Növbədənkənar parlament seçkiləri başa çatdıqdan sonra Ermənisrtanda iqtidar və müxalifət arasında mübarizənin daha da kəskinləşəcəyi, ölkədə repressiyaların olacağına dair verilən proqnozlar özünü doğruldur. Bu fonda “Qarabağ klanı”nın Nikol Paşinyan iqtidarı üçün əsas hədəf olacağı da artıq məlumdur. Elə bunun nəticəsidir ki, “Qarabağ klanı”nın liderlərindən olan Ermənistanın keçmiş prezidenti Robert Köçəryan barəsində cinayət işi üzrə məhkəmə prosesi İrəvanın Şenqavit rayon məhkəməsində yenidən bərpa edilib. Eyni zamanda, Ermənstanın keçmiş baş naziri Armen Gevorkyanla bağlı məhkəmə prosesi də bərpa olunub.
Qeyd edək ki, Ermənistan Konstitusiya Məhkəməsi növbədənkənar parlament seçkilərindən əvvəl Köçəryan, Gevorkyan, keçmiş müdafiə naziri Seyran Ohanyan və Kollektiv Təhlükəsizlik Müqaviləsi Təşkilatının keçmiş baş katibi Yuri Xaçaturova qarşı irəli sürülən ittihamları qanunsuz saymışdı. Bundan sonra onlar barəsində məhkəmə prosesinə son qoyulacağı gözlənirdi. Amma seçkidən sonra cinayət işi yenidən başlanıb və Köçəryanın, “Qarabağ klanı”nın digər təmsilçilərinin həbsi istisna olunmur. Xatırladaq ki, 2008-ci ilin fevral ayında Ermənistanda prezident seçkiləri keçirilib. O vaxt Mərkəzi Seçki Komissiyası namizədlərdən biri olan və hakimiyyətin dəstəklədiyi Serj Sarkisyanın 52,8 faiz səs topladığını və qalib gəldiyini elan edib. Digər namizəd olan Ermənistanın ilk prezidenti Levon Ter-Petrosyan seçkidə saxtakarlıq olduğunu elan edib və nəticələri tanımayıb. Seçkilərin nəticələrinin saxtalaşdırlmasına etiraz olaraq martın 1-2-də ölkədə geniş aksiyalar keçirilib. Hakimiyyət mitinqin dağıdılması üçün güc tətbiq edib. Ordu və polisin açdığı atəş nəticəsində 10 nəfər ölüb, xeyli insan yaralanıb. Bu hadisələri törədənlər indiyədək cəzalandırılmayıb. Nikol Paşinyan Ermənistanın baş naziri olandan sonra 2008-ci ilin 1-2 mart hadisələrinə görə cinayət işi təzələnib. Robert Köçəryan məsələ ilə bağlı 2018-ci il iyulun 27-də həbs olunub və ötən il mayın 18-də girov qarşılığında azadlığa buraxılıb. Köçəryanla yanaşı, o dövrdə Ermənistan müdafiə nazirinin keçmiş müavini (2017-2018-ci illər arasında KTMT baş katibi) Yuri Xaçaturov, Ermənistanın keçmiş müdafiə naziri Seyran Ohanyan və baş nazirin keçmiş müavini Armen Gevorkyan konstitusiya quruluşunu devirmək və külli miqdarda rüşvət almaq, qanunsuz yolla əldə edilən vəsaitləri leqallaşdırmağa görə mühakimə olunur. Hazırda adları çəkilən şəxslərin yenidən həbsi gözlənilir. Bu fonda Köçəryan və tərəfdarları hakimiyyətə qarşı, küçə mübarizəsi də daxil olmaqla, digər formada mübarizə aparacaqlarını bildirir. Köçəryan hətta bildirir ki, hakimiyyət mövcud kursuna davam edərsə, il yarımdan sonra yenidən erkən parlament seçkiləri keçiriləcək. "Ermənistan" blokunun lideri bildirib ki, erkən seçkilər siyasi böhrandan çıxmaq üçün keçirilir. Amma bu, Ermənistanda baş vermədi: "Bu niyə məğlub olduğumuz, beş min insanın niyə öldüyü, Şuşa və Hadrutun necə itirildiyi suallarına cavab almayacağımız deməkdir. Mövcud şəraitdə hakimiyyət ya siyasi repressiya və təqibləri davam etdirəcək, ya da nəticə çıxaracaq və iş üslublarını kökündən dəyişdirəcəklər. Ancaq onlar artıq ilk yolu seçdilər və bu, erkən seçkilərə yol açır. Biz bu hakimiyyəti sakit qoymayacağıq, çünki onlar günahlarını başa düşmürlər və qəbul etmirlər. Kimin günahkar olduğunu, kimin məsuliyyətə cəlb olunmalı olduğunu göstərəcəyik. "Ermənistan" bloku radikal institusional müxalifətə çevrilib. Qanunla bizə verilən bütün imkanlardan istifadə edəcəyik. Son bir neçə ildə bir sıra sövdələşmələr nəticəsində pozulmuş parlament müxalifətinə inamı bərpa edəcəyik. Səlahiyyətli orqanların qarşısında iki seçim var. Birincisi, müxalifətə qarşı, zülmə qarşı repressiyanı davam etdirmək və Ermənistanın maraqlarına zidd olan Ankara və Bakının maraqlarına uyğun addımlar atmaqdır. İkinci yol mövcud siyasəti kəskin şəkildə dəyişdirməkdir, lakin bu yolu tutmurlar. Onlar buna qadir deyillər. Hakimiyyət problemlərə dünyagörüşlərinin səbəb olduğunu anlamadılar. Bu da yeni erkən seçkilərə səbəb olacaq".
Onu da qeyd edək ki, parlament seçkilərində 21 faizlə ikinci yeri tutan "Ermənistan" bloku hələ seçkinin nəticəsini tanımır. Ekspertlərə görə, Köçəryan seçki nəticəsini rədd edirsə və küçə mübarizəsinə gedirsə, bu, Ermənistanı böyük və çıxılmaz böhran vəziyyətinə sala bilər. Belə olacağı halda Ermənistanın birinci prezidenti Levon Ter-Petrosyan ölkədə vətəndaş müharibəsinin olacağına dair daha əvvəl xəbərdarlıq edib: “Qüvvələr sadəcə olaraq bir-birinə qarşı müharibə elan edib, onlar tərəfindən istənilən macəra mənim üçün gözləniləndir və ciddi olmaq anı artıq köhnəlib, ayılmaq anı gəlib, çünki əvvəlki məğlubiyyətdən sonra ciddi vətəndaş toqquşmaları ilə gedən seçkilər olsa, yalnız bunu söyləmək olar: Son müharibədə Qarabağı itirdik, bu seçkilərdən sonra Ermənistanı itirə bilərik. Ermənistanın iki prezidentinə təklif etdiyimi həyata keçirsəydik, bu çətin vəziyyətdən çıxmağımız üçün yaxşı imkana sahib olardıq. Mənim təklifim qəbul edilsəydi, Paşinyan 1-2 həftə ərzində Ermənistandan qaçardı”.
Nahid SALAYEV
