Növbədənkənar parlament seçkilərindən sonra Ermənistanda vətəndaş qarşıdurmasının yaşana biləcəyinə dair verilən proqnozlar özünü doğrultmaqdadır. Hər halda, “Qarabağ klanı”na daxil olan qüvvələrin, xüsusən də sabiq prezident Robert Köçəryanın rəhbərlik etdiyi "Ermənistan" blokunun addımları artıq bunun üçün münbit zəmin yaradır.
Qeyd edək ki, blok ölkədə siyasi repressiyaların başladığını bildirib. Blokun mərkəzi seçki qərargahının nümayəndəsi Aram Vardevanyan bildirib ki, baş nazir səlahiyyətlərinin müvəqqəti icraçısı Nikol Paşinyanın həmrəyliyin təzahürü haqqında danışmasına baxmayaraq, ölkədə vətəndaş qarşıdurması yaranır: “Bu qarşıdurmanın məsuliyyəti hakimiyyətin üzərinə düşür. Bu hakimiyyət rəqiblərinə qarşı repressiyalara başlamaqla ölkəni vətəndaş müharibəsinə sürükləyir. "Ermənistan" bloku komandasının üzvü olanlar məhz hakimiyyət tərəfindən repressiyalara məruz qalır. Xüsusən də yerlərdə vəzifə tutan bütün üzvlər təhdidlər vasitəsilə öz ərizələri ilə istefaya getməyə məcbur edilir. Lori administrasiyasında belə tələb Odzun icmasının başçısı Arsen Titanyana qarşı irəli sürülüb. O, qubernatorun tələbini yerinə yetirməkdən imtina etdikdə vilayət administrasiyasının binasında döyülüb. Hakimiyyət belə təcrübədən imtina etməsə, yeni siyasi böhranın əsasını qoyacaq”. Robert Köçəryan özü isə bildirir ki, hakimiyyət eyni üslubda işləyərsə, Ermənistanı yeni erkən parlament seçkiləri gözləyir. O vurğulayıb ki, bu gedişıə küçə döyüşləri belə mümkün ola bilər. Hazırda Robert Köçəryan və digər müxaliflərin məqsədi seçkilərin nəticələrini mübahisələndirib onun ləğvinə nail olmaqdır. Bundan sonra müxalifət yeni erkən parlament seçkilərinin keçirilməsinə nail olmağa çalışır. Bu xüsusda o da məlumdur ki, “Ermənistan” siyasi bloku parlament seçkilərinin nəticələrindən Konstitusiya Məhkəməsinə şikayət edəcək. Robert Köçəryan bu xüsusda bildirib: “Səsvermənin kütləvi qanun pozuntuları ilə keçirildiyini güman edirik. Biz seçkilərdə inzibati resursların istifadəsini gördük və bu səbəbdən seçkinin nəticələrini mübahisələndirmək üçün Konstitusiya Məhkəməsinə müraciət edəcəyik”. Onun sözlərinə görə, seçkinin nəticələri hamı üçün gözlənilməz olub, bunu rəy sorğuları da sübut edir. Hesab edilir ki, Konstitusiya Məhkəməsi seçkilərin nəticələrini ləğv etməsə, müxalifət küçə mübarizəsinə başlayacaq.
Müxalifətin mövcud fəaliyyəti və həyata keçirmək niyyətində olduğu planlar bu düşərgənin hakimiyyətlə konsensusa gəlmək niyyətindən uzaq olduğunu göstərir. Əksinə, müxalifət qarşıdurmada, ölkədə vəziyyətin daha da gərginləşməsində maraqlıdır. Bu vəziyyətdə Nikol Paşinyan xalqdan aldığı “polad mandat”la təhlükə mənbəyi hesab etdiyi rəqiblərini ən kəskin formada neytrallaşdıracağını bildirir. Paşinyan rəqiblərinin bu hərəkətinin Ermənistan üçün təhdid yaratdığını əsas gətirərək belə sərt addımlar atacağını bəyan edir. Müxalifətin barışmaz mövqeyi, küçə mübarizəsinə hazırlaşması, hakimiyyətin buna qarşı sərt cavab tədbirləri görmək niyyətində olması Ermənistanda vətəndaş qarşıdurması ehtimalını artırır. Bunu erməni politoloq, şərqşünas Sergey Melkonyan da xüusi olaraq qeyd edir: “Ermənistandakı seçkilər erməni dövləti üçün ikinci 10 noyabrdır. Bu halda növbəti böhranı gözləmək lazımdır. Çünki bu cür səriştəsiz hökumətlə bu, çox tezliklə baş verəcək. İnsanlar görəcəklər ki, vəziyyət pisləşir. Bir hissəsi öz səhvini anlayacaq. Bunu anlamaları üçün onlarla işləmək lazımdır. Gələcək elitanı da hazırlamaq lazımdır. Səhnədən yaşlı siyasətçiləri yığışdırmaq və onların gənclərdən ibarət ehtiyat heyətini irəli çəkmək lazımdır. Müxalifət onsuz da Paşinyanı qəbul etməyəcək. Küçə mübarizəsi yolu ilə olsa belə, onu devirməyə cəhd edəcək”.
Hazırda Ermənistanda siyasi, hərbi, sosial sahələrdə gərginlik yüksələn xətt üzrə davam edir. Ekspertlər bildirir ki, daxili siyasət partlayış təhlükəsi törədir, vəziyyət vətəndaş müharibəsinə keçmək həddinə yaxınlaşır. Erməni hərbi ekspert Karen Vrtanesyan da belə müharibəni istisna etmir: “Seçkilər seçkilərsiz də bir çoxlarımıza aydın olanı göstərdi: Nikol hakimiyyəti heç vaxt qanuni yolla güzəştə getməyəcək. Nikol hakimiyyət naminə minlərlə həyatı qurban verməyə, dövləti dağıtmağa, müharibəni təhrik etməyə hazırdır. Nikol tam bir əxlaqsızdır və tamamilə antiermənidir”. Qarabağdakı keçmiş separatçı rejimin “baş naziri” olmuş Anuşavan Danielyan da vətəndaş müharibəsini istisna etmir: “Hökumət istefa verməsə, ölkəmizə, dövlətçiliyimizə və xalqımıza fəlakətli olacaq və yaxınlaşan vətəndaş müharibəsinin qarşısını almaq mümkün olmayacaq”. O, hazırda Ermənistanın sürətlə vətəndaş müharibəsinə doğru getdiyini qeyd edib: “Baş nazir və hökumət, həmçinin Ermənistan prezidenti iki il yarımda baş verənlərin hamısına cavabdehdir. Hökumət üzvlərini yeni seçkilər keçirməyə, xalq üçün dağıdıcı olacaq vətəndaş müharibəsinin qarşısını almağa, baş nazirin avantürist açıqlamalarına dəstək verməməyə çağırıram”.
Digər ekspertlərin fikrincə də, Ermənistanı olduqca ağır günlər gözləyir.
Nahid SALAYEV
