Dünyada çox nadir örnəklər tapmaq olar ki, hansısa lider müharibəni biabırçı şəkildə uduzandan sonra seçkidə böyük üstünlüklə qalıb gəlsin. O baxımdan, Nikol Paşinyan, necə deyərlər, bir “ilkə” imza atdı.
Dünənə qədər hamının “kapitulyant” dediyi şəxs bu gün hökuməti formalaşdırır. Ermənistan mediası nədənsə bu vacib sualın üzərindən şübhəli bir susqunluqla keçməyi üstün tutur. Görünür, bu sualın cavabı ermənilər üçün son dərəcə xoşagəlməz reallığı ortaya çıxardığından, özlərinə xas hiyləgərliklə yan keçməyi üstün tuturlar.
Diqqətçəkən məqam odur ki, Ermənistanda keçirilən seçkilər zamanı müxtəlif pozuntular, saxtakarlıqlar qeydə alındı və bu bərədə məlumatlar yayıldı. Müxalifəti təmsil edən siyasi qüvvələrin qərargahlarında polis axtarışlar apardı. Hətta əks düşərgəni təmsil edənlərdən saxlananlar oldu. Ancaq Qərbi təmsil edən müşahidəçilərin, beynəlxalq qurumların nümayəndələrinin səsi çıxmadı. MDB müşahidə missiyası pozuntuların olduğunu təsdiqlədi. Məsələn, MDB müşahidəçiləri missiyasının başçısı İlhom Nematov dedi ki, Ermənistanda keçirilən növbədənkənar parlament seçkilərinin gedişatında bir sıra qanun pozuntuları qeydə alınıb: “Bəzi qanun pozuntuları haqqında xəbərlər var. Hansılar ki, biz polisdən, başqa xidmətlərdən bu barədə məlumat aldıq”.
Azərbaycanda keçirilən seçkilərdə bir balaca pozuntu olanda Qərbi təmsil edən təsisatlar o dəqiqə reaksiya verir, müəyyən açıqlamalarla çıxış edirdilər. Ancaq, nədənsə, Ermənistana münasibətdə biz bunu görmədik. Baş verən pozuntuları görməzdən gəldilər. Niyə?
“Paşinyanın onlara yaxın olması da bu məsələdə müəyyən rol oynadı”
Məsələyə münasibət bildirən Demokratik Jurnalistlər Liqasının rəhbəri, media eksperti Yadigar Məmmədli Qərbin Ermənistanda seçki günü yaşanan pozuntuları görməzdən gəlməsini ikili standartlarla əlaqələndirdi: “Ermənistanda seçkilər zamanı baş verən pozuntularla bağlı qlobal media resurslarında bir sıra məlumatlar yayıldı. Qeyd olundu ki, seçkidə bir sıra qarşıdurmalar qeydə alınıb. Hətta ən yüksək səviyyədə qanun pozuntularının olması bildirildi. Ancaq çox qəribədir ki, seçki günü və ondan sonra müşahidəçilərin bununla bağlı açıqlaması olmadı. Orada baş verən qanun pozuntuları ilə bağlı münasibət sərgilənmədi. Prinsipcə, bu, bizim üçün gözlənilməz bir addım olmadı. Ona görə ki, beynəlxalq müşahidəçilər hər zaman Ermənistanda keçirilən seçkilərdə baş verən pozuntuları görməzdən gəliblər. 1999-cu ildə parlament gülləbaran edildi, amma Qərb bunu görməzdən gəldi. Ona görə də, bir növ, biz buna alışmışıq. Azərbaycan və Ermənistanda keçirilən seçkilərə münasibətdə beynəlxalq qurumlar birmənalı mövqe sərgiləmirlər. Bizə qarşı çox aqressiv olurlar və ən adi pozuntu ətrafında şou düzəldirlər. Paşinyanın Qərbə yaxın olması da bu məsələdə müəyyən rol oynadı. Pozuntuları görməzdən gəlmələri bu amillə də bağlıdır”.
Media eksperti hesab edir ki, revanşistlərin məğlub olması müsbət haldır.
Vidadi ORDAHALLI
