Köçəryanın tarixini alt-üst edən cavabsız sual – “Onların bağışlaya bilmədiyi nəyi etdiniz?”...

Ramil Hüseynov: “Bunun başlıca səbəbi Ermənistanda gizli formada gedən klanlararası savaşdır”

img

Bir tərəfdə müharibəni uduzmuş və yeni müharibə istəməyən Nikol Paşinyan, digər tərəfdə “Hadrutu, Şuşanı qaytaracam” deyən müharibə tərəfdarı Robert Köçəryan. Məlum olduğu kimi, ermənilər Paşinyandan - müharibənin olmamasından yana seçimlərini etdilər. Çünki 44 günlük müharibənin ölkə üçün necə böyük fəlakətə səbəb olduğunu gördülər. Bu səbəbdən yeni müharibə ilə üzləşməsinlər deyə, növbədənkənar parlament seçkilərində revanşistlərə yox dedilər.

Bütün bunlara rəğmən, Paşinyanın seçkidə böyük üstünlüklə qalib gəlməsi ətrafında Ermənistanda müzakirələr səngimək bilmir. Bu arada “Factor.am” saytının müxbiri Narek Kirakosyanın Ermənistanın ikinci prezidenti R.Köçəryana sualı sosial şəbəkələrdə və erməni mediasında geniş müzakirə olunur. Jurnalist Köçəryana belə sual verib: “Cənab Köçəryan, üç ildir Nikol Paşinyan hökumətinin siyasəti nəticəsində dövlətimizin başına gələnləri, bir çox iqtisadi və sosial problemi gördük. Ancaq, görəsən, siz nə etmişdiniz ki, bütün bunlardan sonra erməni vətəndaşları yenidən sizin üçün deyil, bu qədər problemə səbəb olan hökumətə səs verdilər. Onların bağışlaya bilmədiyi nəyi etdiniz?”

Köçəryan isə bu suala cavab vermək əvəzinə deyib ki, verdiyiniz sualı başa düşmürəm.

Əslində, R.Köçəryan ona verilən sualı yaxşı başa düşüb, sadəcə, cavab verməyə çətinlik çəkib. Ən azından ona görə ki, Köçəryanın ölkəyə rəhbərlik etdiyi 10 il ərzində hansı problemlərin yarandığını erməni cəmiyyəti yaxşı bilir. Bu səbəbdən iki pislə müqayisədə nisbətən az pisə üstünlük verildi.

  • “Köçəryanın prezidentliyi dövründə ölkədə korrupsiya sistemli hal alaraq oturuşdu, məmurların rüşvət alması adiləşdi”

Məsələyə münasibət bildirən Yeni Yol Partiyasının sədri Ramil Hüseynovun sözlərinə görə, ermənilərin revanşist Köçəryana səs verməkdən imtina etməsinin çoxsaylı səbəbi var: “Bunun başlıca səbəbi Ermənistanda gizli formada gedən klanlararası savaşdır. Çünki 20 il ölkəni idarə edən “Qarabağ klanı” hansısa yaxşı nümunə ilə yadda qalmadı. Əksinə, ölkədəki çoxsaylı problemi yeni hakimiyyətə miras qoydu. Bu həmin Köçəryandır ki, onun prezidentliyi dövründə Ermənistan Rusiyanın bir nömrəli vassalına çevrildi. Serj Sarkisyan belə, Köçəryan qədər Moskvanın hər dediyini etmirdi. Bəzi situasiyalarda Kremlin iradəsinə zidd addımlar atırdı. Məsələn, onun prezidentliyi dövründə Avropa İttifaqı ilə assosiativ saziş imzalandı. Bu həmin Köçəryandır ki, hakimiyyəti öz əlində cəmləşdirməkdən ötrü bir çoxunu terror yolu ilə aradan götürdü. O bu metoddan həm Qarabağda separatçılara rəhbərlik etdiyi dövrdə, həm də Ermənistanda hakimiyyətə yiyələndikdən sonra geniş istifadə etdi. Nəticədə Ermənistanda qorxu mühiti yarandı. Köçəryanın prezidentliyi dövründə ölkədə korrupsiya sistemli hal alaraq oturuşdu. Məmurların rüşvət alması adiləşdi. Bütün bunlar yaxın tarixdə baş verdiyi üçün ermənilər məğlubiyyətə rəğmən, Paşinyanı seçdilər. Bir daha bəlli oldu ki, Ermənistan erməniləri Qarabağda ölmək istəmirlər”.

Partiya sədri hesab edir ki, Köçəryanın azca vicdanı olsaydı, bu cür nəticədən sonra siyasətdən gedərdi.

Vidadi ORDAHALLI

Son xəbərlər