bu, məqsədli şəkildə edilir. İşin birbaşqa tərəfi də ondan ibarətdir ki, burada bizim günahımız da az deyil. Biz özümüz niyə Rusiya mediasında ermənilər və onların dostları qədər təsirli deyilik. Bilirsiniz ki, Rusiya mediasında kifayət qədər erməni var, bu və ya digər şəkildə ermənilər Rusiya mediasını satın alıblar, sahibləniblər. Amma biz nə edirik? Həmişəki kimi yatırıq. Ermənilər isə istədiklərini edirlər, bizə də sonradan onların etdiklərini şərh etmək, tənqid etmək qalır. Bu isə heç nəyi dəyişmir. Biz də hərəkətə keçməliyik. Biz Rusiya mediasında niyə işləmirik? Niyə ermənilərin milyarderləri kimi bizim də milyarderlərimiz Rusiya mediasına sahiblənmirlər?”.
A.Həsrətin sözlərinə görə, erməni milyarderləri Rusiyada və dünyanın ayrı-ayrı ölkələrində Ermənistan və erməni xalqı üçün etdikləri ilə öyündükləri halda, bizim milyardelər isə milyonlarla dollar pul töküb hansısa yarıçılpaq müğənnini gətirib övladının toyunda oxutmaqla, oynatmaqla öyünür. “Ona görə də Moskvada oturan milyarderlərimiz utansınlar. Çünki onların olduqları bir coğrafiyada ermənilər bu işləri bacarırlar. Bu isə o deməkdir ki, ermənilər onları zəif duruma salıblar. Azərbaycanın Moskvadakı milyarderləri Rusiya telekanallarında gedən bu cür biabırçılıqların qarşısına əsaslı faktlar çıxarsınlar”.
A.Həsrət hesab edir ki, Rusiya mediasına çıxmaq lazımdır, bunu kim edə bilər, bunu da bizim Rusiyadakı imkanlı insanlarımız edə bilər: “Buyursunlar, şərait yaratsınlar, Azərbaycanın tanınmış jurnalistləri, siyasi şərhçiləri, ictimai xadimlərini Rusiya kanallarına çıxarsınlar. Bunlar olmasa, Rusiya telekanallarında bu cür təxribatçı yazılar, reportajlar olacaq”.
İradə SARIYEVA
