Biz müharibə istəmirdik və bu gün də istəmirik. Hesab edirəm ki, müharibə risqini sıfıra endirmək üçün bölgəmizdə, Cənubi Qafqazda müxtəlif təşəbbüslər irəli sürülməlidir. Biz buna hazırıq. Bizə müharibə lazım deyil. Biz istədiyimizə nail olmuşuq və bizim üçün indi yeni dövr - quruculuq dövrü, torpaqlarımızın bərpası dövrü başlayıb.
Bu barədə Azərbaycan Prezidenti İlham Əliyev Silahlı Qüvvələr Günü münasibətilə Azərbaycan Ordusunun rəhbər və şəxsi heyətinin bir qrupu ilə görüşündəki nitqində bildirib. Dövlət başçısı qeyd edib ki, bu, Ermənistan üçün dərs olmalıdır. Çünki onlar nəhayət başa düşməlidirlər ki, Azərbaycana qarşı bu düşmənçilik onlara çox baha başa gəldi:
“Onlar nə əldə etdilər? Heç nə. Baxın görün, 30 il ərzində müstəqil dövlət qura bilmədilər. Bu gün Ermənistan müstəqil dövlət sayıla bilməz. Onun nəyi müstəqildir, əgər xarici dairələrdən tam asılıdırsa? Xarici hərbi yardımdan tam asılıdır. Xaricdən gələn siyasi sifarişlərdən tam asılıdır. Onların 30 il vaxtı var idi, nəyə görə müstəqil ölkə qura bilmədilər? İşğala görə. Bu işğal onları bu günə saldı. Bu düşmənçilik, Azərbaycan xalqına nifrət onları bu günə saldı və ədalət özünü göstərdi. Bəzən hər birimiz müxtəlif situasiyalarda fikirləşirik ki, ədalət yoxdur, ədalət niyə bərqərar olunmur? Sadəcə olaraq, dözümlü olmaq lazımdır. Düzgün vaxtı gözləmək lazımdır və məqsədə çatmaq üçün hər gün çalışmaq lazımdır. Hər gün biz bu günü yaxınlaşdırırdıq. Qarabağ məsələsi Prezident kimi hər gün mənim gündəliyimdə birinci məsələ idi. Hər gün. Hər gün fikirləşirdim ki, bu Qələbəni əldə etmək, torpaqlarımızı azad etmək üçün əlavə nə etmək lazımdır. Biz bunu nümayiş etdirdik”.
Prezident deyib ki, indi məsələ Ermənistandan, onların davranışının və regional məsələlərə yanaşmasının necə olacağından asılıdır: “Hər halda, biz Ermənistansız da bölgədə istədiyimizə nail ola bilmişik. Bütün kommunikasiyaları çəkmişik, enerji xətlərimizi çəkmişik, dəmir yollarını, bütün nəqliyyat layihələrini bizim digər qonşularımızla icra etmişik. Əgər Ermənistan bu prosesə qoşulmaq istəyirsə, hələ xahiş etməlidir öz qonşularından”.
Ölkə başçısı müharibə risqini azalda biləcək yeni təşəbbüslər deyəndə hansı addımları nəzərdə tutur?
Ana Vətən Partiyasının sədr müavini Arzuman Abdulkərimov “Bakı-Xəbər”ə açıqlamasında bildirdi ki, hadisələrin xronoloji ardıcıllığına diqqət etsək, Azərbaycanın irəli sürdüyü təşəbbüslərin bir çoxunun həyata keçdiyinin şahidi olaruq: “Bu gün Cənubi Qafqazda sülhün təminatçısı kimi Azərbaycan çıxış edir. Çünki biz bölgədə yeni reallıqlar yaratmışıq. Eyni zamanda güclü orduya sahibik. Biz təşəbbüsləri irəli sürür və dəstəkləyirik. Ancaq bununla iş bitmir. Gərək Ermənistan və bölgədə maraqları olan ölkələr də təşəbbüslərlə çıxış etsin. Bunun üçün ilk növbədə dayanıqlı sülhün təmin olunmasına nail olmalıyıq. Kommunikasiyaların açılması, Ermənistanın sülh sazişini imzalaması, yaraqlıların tör-töküntülərinin Qarabağdan tam çıxarılması, minalanmış sahələrin xəritələrinin Azərbaycana verilməsi təmin olunmalıdır. Bölgədə sülhün bərqərar olması region ölkələrinin iqtisadi imkanlarını da artıracaq. Bundan ən çox qazanan bəlkə də Ermənistan olacaq. Azərbaycan bölgənin inkişafında maraqlı olmasaydı, Zəngəzur dəhlizinin açılmasına razılıq verməzdi. Təəssüflər olsun ki, seçki bitsə də, biz Ermənistandan deyilən istiqamətlər üzrə ciddi təşəbbüslərin şahidi olmuruq. Türkiyə prezidenti də dəfələrlə kommunikasiyaların bərpasında maraqlı olduğunu bəyan edib. Biz əsirlərin verilməsi müqabilində Ağdamın minalanmış ərazilərinə dair xəritənin alınmasında Gürcüstanın oynadığı vasitəçiliklə bağlı rolu yüksək qiymətləndiririk. Qonşu ölkənin addımlarını yeni təşəbbüs kimi qiymətləndirə bilərik. Başqa ölkələr də bundan örnək götürməlidir”.
Məhəmmədəli QƏRİBLİ
