44 günlük Vətən müharibəsinin səsinə çevrilən “CNN türk”ün əməkdaşı Fulya Öztürk haqqında “Azərbaycanfilm”in çəkdiyi “Fulya” filmi ətrafında bəzi adını jurnalist qoyanlar çirkin kampaniya aparırlar.
Çox maraqlıdır ki, F.Öztürk haqqında sənədli filmin çəkilməsinə öz aləmlərində müsbət yanaşmayanlar əsasən şoumenlərdir. Ucuz şoular yaradıb gündəmdə qalan bu adamların ürəkbulandırıcı statusları, açıqlamaları cəmiyyət tərəfindən müsbət qəbul edilmir.
Bu günlərdə aparıcı Turan İbrahimovun “Fulya” filminin çəkilməsini “yersiz” adlandırması sosial şəbəkə istifadəçiləri və KİV-də birmənalı qarşılanmayıb, aparıcı ciddi tənqid atəşinə tutulub: “Bəli, gözəl reportyorluq keyfiyyətləri, üstəlik də yaxşı artistizmi var. Məhz artistizmidir onu xüsusi edən. Və təbii ki, həm də özünəməxsus, xoş xarici görünüşü. Demək istədiyim odur ki, Fulya xanım haqqında çəkiləcək film nədir, nə üçündür, bilmirəm, amma, məncə, yersizdir. Həm də çox yersiz…”.
“Fulya” filminin çəkilməsinin əleyhinə olanlar cəmiyyət tərəfindən ciddi tənqid atəşinə tutulublar.
“Film çəkilməsi məsələsi aprel ayında olub, amma görürsünüz ki, məsələni indi qızışdırırlar”
Siyasi şərhçi Azər Həsrət hesab edir ki, bu məsələ ətrafında müzakirə açılmasının özü düzgün deyil. “Ümumiyyətlə, F.Öztürklə bağlı açılan bu müzakirələr Azərbaycan və Azərbaycan ictimai rəyi adına çox böyük ayıbdır. Əlbəttə, cəmiyyətimizin çox böyük əksəriyyəti bu yersiz müzakirələri açanların tərəfində deyil. Böyük əksəriyyət F.Öztürkü 44 günlük müharibə günlərindən və ondan sonrakı günlərdən yaxşı xatırlayır. Fulya bir əfsanəyə çevrilmişdi. Gənc bir xanım bütün cəsarəti ilə müharibənin od-alovu içində idi. Yəni ən operativ, ən doğru xəbərləri, sadəcə, Azərbaycana və Türkiyəyə deyil, bütün dünyaya yayırdı. Əslində, Azərbaycanın informasiya müharibəsini udmasının nəfərlərindən biri də məhz F.Öztürk olub. Yəni, əlbəttə, kiminsə durub onun fəaliyyətinə yanakı baxması doğru deyil. Bəzi jurnalistlərimizin də “mənə imkan yaradılsaydı, onu edərdim, bizə şərait yaradılsaydı, bunu edərdik” deyib çox aşağı və cılız düşüncələr paylaşmasını anlaya bilmirəm. Birincisi, kimin əlləri tutulmuşdu, kimə mane olunurdu ki, informasiya yaymasın? Şəxsən mən Xaçmazın Dədəli kəndində oturub informasiya yayımı ilə məşğul idim, amma Fulya kimi bomba altında işləmirdim. Təbii ki, film çəkilirsə, mənim haqqımda deyil, məhz Fulya haqqında çəkilməlidir. Yəni mənim də xidmətim var, amma müqayisə etmək istəyiriksə, təbii ki, Fulyanın xidməti qat-qat bizdən artıqdır. İkincisi, bəziləri deyirlər ki, bizə şərait yaradılsaydı, biz də yazıb pozardıq. Mən də deyirəm, sizin yazdığınızı maksimum 1000 adam oxuyacaqdı, 1000 nəfər seyr edəcəkdi, lap 100 min nəfər, amma F.Öztürkün yayımladığını 10 milyonlarla insan izləyib. Biri var “CNN türk” üzərindən yayım ola, biri də var hansısa internet televiziyası, hansısa blok, hansısa sosial media hesabı üzərindən”.
