Ölkəmizə səfərdən Türkiyəyə qayıdan Prezident Racəb Tayyip Ərdoğan Azərbaycanda Türkiyə hərbi bazalarının yaradılmasını istisna etməyib. Jurnalistlərin "Şuşa Bəyannaməsi daxilində hərbi bazaların yaradılması mümkündürmü, Şuşa Bəyannaməsi hərbi bazanı əhatə edirmi" sualına cavabında cənab Ərdoğan "...Bu, açıqladığımız maddələrin xaricində deyil" deyib. Prezident daha sonra bildirib ki, burada daha sonra inkişaf, genişlənmə ola bilər. “Hələ ki, xüsusilə sərhəd xətlərinin təminat altına alınması əsas olandır"- o deyib.
Ancaq Ərdoğan qeyd edib ki, "Xüsusilə cənab İlham Əliyevin Putinlə keçirəcəyi görüşlər bu məsələni fərqli məcrada inkişaf etdirə bilər”.
Qeyd edək ki, çərşənbə axşamı Azərbaycan və Türkiyə prezidentləri tərəfindən imzalanan Şuşa Bəyannaməsində sənədi imzalamış tərəflərin hər hansı biri üçüncü dövlətin təhdid və ya təcavüzünə məruz qalacağı təqdirdə, birlikdə hərəkət edəcəyi qeyd olunur.
Bəyannamədə tərəflərin "iki qardaş ölkənin silahlı qüvvələrini müasir tələblərə uyğun" modernləşdirmək üçün birgə səylərini davam etdirəcəyi qeyd olunub.
Türkiyənin Azərbaycanda hərbi baza açmaq istəyi reallaşa bilərmi?
Politoloq Tofiq Abbasov “Bakı-Xəbər”ə bildirdi ki, bu mövzu gündəmdə olduğu üçün müxtəlif mülahizələr irəli sürülür: “Artıq Rusiya mətbuatında da bənzər yazılara rast gəlinir. Azərbaycanda keçirilən görüşlərdə biz oxşar açıqlamaya rast gəlmədik. Şuşada da buna işarə sayılacaq bir eyham olmadı. Bizim qardaş ölkə ilə hərbi-texniki əməkdaşlığımız elə yüksək səviyyədədir ki, heç hərbi bazaya ehtiyac qalmır. Həm də bunun üçün Azərbaycan Konstitusiyasına dəyişiklik olunmalıdır. Çünki mövcud Konstitusiyanın müddəaları buna imkan vermir. Belə bir niyyət vardısa, bu barədə İlham Əliyev də danışardı. Ola bilsin ki, Ərdoğan bu fikri hansısa kontekstdə düşmən qüvvələrə ünvanlanan ismarıc kimi işlədib. Ərdoğan Brüsseldə olduğu zaman Qarabağ mövzusunu gündəmə gətirdi. Bildirdi ki, Türkiyə ilə Azərbaycan birgə səylərilə regionda sülhə və əminamanlığa töhfə vermək istəyirlər. Biz Türkiyənin Azərbaycana göstərdiyi mənəvi dəstəyi 44 günlük müharibə dönəmində gördük. Hələ ki, elə bir təhdid yoxdur ki, Türkiyənin bazasına ehtiyac yaransın. Qardaş ölkənin bölgədə hərbi mövcudluğu artıq var. Birgə Monitorinq Mərkəzində türkiyəli hərbçilər xidmət keçirsə, bu elə sülhməramlı qismində mövcudluq deməkdir. Türkiyənin hərbi bazalarının konkret olaraq Azərbaycanda qurulması ilə bağlı məsələ gündəmdə yoxdur. Ola bilsin ki, Türkiyə prezidenti ehtimal kimi bunu bildirib. İstənilən halda, Türkiyə formalaşan yeni konfiqurasiyada var. Hər hansı xarici qüvvənin Azərbaycana təhdidi olarsa, Türkiyə söz sahibliyi hüququndan istifadə edib öz müdaxiləsini edə bilər”.
Məhəmmədəli QƏRİBLİ
