Ermənistanın baş naziri vəzifəsini müvəqqəti icra edən Nikol Paşinyanın rəhbərlik etdiyi “Vətəndaş müqaviləsi” partiyası növbədənkənar parlament seçkilərində qalib gəlib. Bununla Nikol Paşinyanın “Vətəndaş müqaviləsi” partiyası bütün proqnozları alt-üst etməyi bacarıb.
Məsələ burasındadır ki, belə bir nəticə gözlənilmirdi və proqnozlarda faiz dərəcələri çox aşağı idi. Lakin Ermənistan Mərkəzi Seçki Komissiyasının (MSK) bütün 2008 seçki məntəqəsindən əldə olunmuş bülletenlərin sayılması əsasında açıqladığı hesabatda bildirilir ki, 1 milyon 281911 bülleten sayıldıqdan sonra Nikol Paşinyanın partiyasının 53,92% (687 251 seçici), keçmiş prezident Robert Köçəryanın rəhbərlik etdiyi “Ermənistan” blokunun isə 21,04% (268 165 seçici) səs topladığı təsdiqlənib. Sabiq prezident Serj Sarkisyana bağlı “Şərəf duyuram” bloku 5,23% (66 633 seçici), “Çiçəklənən Ermənistan” partiyası isə 3,96% (50 416 seçici) seçicinin dəstəyini qazanıb. “Parlaq Ermənistan” – 1,22% (15 557 seçici), Erməni Milli Konqresi – 1,54% (19 647 seçici) səslə onların ardınca gəlir. Mərkəzi Seçki Komissiyasının rəhbəri Tiqran Mukuçyan bildirib ki, Ermənistanda keçirilən növbədənkənar parlament seçkilərində seçici iştirakı 49,4% təşkil edib. Seçkilərdə ümumilikdə 25 siyasi təşkilat iştirak edib. Əsas mübarizə Nikol Paşinyanın "Vətəndaş müqaviləsi" partiyası ilə "Ermənistan" blokunu formalaşdırmış Robert Köçəryan arasında gedib. Partiya blokları üçün keçid baryeri 7%, partiyalar üçün 5% təşkil edir. O da qeyd edilir ki, Paşinyanın hökuməti formalaşdırması üçün 0,08 səsi çatmayıb. Lakin yekun nəticələr səsvermə günündən sonra yeddinci gün ərzində açıqlanmalıdır. Həmin vaxta qədər Paşinyan ona lazım olan 54%-i təmin edə bilər. Amma bunsuz da Paşinyan hökuməti formalaşdıra biləcək. Çünki nəticələr göstərir ki, Ermənistan parlamentində cəmi iki siyasi qüvvə təmsil olunacaq. Bunlar “Vətəndaş müqaviləsi” partiyası və “Ermənistan” blokudur. Serj Sarkisyana bağlı “ Şərəf duyuram” bloku 5,23% səs topladığından parlamentdə təmsil oluna bilməyəcək. Çünki bloklar üçün seçki baryeri 7 faizdir. Beləliklə, proporsional seçki sisteminin qaydalarına görə, belə olan halda parlamentdəki yerlərin üçdə ikisinə yaxını Paşinyanın partiyasında olacaq. Paşinyan özünün “Facebook” səhifəsində bu xüsusda bildirir ki, rəhbərlik etdiyi “Vətəndaş müqaviləsi” partiyası ölkənin yeni parlamentində konstitusiya çoxluğuna sahib olacaq: “MSK tərəfindən yayımlanan ilkin seçki nəticələrinə görə, “Vətəndaş müqaviləsi” partiyası yeni seçilmiş parlamentdə konstitusiya çoxluğuna sahib olacaq (105 deputatdan ən azı 71 nəfər ) və mənim rəhbərliyim altında hökumət quracaq”. Onun sözlərinə görə, 105 mandatdan azı 71-nə sahib olacaqlar.
