Vətən müharibəsində könüllü iştirak etmiş müxbirimiz Nahid Salayev Mətbuat Şurasının diplomunu aldı
44 günlük Vətən müharibəsində döyüş yolu Hadrutdan Şuşaya qədər uzanan, ağır döyüş əməliyyatlarında iştirak edən, cəsurluq nümunələri göstərən qəzetimizin əməkdaşı Nahid Salayev Azərbaycan Mətbuat Şurasının (MŞ) 44 günlük Vətən müharibəsində əsgər və zabit kimi iştirak etmiş jurnalistlərlə bağlı təsis etdiyi “Qələmdən süngüyə” mükafatı ilə təltif edilib. Vətən müharibəsində qələmini süngüyə çevirən, düşmənlə döyüşən, düşmənə qan udduran, könüllü iştirak edən həmkarlarımız bu mükafata layiq görülüblər, “Qələmdən süngüyə” mükafatına layiq görülən 30 həmkarımız sırasında əməkdaşımız N.Salayev də var.
Vətən müharibəsində iştirak edən, qəhrəmanlıq dastanları yaradanların sırasında yer alan N.Salayevin döyüş yolu zəngin və mürəkkəb olub, torpaqlarımızı düşmən caynağından xilas etmək üçün döyüşüb. Müharibədə dəfələrlə yaralansa da, hospitalda müalicə almaqdan imtina edib, “mənim yerim hospital yox, səngərdir” deyib, döyüş yoldaşlarından bir addım da uzaqlaşmayıb. Heç şübhəsiz ki, Vətən müharibəsində, bu müqəddəs savaşda “Bakı-Xəbər”in əməkdaşının da olması qürurvericidir.
N.Salayev öz döyüş yolu haqqında danışmağı elə də sevmir, amma onunla çiyin-çiyinə döyüşənlər onun haqqında ürəkdolusu danışırlar. Döyüş yoldaşı “Xəzər” TV-yə müsahibəsində N.Salayev haqqında elə maraqlı faktlar açıb ki, heç verilişə qədər o faktlardan ailəsinin, yaxınlarının xəbəri olmayıb. N.Salayevin döyüş yoldaşı danışır: “N.Salayev adlı döyüş yoldaşımız hamımızdan axırda gəlirdi. Biz meşədə əl-ələ tutub gedirdik ki, bir-birimizi itirməyək. Kolluqdan keçəndə o bizi itirir. Yəni əli buraxılıb, orada da danışmaq olmazdı, ona görə də qabaqda gedənə deyə bilmirik ki, arxada bir nəfərimiz qalıb, gözləyin. Danışmaq olmaz, deyə bilmirik. Sağımız-solumuz böyürtkən kolu idi, oradan keçəndə əlimizi bilmədən buraxıb orada qalır. Təsəvvür edin ki, orada ən çox fikirləşirdik ki, biz əsir düşməyəcəyik, bizi erməni-düşmən öldürməyəcək. Biz yaralansaq, azıb qalsaq, özümüzü öldürəcəyik. O fikirlərimiz vardı. Nahid də fikirləşib ki, burada çox qalsa, əsir düşə bilər, hər tərəf düşmən idi, onlar buranı tanıyırdılar. O özünü öldürmək istəyib... Allah cansağlığı versin, bizdən də çox can qoyan xüsusi təyinatlı qardaşlarımız oldu, onlarda gecəgörmə cihazı da vardı. Nahid özünü öldürmək istədiyi məqamda xüsusi təyinatlılardan biri gəlib əlini yavaşca onun çiyninə vurub işarə edib ki, qorxma. Nahid özünü öldürmək istədiyi məqamda xüsusi təyinatlı özünü yetirib, onu xilas edib. Orada saniyə söhbəti olub. Biz o epizodu görmədik, Nahid xilas olandan sonra bizə dedi ki, özümü öldürən anda çiynimə kimsə toxundu, qumbaranı çəkmək istəyirdim, işarə verdi ki, narahat olma, mənəm, qoymaram. Deyib ki, əl-ələ tutub gedəndə fikir vermişdim ki, arxada bir nəfərimiz axsayır və ona görə də diqqətli idim, çönüb arxaya baxdım ki, yoxsan, heç vaxt qoymazdım sən burada qalasan”.
Bəli, N.Salayev ölümlə dəfələrlə üz-üzə gəlib və gözünü qırpmadan, bir addım geri çəkilmədən mübarizəsini davam etdirib.
N.Salayev həmişə deyir ki, ən böyük arzusu Azərbaycan torpaqlarının düşmən işğalından azad olunması və bu mübarək və müqəddəs işdə iştirak etmək olub. Allah da ondan bunu əsirgəməyib, müzəffər ordunun bir müzəffər əsgəri olub.
N.Salayev fəxrlə deyir ki, döyüş yolum Hadrutdan başlayıb, Xocavənddən, Xocalıdan keçib, Şuşanın qarşısında bitib. “Ən ağır, çətin döyüşümüz Hadrutda olub” - deyən əməkdaşımız söyləyir ki, müharibənin bütün dəhşətlərini gözü ilə görüb, amma ürəyinə su səpən isə düşməni tari-mar edərək onları doğma yurd-yuvamızdan qovmaları olub.
12 gün dağda ac-susuz qalsa da, Nahid Salayevin də daxil olduğu tabor bütün döyüş tapşırıqlarını yüksək səviyyədə yerinə yetirib. Düşmən minaatan mərmisini, izburaxan güllələri üstlərinə yağış kimi yağdıranda da düşmənin güllə yağışının altından keçib irəliləyiblər, taborları böyük qəhrəmanlıqla, şücaətlə döyüşüb, müzəffər olublar.
Qələmini süngüyə çevirib müsəlləh əsgər kimi Vətənin ərazi bütövlüyü uğrunda cəsurluqla döyüşən N.Salayevin MŞ tərəfindən “Qələmdən süngüyə” mükafatına layiq görülməsi bizi sevindirdi. Hesab edirik ki, müharibədə könüllü iştirak edən N.Salayev və digər həmkarlarımız da daha böyük mükafatlara, ödüllərə, orden və medallara layiq görüləcəklər. Çünki onlar öz qəhrəmanlıqları ilə bunu haqq ediblər.
İradə SARIYEVA
