Beynəlxalq jurnalist təşkilatlarının hamısı olmasa da, müəyyən bir qismi Azərbaycana qarşı qərəzli mövqe göstərməkdə davam edir. Azərbaycanın haqq işinin yanında olmayan belə beynəlxalq təşkilatlardan biri “Sərhədsiz reportyorlar”dır ki, uzun illərdir ağı qara, qaranı ağ kimi təqdim etməkdədir.
Bu günlərdə “Sərhədsiz reportyorlar” təşkilatı özünün twitter hesabında xidməti fəaliyyətini yerinə yetirən ispaniyalı jurnalistlərin Ermənistan-Azərbaycan sərhədinin Kəlbəcər rayonu ərazisində Azərbaycan hərbçiləri tərəfindən guya ölümlə hədələndiklərinə dair paylaşım edib.
“Sərhədsiz reportyorlar”ın bu yanlış paylaşımı ilə bağlı Azərbaycan Mətbuat Şurası təşkilata müraciət edib və müraciətdə “Sərhədsiz reportyorlar”ın yaydığı məlumatın həqiqətə uyğun olmadığını qeyd edib.
“Sərhədsiz reportyorlar” heç baş verməyən bir “hadisəni yaradıb” onun ətrafında ajiotaj formalaşdırır, amma məsələ burasındadır ki, bir müddət əvvəl Kəlbəcərdə öz peşə fəaliyyətini yerinə yetirərkən minaya düşüb erməni təxribatının qurbanı olan şəhid jurnalistlərlə bağlı bir bəyanat yayıb yeri-göyü silkələmədi ki, Ermənistanın Azərbaycan torpaqlarına basdırdığı minaların partlaması nəticəsində iki azərbaycanlı jurnalist şəhid olub.
“İspan jurnalist” oyunu quran “Sərhədsiz reportyorlar” Ermənistanın fitnəsinə uyub yenə də bu ölkənin tərəfini tutur.
“Birincisi, həm o ispan jurnalistin, həm də “Sərhədsiz reportyorlar” təşkilatının özünə sual vermək lazımdır...”
“Novoye vremya” qəzetinin baş redaktoru Şakir Ağayev “Bakı-Xəbər”ə bildirdi ki, “Sərhədsiz reportyorlar” təşkilatının Azərbaycanla bağlı qərəzli məlumat paylaşması birinci hal deyil, bu təşkilat da daxil olmaqla, bir çox beynəlxalq təşkilat adlarını söz və mətbaut azadlığı, insan hüquqlarının müdafiəsi ilə məşğul olan qurumlar qoyanlar, əslində, başqa əməllərlə məşğuldurlar: “Bu cür təşkilatlar birinci dəfə deyil ki, Azərbaycana qarşı ikili standartlardan və qərəzli mövqedən çıxış edirlər. Mən “Sərhədsiz reportyorlar”ın yaydığı o əsassız tvvitlə tanış oldum. Birincisi, həm o ispan jurnalistin, həm də “Sərhədsiz reportyorlar” təşkilatının özünə sual vermək lazımdır, sizin dövlət sərhədinizi beynəlxalq qanunlara zidd olaraq kimlərinsə keçməsinə dövlətiniz icazə verərmi? Xeyr, əsla icazə verməzlər. Azərbaycan dövləti bütün dünyaya elan edib ki, ərazilərimizə daxil olmaq istəyən jurnalistlər, beynəlxalq təşkilatların nümayəndələri akkreditasiyadan keçsin və gəlib normal şəkildə fəaliyyət göstərsin. İkincisi, hamı bilir ki, hazırda Ermənistan-Azərbaycan sərhədinin müəyyənləşdirilməsi prosesi gedir, delimitasiya, demarkasiya işləri hələ qurtarmayıb. Yadınıza düşürsə, bir müddət əvvəl sosial şəbəkələrdə də yayılmışdı ki, hətta Ermənistan təxribatçıları sərhəddə nə qədər Azərbaycan hərbçilərini təxribata çəksələr də, hərbçilərimiz sona qədər təmkinli davrandı və heç onlara silah çəkmədi, onların oradan uzaqlaşmalı olduğunu normal dillə başa saldılar. Terrorçunu, təxribatçını normal dillə başa salan hərbçilərimiz heç vaxt hər hansı bir jurnalistə qarşı belə addım atmazdı. Bu, başda Ermənistan, ermənilər olmaqla, Azərbaycana qarşı aparılan növbəti təxribatdır, qara kampaniyadır, Azərbaycanın qələbəsinə, qalib imicinə zərbə vurmaqdır. Biz buna təəccüblənməməliyik, belə hallarla çox qarşılaşmışıq. Bütün dünya, o cümlədən də “Sərhədsiz reportyorlar” təşkilatı da bilməlidir ki, Azərbaycan öz sərhədlərini beynəlxalq hüquq çərçivəsində qoruyur, qoruyub və qoruyacaq da”.
Ş.Ağayevin sözlərinə görə, Azərbaycana gəlib burada veriliş, reportaj hazırlamaq istəyən jurnalistlər Azərbaycan XİN-ə müraciət edib, icazə ilə bunu sərbəst edə bilərlər. “Sərhədsiz reportyorlar”ın erməni fitnəsinə şərik olduğunu qeyd edən ekspertin sözlərinə görə, amma Azərbaycan jurnalistlərinin gerçək faciəsini bu təşkilat görməzdən gəlir. “İyun ayının əvvəlində iki Azərbaycan jurnalisti Ermənistanın Kəlbəcərdə basdırdığı minaya düşüb şəhid oldular, bəs onda bu təşkilatın niyə səsi çıxmadı, nə üçün Ermənistanı müharibə cinayətində, sivil insanlara qarşı terrorda ittiham etmədi? Kəlbəcərdə həlak olanlardan ikisi jurnalist idi. Biz bu təşkilatdan bunu gözləmirdik də, amma bir halda ki, bu təşkilat söz, mətbuat azadlığını əlində şüara çevirib, onda bunu etməli idi. Çox təəssüflər olsun ki, “Sərhədsiz reportyorlar” təşkilatı öz qərəzli, ermənipərəst mövqeyini bu gün də davam etdirir” - deyə Ş.Ağayev qeyd etdi.
İradə SARIYEVA
