Bir vaxtlar Moskvaya xüsusi yaxınlığı ilə seçilən separatçı Samvel Babayan Qarabağdakı məğlubiyyətə görə birbaşa Rusiyanı ittiham edib. Babayan Rusiyanı hələ Paşinyanın hakimiyyətə gəlişindən əvvəl sifariş edilmiş “Tor” zenit-raket komplekslərinin təchizatını qəsdən gecikdirməkdə günahlandırıb.
Üstəlik, bildirib ki, 44 günlük müharibənin şiddətli vaxtında, Azərbaycan Ordusunun Şuşaya doğru irəlilədiyi günlərdə Rusiya 102-ci bazanın arsenalından Ermənistan ordusuna “Buk-M1” zenit-raket kompleksləri verməyə hazır olduğunu bildirib. Amma məlum olub ki, bu komplekslərin çoxu xarabdır: “Erməni mütəxəssisləri “Tor”ları çarə kimi təqdim etmişdilər və siyasi rəhbərlik razılaşmışdı, pulların bir hissəsi əvvəlcədən ödənilmişdi. Müharibə başlayanda 6 “Tor” kompleksi artıq Qarabağda idi və daha 18-nin, yaxud 24-nün gətirilməsi gözlənilirdi. Lakin həmin 6 kompleksdən 4-nü müharibənin ilk saatlarındaca Azərbaycanın pilotsuz aparatları məhv etdi”.
Babayan daha sonra deyib ki, Rusiya əvvəlcədən sifariş edilmiş “Tor” zenit-raket komplekslərinin qalanlarının çatdırılmasını qəsdən ləngidirdi. O xatırladır ki, oktyabrın 26-da və 27-də fəal danışıqlar gedirdi, Azərbaycan tərəfi bildirirdi ki, Şuşanı azad edənə qədər dayanmaq niyyətində deyil. Ona görə də Babayanın fikrincə, Rusiya zenit-raket komplekslərinin təchizatını ləngitməklə vaxtı uzatmaq istəyirmiş: “Kim Paşinyanı ittiham edirsə ki, niyə müharibəni dayandırmayıb, bilsin, müharibənin dayandırılması Paşinyandan asılı deyildi. Hesab edirəm ki, müttəfiq pulu əvvəlcədən ödənilmiş silahları vaxtında verməliydi, amma bunu qəsdən etmədi, bizim uduzmağımız üçün. Ona görə də mən təklif edirəm ki, müttəfiqlə “yol xəritəsi” tərtib edilsin və bənd-bənd orada izah olunsun ki, onlardan hansı halda nə gözləməliyik və yenidən kürəyimizdən zərbəni nə vaxt alacağımızı bilməliyik”.
Hətta Moskvaya yaxın separatçının Rusiyanı indiki məqamda açıq ittiham etməsi nə deməkdir?
“Elə bilirdilər ki, Rusiya dövləti bunların arxasında "dağ kimi" dayanacaq”
Sözügedən məsələ ilə bağlı fikirlərini “Bakı-Xəbər”lə bölüşən AMİP-in sədr müavini Afsəddin Nəbiyev buna bir neçə aspektdən yanaşdı: “Samvel Babayan Azərbaycanın ərazi bütövlüyünə qəsd edən “Daşnaksütyun” partiyasının fəallarından biri olub. Eyni zamanda, Laçın və Şuşanın işğal olunmasında əsas həmlə dəstələrinə rəhbərlik edib. Sonralar separatçı rejimin hərbi rəhbərliyində olub. Bir vaxtlar Rusiyanın dəstəyilə Azərbaycanda dinc insanları qətl edərək, evindən məcburi köçkünə çevirən terrorçu acı bir məğlubiyyətdən sonra Rusiyanı ittiham edir. Açığı babayanlar elə düşünürdülər ki, işğala məruz qoyduqları Azərbaycanın ərazilərini həmişəlik əllərində saxlayacaqlar. Rusiya dövləti də bunların arxasında "dağ kimi" dayanacaq. Separatçıların gözləntiləri puç olduğu üçün Kremli ittiham edirlər. Bir həqiqəti dərk etmirlər ki, müasir dövrdə bütün dünya tərəfindən bütövlüyü tanınmış ərazinin işğalı qəbulolunmazdır. Erməni millətçiləri, ümumiyyətlə, mifoloji təfəkkürdən qidalanmaqla tamamilə reallıq hisslərin itirmiş bir cameədir. Dünyada silahlanma ilə bağlı beynəlxalq hüquqi normativ sənədlər mövcuddur. Hər bir ölkə bu normativ sənədlərə imza atır. Ermənistan kimi dövlətlər kütləvi insan tələfatına səbəb olan silahları Rusiyadan almağı düşünürlərsə, yanılırlar. Rusiyanın Ermənistana qanunsuz olaraq verdiyi raketlər hələ bu gün də müzakirə mövzusudur. Biz bu məsələni hər zaman diqqətdə saxlayacağıq. Bu gün Rusiya başa düşür ki, Ermənistan onun baş ağrısına çevrilib. Ona görə də Babayanın nə deməsindən asılı olmayaraq, Azərbaycan öz milli təhlükəsizliyini, ərazi bütövlüyünü qoruyub möhkəmləndirmək üçün öz yoluna davam etməlidir. Biz həm də bu gün çalışmalıyıq ki, separatçı babayanları həbs edərək ədalət məhkəmələrinə çıxaraq. Onların etdikləri cinayətlər cəzasız qalmasın”.
Sədr müavini onu da qeyd etdi ki, qarşı tərəf məğlubiyyətə məhkumdur.
Vidadi ORDAHALLI
