Ermənistanda Nikol Paşinyanın partiyasının böyük fərqlə seçkilərdə qalib gəlməsindən sonra Qarabağın dağlıq ərazisinin Rusiya sülhməramlı qüvvələrinin nəzarəti altında olan hissəsində vəziyyət qəfil gərginləşib.
Ermənilər Xankəndinin mərkəzinə toplaşaraq, özünü hələ də hansısa “respublikanın” prezidenti adlandıran Araik Arutyunyanın istefasını tələb ediblər. Bu etiraz mitinqi Araik Arutyunyanın iyunun 19-da axşam İrəvanda Nikol Paşinyanın seçki qərargahında görünməsinin və ertəsi gün onun Paşinyanı qələbə münasibətilə hamıdan əvvəl təbrik etməsinin ardınca keçirilib. Araik səsvermə ərəfəsində Paşinyanın partiyasının seçki qərargahında görünməsini “şəxsi işləri” ilə əsaslandırıb. Paşinyan isə seçkilərin ilkin nəticələri məlum olandan sonra partiyasının seçki qərargahında tərəfdarları qarşısında çıxış edərkən Araik Arutyunyana “xüsusi təşəkkür” edib. Maraqlıdır ki, bütün bunlardan sonra ermənilər Xankəndinin mərkəzinə toplaşaraq Araikin istefasını tələb ediblər. Araik Arutyunyan isə bu gün özünün Facebook səhifəsindən hamını Xankəndinin mərkəzinə mitinqə çağırıb. O bildirib ki, “son günlər yaranmış daxili siyasi gərginliklə və son aylar yığılıb qalmış məsələlərlə bağlı” xalqa müraciət etməyə hazırlaşır. Mitinq saat 18.00-da başlamalıdır. Arutyunyan vəd edir ki, mitinqə toplaşanlar qarşısında “başlıca problemlər”-müharibədən tutmuş indiki problemlərə, Ermənistanla münasibətlərə qədər hər şey haqda açıq danışacaq.
Ermənistandakı seçkinin nəticələrinin elanından dərhal sonra Qarabağdakı ermənilərin separatçı qurumun rəhbərinə qarşı etiraz etməsi nəyin göstəricisi sayılır?
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, Ermənistandakı idarəetmədən daha çox əziyyət çəkən məhz Qarabağ erməniləri olub: “Ermənistanın birinci ombudsmanı Larisa Alaverdiyan Qarabağdan çıxaraq İrəvan və digər məntəqələrdə məskunlaşmış ermənilərə qaçqın statusunun verilməməsinin ciddi problemə gətirib çıxaracağını bildirib. Hazırda hüquq müdafiəçisi olan Alaverdiyan bildirib ki, Ermənistan hökuməti bununla bağlı təcili addım atmalıdır. Onun sözlərinə görə, Qarabağdan qaçqın düşmüş ermənilərə nə Ermənistanda, nə də Qarabağda sahib çıxırlar, onlara humanitar yardım edilmir. O bildirib ki, vəziyyət bu şəkildə davam edərsə, statussuz qalmış Qarabağ erməniləri ölkəni tərk edərək mühacirətə getməli olacaqlar. Qarabağdakı ermənilər bu vəziyyətə düşmələrinin günahını Ermənistan hakimiyyətində görür. Köçəryan “Qarabağ klanı”nı təmsil edir. Araikin onu yox, Paşinyanı dəstəkləməsi onları qıcıqlandırıb. Ancaq Qarabağdakı ermənilərin arasında müharibə istəyənlərin sayı yox səviyyəsindədir. Bu baxımdan da, hazırda Qarabağdakı ermənilərin arasında revanşist əhval-ruhiyyə yoxdur. Əksinə, onlar normal yaşayışın və davamlı sülhün tərəfdarıdırlar. Onların Araikə etdikləri etirazın bir detalı da onun separatist davranışlarını davam etdirməsilə bağlıdır. Hesab edirlər ki, buna son qoyulsa onlar əminamanlıq içərisində yaşaya bilərlər”.
Məhəmmədəli QƏRİBLİ
