Rusiyanın xarici işlər naziri Sergey Lavrov Azərbaycanda Türkiyə hərbi bazasının yerləşdirilməsinə dair hər hansı müzakirələr aparılmadığını deyib. Rusiya KİV-ləri xəbər verir ki, Lavrov bu haqda belaruslu həmkarı Vladimir Makeylə keçirdiyi brifinq zamanı jurnalistlərdən birinin sualına cavab olaraq danışıb:
“Biz bu məsələni müzakirə etməmişik və ümumiyyətlə, şayiələri şərh etmirik”.
Rusiya xarici siyasət idarəsi rəhbərinin ardınca Kreml də Türkiyə hərbi bazalarının Azərbaycanda yerləşdirilməsi ilə bağlı şayiələrə münasibət bildirib.
Rusiya Prezidentinin mətbuat katibi Dmitri Peskov deyib: "Rusiya Azərbaycanda Türkiyə hərbi bazasının yaradılması haqda məlumatları diqqətlə izləyir".
Azərbaycanda Türkiyə hərbi bazasının yerləşdirilməsinin mümkünlüyü haqda prezident Rəcəb Tayyib Ərdoğan Bakıdan dönərkən təyyarədə türkiyəli jurnalistlərlə söhbətində danışmışdı. Jurnalistlərdən biri Şuşa Bəyannaməsi barədə soruşaraq xatırlatmışdı ki, Azərbaycanda Türkiyə hərbi bazasının yerləşdirilməsinə dair gözləntilər var. Ərdoğan isə bildirmişdi ki, Şuşa Bəyannaməsi bunu istisna etmir. “Bu variant (bazanın yerləşdirilməsi) Şuşa Bəyannaməsinin çərçivələri kənarına çıxmır. Məsələnin bu yöndə inkişafı mümkündür. Bu mövzu Azərbaycan Prezidenti İlham Əliyevlə Rusiya Prezidenti Vladimir Putin arasındakı sonrakı məsləhətləşmələrdə də öz inkişafını tapa bilər”.
Şuşa Bəyannaməsi Azərbaycanla Türkiyə arasında, o cümlədən hərbi müttəfiqliyi möhkəmləndirən sənəddir və orada nəzərdə tutulur ki, tərəflərdən biri üçüncü ölkənin hücumuna məruz qalsa digərinə hərbi dəstək verəcək.
Rəsmi Moskvanın Türkiyənin Azərbaycanda baza yaratmaq kimi istəyinə belə sərt reaksiya verməsi nə ilə bağlıdır?
“Mövcud vəziyyətdə Türkiyənin hərbi bazasının ölkəmizdə yerləşdirilməsi zərurəti hiss edilmir”
Politoloq Yeganə Hacıyeva “Bakı-Xəbər”ə açıqlamasında bildirdi ki, Türkiyənin Cənubi Qafqazda bir NATO ölkəsi kimi mövcudluğu, ata biləcəyi addımlar barədə dünya mediasında çeşidli məqalələr yazılır: “Türkiyənin Azərbaycanla hərbi əməkdaşlıq sahəsində atdığı addımlar maraqla izlənilir. Rusiyadakı erməni lobbisinin təsiri altında olan media şəbəkəsi bu mövzunu tam fərqli aspektlərdə qabardaraq, Rusiya ilə Azərbaycanın münasibətlərini korlamağa çalışır. Reallıq budur ki, Türkiyə ilə Azərbaycan arasında hərbi əməkdaşlıq mövcuddur. Bunun mediaya bəlli olmayan tərəfləri də var. 44 günlük müharibədən sonra biz Cənubi Qafqazda yeni reallıqlar yaratmışıq. Rusiya mövcud şərtlər altında regionda sülhün qalmasını istəyir. ABŞ cüzi dəyişikliklərlə sülhün qalmasını istəyir. Türkiyə ilə bizim mövqeyimiz eynidir. Biz də sülhün davamlılığını istəyirik. Azərbaycan Konstitusiyası Qoşulmama prinsipinə uyğun tərtib edilib. Burada hər hansı xarici ölkənin hərbi bazasının olmasını qəbul etmir. Bu, Konstitusiyanın nəzəri hissəsidir. Reallıq ondan ibarətdir ki, bu gün Qarabağda üçüncü bir ölkənin hərbi mövcudluğu var. Sülhməramlı adı ilə Rusiya ora öz kontingentini yerləşdirib. Mövcud vəziyyətdə Türkiyənin hərbi bazasının ölkəmizdə yerləşdirilməsi zərurəti hiss edilmir. Ancaq belə bir zərurət yaranarsa, bu mümkündür. Rusiya, təbii ki, bunu istəməz. Çünki bu, faktiki olaraq, NATO-nun onun sərhədlərinə yaxınlaşması anlamına gəlir. Buna görə də Rusiyanın narahatlığı başadüşüləndi”.
Məhəmmədəli QƏRİBLİ
