Ermənistanın Baş naziri vəzifəsini icra edən Nikol Paşinyan seçkilərdə məğlub olan rəqib partiyaların liderlərini əhatə edəcək parlamentdənkənar bir strukturun yaradılmasını təklif edib. Bu barədə “Qraparak” qəzeti Paşinyanın bir sıra siyasətçilərlə siyasi məsləhətləşmələrinə istinad edərək məlumat verib.
Qəzet yazır ki, Paşinyan rəqib siyasətçilərə hər hansı bir vəzifə təklif etməsə də, bu siyasi kapitalı itirmək istəmir: “Bu əsasda Paşinyanla görüşlərin bəzi iştirakçıları yaradılan şuranın büdcə hesabına fəaliyyət göstərəcəyi və orada çalışanların maaş alacağı qənaətinə gəlib”. Siyasi müşavirələr çərçivəsində Paşinyan “Respublika” partiyasının lideri Aram Sarkisyan, “Ədalətli Ermənistan” partiyasının lideri Norayr Norikyan, Xristian Demokrat Partiyasından Levon Şirinyan, “Respublika naminə” partiyasından Arman Babacanyan, “Evimiz Ermənistan” partiyasından Tiqran Urixanyan, “Mühafizəkarlar” partiyasından Mikael Ayrapetyan, “Vətəndaş seçimi” partiyasının idarə heyətinin üzvü Suren Saakyan, həmçinin Samvel Babayan, Tiqran Arzakantsyan, David Sanasaryanla görüşüb. “Milli demokrat qütbü” və “5165” hərəkatının nümayəndələri isə görüşdən imtina edib.
Ekspertlər hesab edir ki, Paşinyan bir araya gəldiyi siyasi qüvvələrlə razılaşıb revanşist müxalifət, o cümlədən “Qarabağ klanı” qarşısında mövqeyini gücləndirməyə çalışır. Ukraynalı politiloq Aleksey Voronenko indiki halda bunu vacib hesab edir. Onun sözlərinə görə, Robert Köçəryan və Serj Sarkisyan gizli plan üzərində işləyir: “Bu tandem ən çirkin yollara əl ataraq, Ermənistanda çaxnaşmalar yaradıb hakimiyyəti özlərinə qaytarmağa çalışacaq. Köçəryan və Sarkisyan bir müddət kölgədə qalacaq, sonra isə Rusiyadakı kriminal dairələrin dəstəyi ilə həm Ermənistan, həm də bütün region üçün böyük fəsadlara gətirib çıxara biləcək planı həyata keçirməyə başlayacaqlar. Birincisi, onlar Qarabağda öz imkanlarından istifadə edərək həm Rusiya sülhməramlılarına, həm də Azərbaycan Silahlı Qüvvələrinə qarşı müxtəlif təxribatlar təşkil etdirə bilərlər. Bütün “atılan daşlar” isə Ermənistan hökumətinə tərəf uçacaq, çünki Serj və Robert öz çirkin əməllərindən sonra iz saxlamayacaqlar”. Onun sözlərinə görə, Köçəryan və Sarkisyan azadlıqda qaldıqca, region saat mexanizmli bir partlayıcı qurğunun üzərində durmuş kimi olacaq: “Nikol Paşinyana qarşı sui-qəsd də təşkil edilə bilər. Bu tandemin “dostluğunda” oxşar terror aktları təşkil edə bilənlər az deyil. Köçəryan və Sarkisyana Qafqazda sülh, qonşuları ilə dostluq edən çiçəklənən Ermənistan lazım deyil. Qafqazda xaosu rahat idarə etmək üçün onlara yeni Suriya lazımdır”. Maraqlıdır ki, indiki halda “Qarabağ klanı” Qarabağda Rusiya sülhməramlı qüvvələrinin məsuliyyət zonasında vəziyyəti qarışdırmaqla Paşinyan iqtidarına təzyiq göstərməyə can atır. Xatırladaq ki, bu günlərdə Xankəndidə qondarma rejimin başçısı, separatçı Araik Arutyunyanın istefası tələbilə etiraz aksiyası keçirilib. Aksiyada Arutyunyana və Nikol Paşinyana qarşı kəskin ifadələrin yer aldığı şüarlar səsləndirilib. Sözügedən aksiyanın Ermənistanda baş tutan və Paşinyanın partiyasının birmənalı qələbəsilə tamamlanan seçkidən dərhal sonra həyata keçməsi təsadüf sayılmır.
Məlum olduğu kimi, Arutyunyan seçki günü Paşinyanın seçki qərargahına baş çəkmişdi və seçki dövründə də ona olan dəstəyini gizlətmirdi. Seçkidən sonra qondarma qurumun başçısı Paşinyanı təbrik etdi, bundan öncə isə Paşinyanın özü Arutyunyana dəstək mesajları səsləndirmişdi. Bundan sonra Xankəndidə təşkil edilən mitinq göstərdi ki, Köçəryanın başçılıq etdiyi “Qarabağ klanı” burada Paşinyana düşmən mövqedə dayanan rejim yaratmaqda maraqlıdır. Bu, həmçinin, İrəvandakı hökumətin Xankəndidəki separatçılara təsir imkanlarını minimuma endirməyə yönəlib. Belə vəziyyətdə “Qarabağ klanı” yenidən Xankəndidə dayaq məntəqəsi yaradıb Ermənistanda hakimiyyətə təsir etməyi düşünür. Amma nəzərə alınmır ki, Xankəndi də tezliklə Azərbaycanın nəzarətinə keçəcək. Burada “Qarabağ klanı”nın ciddi dayaq yaratması mümkünsüzdür. Digər tərəfdən, Paşinyan hakimiyyəti artıq Azərbaycanla münasibətlərin qurulması prosesinə də maraq göstərir və bunu erməni cəmiyyəti də istəyir. Bu fonda Ermənistan parlamentinin deputatı, Paşinyanın yaxınlarından biri olan Aleksey Sandıkov maraqlı açıqlamalar verib: “Sovetlər Birliyi Azərbaycan və erməni xalqının sülh şəraitində yaşaya biləcəyinin bariz nümunəsidir. Buna misal olaraq Müslüm Maqomayev və Arno Babacanyanın məşhur dueti mənim üçün simvolikdir”. Millət vəkili bu günlərdə Gorus-Qafan yolunun hazırda Azərbaycanın nəzarətində olan hissəsindən keçdiyini də qeyd edib: “Otuz ildən çox müharibə apardığın bir ölkənin bayrağı altında gəzmək, bu hissi yaşamaq həm emosional, həm də psixoloji cəhətdən çox çətindir. Eyni zamanda, yenə də tarixə baxsaq, xüsusən də SSRİ-də erməni və Azərbaycan xalqlarının birgə, yanaşı yaşamalarına və nəzəri cəhətdən mümkünlüyünə dair çoxlu nümunələr var. Təbii ki, tərəflərin hər birinin tələbatlarına ciddi riayət etmək şərti ilə”. Bu açıqlama Paşinyan iqtidarının, “Qarabağ klanı”ndan fərqli olaraq, Azərbaycanla əməkdaşlığa meyl edəcəyini təsdiqləyir. Bunu erməni cəmiyyəti də istəyir. Bu səbəbdən “Qarabağ klanı”nın yenidən hakimiyyətə gəlməsinə erməni cəmiyyəti tərəfindən hansısa dəstək gözlənilmir. Elə bu da “Qarabağ klanı”nın revanş planlarının iflası deməkdir.
Tahir TAĞIYEV