A.Həsrətin sözlərinə görə, hətta bəziləri deyirlər ki, bizi dövlətimiz ora buraxmadı gedib orada informasiya məsələsində öz töhfələrimizi verək. A.Həsrət qeyd etdi ki, ora döyüş meydanı idi və oradakı jurnalistlər əsgərlərlə birgə hərəkət etməyiblər. “Fulya da mümkün olan yerlərdə, yəni hamıya necə icazə verilibsə, oralarda çəkiliş aparıb və orada operativliyi, həssasiyyəti ilə seçilib, fərqlənib, siz də seçilib fərqlənəydiniz. Yəni, bilirsiniz, bu olduqca cılız, olduqca aşağı səviyyəli, paxıl insanların Fulyanın qəhrəmanlığına yanaşmasıdır. Hesab edirəm ki, bu təsadüfi deyil, bunun arxasında Rusiyanın, İranın, Ermənistanın xüsusi xidmət orqanları dayanırlar. Yəni onlar bunu məqsədli şəkildə edirlər. Film çəkilməsi məsələsi aprel ayında olub, amma görürsünüz, məsələni indi qızışdırırlar. Nəyə görə? Ona görə ki, Şuşa Bəyannaməsi imzalandı. Ona görə ki, Azərbaycanla Türkiyənin can bir qəlb olması daha çox vacib bir sənədlə möhürlənmiş oldu. Və əleyhdarlarımız, bizə qarşı olanlar bu məqamda Fulya haqqında filmin müzakirəsini bu cür təşkil etməklə ortalığı soyutmaq istəyirlər. Amma çaşıblar, aldanırlar, özlərini aldadırlar. Azərbaycan ictimai rəyi görürsünüz ki, son günlər həmin adamların cavabını necə verir. Yəni biz kimin kim olduğunu, kimin nə ilə məşğul olduğunu çox yaxşı bilirik. Heç bir dəftərdə, kitabda adı olmayanları sosial mediada görürəm, yekə-yekə paylaşımlar edirlər ki, “mən ondan daha çox iş görmüşəm, mən daha güclü jurnalistəm, on illərdir bu işlərlə məşğulam”. Mən Azər Həsrət beynəlxalq səviyyədə jurnalistikanın içində olan və onu izləyən bir adamam, amma yekə-yekə danışanların heç birinin adına qəzetdə, jurnalda, agentlikdə rast gəlmirəm. Siz bu onillərdə harada nə etmisiniz? Niyə biz onu görə bilmirik? F.Öztürkü mən şəxsən tanımıram, heç müharibəyə qədər onu tanımırdım da, lakin görürsünüz ki, bir anın içində parıldadı, diqqətimizi çəkdi, biz onu gördük. Bu o demək deyil ki, başqalarını görmədik, başqalarını da gördük. Amma o çox seçildi. Üstəlik də bu film, elan ediliyi kimi, Fulya haqqında deyil, bu film ermənilərin Qarabağda törətdikləri haqdadır, sadəcə olaraq, bu jurnalist bir obraz olaraq, o günləri yaşamış bir şəxs olaraq filmdə rol alıb. Yəni bir hadisə şahidi kimi. İndi o hadisələrdə o şahidlik edir. Bunun yayımları, bunun paylaşımları diqqəti cəlb edib. Onun televiziya ekranından verdiyi canlı yayımları dünya görüb. Özü də “CNN türk”dən. “CNN” dünyanın hər tərəfində izlənilən bir kanaldır. “CNN türk” də həmin o “CNN”in bir filialıdır. Yəni bu, qlobal bir səviyyədə bizm üçün informasiya yayıb, siz hansısa “it dəftərində adı olmayan” bir qəzetin müxbirisiniz, düşübsünüz ortalığa ki, “mənim də xidmətlərim varmış”. Sənin xidmətlərin hara, “CNN türk”ün xidmətləri hara? Yəni adamlar çox cılız yanaşırlar” - deyə A.Həsrət qeyd etdi.
İradə SARIYEVA