Onu da qeyd edək ki, Ermənistanda növbədənkənar parlament seçkiləri ikinci Qarabağ müharibəsində rüsvayçı məğlubiyyətdən sonra uzun müddət davam edən daxili ictimai-siyasi böhran fonunda keçirilib. Seçkilərdə bir sıra qanun pozuntuları, hətta silahlı insident qeydə alınıb. Ermənistanın Baş Prokurorluğu quruma seçki pozuntuları ilə bağlı 319 məlumatın daxil olduğunu açıqlayıb. Öz növbəsində, İstintaq Komitəsi də xeyli sayda qanun pozuntusunun aşkarlandığını bildirib. Seçkilərdə qeydə alınmış qanun pozuntuları ilə əlaqədar bir neçə cinayət işi qaldırılıb. Ölkə müxalifəti seçkilərin nəticələri ilə razılaşmadığını bildirib. Robert Köçəryanın rəhbəri olduğu “Ermənistan” blokunun bəyanatında deyilir: “Bütün problemli məsələlər aydınlaşdırılmayınca və şübhələrə son qoyulmayınca seçkilərin nəticələrini qəbul etməyəcəyik”. Blokdan bildirilib ki, növbədənkənar parlament seçkilərinin dərc edilmiş nəticələri olduqca ziddiyyətlidir və etimada səbəb olmur: “Onlar ictimai həyatın (hansıların ki, 8 ay ərzində şahidi olduq) müxtəlif təzahürləri ilə, sorğuların nəticələri, həmçinin beynəlxalq sorğularla, eləcə də sağlam düşüncə ilə kəskin ziddiyyət təşkil edir”. Müxalifət qüvvələrinin təşviqat kampaniyasının gedişatında keçirilmiş izdihamlı mitinqləri və hakimiyyət orqanları tərəfindən keçirilmiş kiçik tədbirlər zamanı etimad böhranı tamamilə fərqli ictimai hisslərin mövcudluğunu göstərib: “Etimadsızlığın ən ciddi əsası seçki günü müxtəlif seçki məntəqələrindən gələn yüzlərlə siqnaldır ki, bu da seçki nəticələrinin sistemli, əvvəlcədən planlaşdırılan saxtalaşdırılmasına şahidlik edir. “Ermənistan” bloku iddia edilən pozuntularla bağlı dərhal dərin və əsaslı bir araşdırma aparmaq vəzifəsini qaldırır”. Paşinyan isə qeyd edir ki, seçkilərdə nəticələrə təsir edə biləcək ciddi pozuntular qeydə alınmayıb. Xatırladaq ki, Paşinyan seçki kampaniyası zamanı öz rəqiblərini və “inqilab işini əngəlləyənləri” əzmək üçün xalqdan “dəmir mandat” istəmişdi. “Dəmir mandat” dedikdə o, səslərin azı 60 faizini almağı nəzərdə tuturdu. “Vətəndaş müqaviləsi” partiyasının böyük fərqlə irəlidə olduğu bəlli olandan sonra Paşinyan tərəfdarlarını ona “polad mandat”ın təhvil verilməsi mərasiminə dəvət edib: "2018-ci ildə "məxməri inqilab" etdik və indi xalq bizə "polad mandat" verdi, bu isə bizim "polad inqilab" etdiyimizi göstərir”. Beləliklə, Paşinyan qələbədən cuşa gələrək artıq dəmir yox, polad mandatdan bəhs edir. Paşinyan onu da qeyd edir ki, bundan sonra Avrasiya İttifaqı və KTMT ilə əlaqələri yaxşılaşdırmaq, inkişaf etdirmək niyyətindədir. O, Ermənistanın bundan sonra da KTMT və Avrasiya İttifaqı istiqamətində irəliləyəcəyini bildirib. Paşinyan erməni xalqına dəstəyə görə Rusiya prezidenti Vladimir Putinə və baş nazir Mixail Mişustinə minnətdarlıq edib. Ardınca Fransa prezidenti Emmanuel Makrona, ABŞ prezidenti Cozef Baydenə, Avropa Komissiyasının rəhbəri Şarl Mişelə, qonşu ölkələrdən İran prezidenti Həsən Ruhaniyə, Gürcüstan baş naziri İrakli Qaribaşviliyə təşəkkür edib. Lakin ekspertlər qeyd edir ki, seçkilərin nəticələrini tanımayan müxalifət etirazları davam etdirərək Ermənistanda vətəndaş müharibəsini başlada bilər.
Nahid SALAYEV
