Bir tərəfdə müharibəni uduzmuş və yeni müharibə istəməyən Paşinyan, digər tərəfdə “Hadrutu, Şuşanı qaytaracam” deyən müharibə tərəfdarı Köçəryan. Məlum olduğu kimi, ermənilər Paşinyandan – müharibənin olmamasından yana seçimlərini etdilər. Erməni cəmiyyəti iki pislə müqayisədə nisbətən az pisi seçməli oldu.
O da var ki, Ermənistan parlamentində Paşinyanın partiyasından başqa təmsil olunan iki partiya bu və ya digər formada “Qarabağ klanı”nı təmsil edir. Nisbətən mötədil olan və Qarabağdan olmayan Marukyanla Çarukyanın partiyaları parlamentə düşə bilmədilər. Hansı ki, onların parlamentdə olması Paşinyana ciddi təhlükə yaratmırdı. Bu dəfə Paşinyan parlamentdə hakimiyyəti qurmaq üçün yetərli mandata sahib olsa da, ona müxalif olanlar daha hiyləgər və təcrübəlidirlər. Müqayisə üçün qeyd edək ki, 1997-ci ilin fevralında Qarabağdakı separatçılara rəhbərlik edən Robert Köçəryan Ermənistanın baş naziri təyin edildi. Serj Sarkisyan isə ölkənin daxili işlər naziri idi. Bu cütlük 1998-ci ildə birləşərək prezident Levon Ter-Petrosyanı istefa verməyə məcbur etdilər. Daha sonra hakimiyyəti, bütövlükdə, “Qarabağ klanı” öz əlinə keçirdi.
Bu dəfə Ermənistan parlamentli respublikadır, amma parlamentdə təmsil olunan digər 2 bloka Paşinyanın bir nömrəli düşmənləri rəhbərlik edirlər. Nikol üçün indi daxili mübarizə daha da kəskinləşə bilər. Çünki Paşinyan təkbaşına hökuməti formalaşdırsa da, parlamentdə ikinci əsas qüvvə Köçəryanın rəhbərlik etdiyi “Ermənistan” bloku, üçüncü qüvvə Serj Sarkisyanın rəhbərlik etdiyi “Şərəfim var” bloku olacaq. Bu, Paşinyanın 2018-ci ildə devirdiyi “Qarabağ klanı” ilə parlament müstəvisində döyüşəcəyi deməkdir. Bu amil bəlli bir müddətdən sonra Paşinyan üçün nə vəd edir?
“Ola bilər ki, Nikol konstitusiya dəyişikliyinə gedərək prezident üsul-idarəsinə keçsin”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə aspektdən yanaşdı: “Ermənistanda növbədənkənar parlament seçkilərində Paşinyanin rəhbəri olduğu “Vətəndaş Müqaviləsi” təşkilatı qələbə caldı. Parlamentdə R.Köçəryanın "Ermənistan" bloku da yer aldı. Parlamentdə ana müxalifət olan bu qüvvələr çalışacaqlar ki, parlamentin işini pozsunlar. Ümumiyyətlə, R.Köcəryan Ermənistanda destruktiv siyasətin banisidir və onun parlamentdə olması təbii ki, siyas proseslərdə hakim partiyaya problem yaratmaqdır. Hesab edirəm ki, bu istiqamətdə o çalışacaq əlverişli bir situasiya yetişsin və hərəkətə keçsin. Ancaq “Qarabağ klanı”nın parlamentdə daim mövcudluğuna Paşinyan imkan verməyəcək. Ola bilər ki, Nikol konstitusiya dəyişikliyinə gedərək prezident üsul-idarəsinə keçsin. Hesab edirəm ki, bundan sonra Paşinyan prezident olaraq daha da hakimiyyətini möhkəmləndirib “Qarabağ klanı”nı siyasi səhnədən silər. Ancaq bundan sonra R.Köçəryanın Paşinyana qalib gəlmək şansı yoxdur. Düzdür, bir müddət Ermənistanda siyasi sabitlik kövrək olaraq qalacaq. Bu proses müəyyən müddət davam edəcək. Lakin bu, nəyisə dəyişə bilməyəcək. Çünki artıq “Qarabağ klanı”nın qatarı gedib”.
Bu səbəbdən politoloq ciddi problemlərin yaranacağını proqnozlaşdırmır.
Vidadi ORDAHALLI
