Sosial şəbəkələrdə İrandan Azərbaycanın Xankəndi şəhərinə aramsız olaraq ağırtonnajlı yük avtomobillərinin hərəkət etməsinə dair yeni məlumatlar yayılıb. Bildirilir ki, həmin avtomobillər İrandan Ermənistana keçir, oradan da Xankəndiyə yönəlir. Həmin avtomobillərin yüklərinin nədən ibarət olması barədə nə Ermənistan, nə də İran İslam Respublikası indiyədək rəsmi açıqlama verib.
Sonuncu belə olay may ayının əvvəlində qeydə alındı. O vaxt İranın dövlət nömrə nişanlı yük avtomobilləri Ermənistandan keçərək Laçın dəhlizi vasitəsilə Xankəndiyə yollanmışdı. İranlı sürücülərin idarə etdikləri bu yük maşınlarının Azərbaycan ərazisində hərəkətlərinin qeyd olunduğu foto və video görüntülər də var. Görüntülər yayılandan sonra İranın Azərbaycandakı səfirliyi bəyanat yayaraq bildirmişdi ki, videolar, fotolar və məlumatlar araşdırılacaq. Bir qədər keçdi, səfirlik nəticəni açıqladı: sən demə, görüntülər və məlumatlar "dezinformasiya" imiş. Təqdim edilən yeni görüntülərdən məlum olur ki, İrandan Ermənistana keçmiş ağırtonnajlı yük avtomobilləri yenə Xankəndiyə doğru hərəkət edir. Üzərində İran bayrağı olan 124872 (fars rəqəmləri ilə) ban nömrəli yük maşını dövlət qeydiyyat nömrəsini dəyişərək Ermənistana məxsus 16US195 dövlət nömrə qeydiyyatı ilə Rusiyanın sülhməramlı kontingentinin nəzarətində olan postdan asanlıqla keçərək Xankəndi istiqamətinə hərəkət edir. Üzərində "HAMNAFAS" yazılmış yük maşını axşam saatlarında geri qayıdıb, Ermənistana keçib.
İranlı sürücülər artıq yeni "fənd"dən istifadə edirlər: onlar Ermənistan ərazisinə daxil olanda İranın dövlət nömrə nişanlarını çıxarır, avtomobilə Ermənistan nömrələri vuraraq Xankəndiyə hərəkət edirlər. Maraqlıdır, İran vətəndaşı olan sürücülərin idarə etdikləri yük avtomobilləri Xankəndiyə nə daşıyır, hansı yükləri aparırlar? Bu adi yüklərdirsə, onda nə üçün avtomobillər Ermənistan ərazisinə daxil olandan sonra nömrə nişanları dəyişdirilir?
Müstəqil siyasətçi Bünyamin Qəmbərli “Bakı-Xəbər”ə açıqlamasında bildirdi ki, İranın bu addımları o qədər də təəccüblü deyil: “Çünki Qarabağın və ətraf rayonların işğalda olduğu dönəmdə də İran bənzər addımları çox atırdı. Onda asanlıqla işğal olunan ərazilərdən keçib gedirdilər. Təəssüflər olsun ki, həmin vaxt biz İran şirkətlərinin adını “qara siyahıya” salmadıq. Qarabağa qanunsuz səfər edən digərlərilə bağlı qadağalar tətbiqinə dair təcrübəmiz vardı. İran maşınlarının belə fəndlərə əl atması onların niyyətindən xəbər verir. Hesab edirəm ki, söhbət hansısa humanitar yardımdan gedə bilməz. Böyük ehtimalla, həmin maşınlar Xankəndidəki separatçıların qalıqlarına silah-sürsat daşıyırlar. Belə deyilsə, niyə maşınların nömrələrini dəyişirlər? Burada əsas məsuliyyət Laçın dəhlizindən onları buraxan rus sülhməramlılarının üzərinə düşür. Bu səbəbdən də Azərbaycan çalışmalıdır ki, Laçın dəhlizinə nəzarəti bərpa etsin. Bu gecikirsə, bizim dronlar və digər texniki vasitələrlə həmin avtomobillərin hərəkətini izləyib, ortaya ciddi faktlar qoymaq imkanımız var. Bunu mütləq etməliyik. İranla bağlı belə faktlar bir neçə dəfə üzə çıxdı. Ancaq onlar üzrxahlıq etmək əvəzinə, faktları “dezinformasiya” adlandırdılar. Azərbaycan bununla bağlı ən sərt formada etirazını etməli, İrandan izahat istəməlidir. Bunları əsas götürüb, İran şirkətlərinin Qarabağın bərpası prosesində iştirakına imkan verilməməlidir. Olduqca ciddi təxribatdır. Hətta həmin maşınlar humanitar yük aparsa və ya boş getsə belə, Azərbaycandan icazə alınmalıdır. Çünki onlar saxta nömrə ilə Azərbaycan sərhədini keçirlər”.
Məhəmmədəli QƏRİBLİ
