Ermənistanda 21 iyun qırğınına hazırlıqlar başladı, tərəfdarları Köçəryana Paşinyanın çəkicinə qarşı oraq hədiyyə etdi...

img

Bu bazar Ermənistanda keçiriləcək parlament seçkiləri sözügedən ölkənin gələcəyinin müəyyən edilməsində mühüm əhəmiyyət kəsb edəcək. Amma o da artıq birmənalı həqiqətdir ki, seçkidən sonra ölkədə ciddi qarşıdurma ehtimalı, hətta vətəndaş müharibəsinin olması belə istisna deyil. Çünki qalib gələn siyasi qüvvə güc yolu ilə rəqibini əzməkdə israrlıdır.

Ermənistanın baş naziri əvəzi Nikol Paşinyan bu fonda bildirir ki, 1 mart 2008-ci ildəki hadisələr Ermənistandakı parlament seçkisindən sonra təkrarlanmayacaq: “Bu ssenari istisna edilir. Bir neçə səbəbi var. Əvvəla, 2008-ci il prezident seçkisi saxtalaşdırılmışdı. İndi nəticələrə təsir ola bilməz. Vətəndaşların mövqeyi səsvermənin nəticəsində əks olunacaq”. O, həmçinin, seçkidə 60% səs toplayaraq qalib gələcəyini deyib. Amma maraqlıdır ki, Ermənistanda səsvermə günü yaxınlaşdıqca seçkiqabağı proseslərlə bağlı bir sıra qanunsuz əməllər həyata keçirilir və opponentlər bir-birinin qanunazidd proseslərdə iştirakını böyük həvəslə ifşa edirlər. Elə  bu günlərdə Ermənistan ictimaiyyəti seçki ilə bağlı daha bir biabırçı hadisənin şahidi olub. Belə ki, Xankəndi və ətraf yaşayış məntəqələrdə məskunlaşan ermənilər arasında namizədlər lehinə təbliğat aparmaq məqsədilə operativ qrupların yaradıldığı məlum olub. Bildirilir ki, yaradılan hər iki qrupa rəhbərlik edənlər Daxili İşlər Nazirliyinin ştatda olan əməkdaşlarıdır. Robert Köçəryanın xeyrinə təbliğat aparan qrupa rəhbərlik edənlər A.Kzoyan və R.Dərmirçiyan soyadlı polis əməkdaşlarıdır. Paşinyanın seçki kampaniyasına isə polis əməkdaşları Narek Mişyan və Styopa Azoyan başçılıq edir. Seçiciləri cəlb etmək üçün sakinlərə 15 mindən – 250 min dramadək pul təklif olunur. Artıq hər iki qrup arasında qarşıdurmalar baş verdiyi də ortaya çıxıb. Hətta vəziyyət o həddə çatıb ki, həddən çox canfəşanlıq edən və yüksək “operativlik” nümayiş etdirən qrupun bir üzvünü sakit durması üçün silahla hədələyiblər. Tərəflərin bir-birini qarşılıqlı şəkildə ifşa etməsi nəticəsində seçicilər üçün ayrılan külli miqdarda vəsaitin müəmmalı şəkildə yoxa çıxdığı da məlum olub. Bundan başqa, Paşinyanın inzibati resurslardan faydalanmasına dair də məlumatlar artır. Belə ki, İrəvanın Respublika meydanında "Vətəndaş müqaviləsi" Partiyasının başçılıq etdiyi Nikol Paşinyanın seçkiqabağı mitinqi keçirilib .Qeyd edilir ki, hakimiyyət orqanları müəssisələrinin əksəriyyətinin işçilərini mitinqə gəlməyə məcbur ediblər. Bununla da dövlət orqanları inzibati resurslardan maksimum istifadə edib. Eyni zamanda, aksiyaya xeyli sayda mülki geyimli polis əməkdaşı cəlb olunub. Media Paşinyanın öz təhlükəsizliyi üçün hətta snayperlərdən də istifadə etdiyini vurğulayıb. Burada da Paşinyan rəqöblərini yenə çəkiclə hədələyib. Bu fonda Ermənistanın keçmiş prezidenti Serj Sarkisyan Paşinyanın parlament seçkisi öncəsi siyasi opponentlərinə çəkic göstərməsini pisləyib. Sarkisyan rəhbərlik etdiyi blokun istənilən zorakılığa sərt müqavimət göstərəcəyini bildirib. Bundan əvvəl Sarkisyan Ermənistanın şimalındakı Vanadzor şəhərində apardığı seçki kampaniyasında Paşinyanı hakimiyyətdə qalmaq naminə vətəndaş müharibəsi başlatmağa hazır olmaqda ittiham etmişdi.

Nikol Paşinyan isə son günlərdə keçirdiyi mitinqlərdə əlindəki çəkici yelləməklə çıxış edir. Belə ki, Paşinyan bir neçə gün əvvəl tərəfdarlarından birinin ona verdiyi çəkiclə dolaşaraq, seçkilərdə qalib gələndən sonra müxaliflərin başını çəkiclə əzməklə hədələyir. Bundan əvvəl isə o, rəqiblərini asfaltda sürüməklə qorxutmağa çalışırdı. O bəyan edir ki, çəkic hakimiyyətin əldə edəcəyi “polad mandatı” simvolizə edir: “Seçkidən dərhal sonra sizin üçün gələcəyik. Sonra deməyin ki, sizə xəbərdarlıq etməyiblər”.  Sarkisyan Vanadzorda keçirdiyi mitinqdə buna cavab olaraq deyib: “Onun əlində nə olduğunu görürsünüz, eləmi? Məncə o istəyir ki, kimsə bu çəkici onun əlindən alıb başına vursun. Bəlkə ondan sonra bunun nə olduğunu başa düşər”. Keçmiş prezident bildirib ki, onun komandası Paşinyanın hədələrindən qorxmur: “Mən görüşlərimdən birində demişdim ki, biz onun “polad inqilabına” daha bərk metaldan hazırlanmış qalxanla cavab verməli, o biri əlimizdə isə bizə çəkiclə yaxınlaşanların başına vurmaq üçün dəyənək saxlamalıyıq. Başqa yol yoxdur. Nə edə bilərik ki...”. Paşinyanın rəqiblərini əlində çəkic yelləyib hədələdiyi bir vaxtda keçmiş prezident Robert Köçəryanın Vardenisdə seçicilərlə görüşü zamanı iştirakçılardan biri ona oraq hədiyyə edib. Həmin şəxs bildirib ki, oraq və çəkic haqda hamıya məlumdur. Çəkic sındırmaq, vurub dağıtmaq alətidir, oraq isə kənd təsərrüfatı alətidir:  “Mən çəkicə qarşı oraq gətirmişəm. Onu sizə bağışlayıram ki, kənd təsərrüfatını bərpa edəsiniz, siyasi alaq otlarını biçəsiniz”. Köçəryan orağı götürüb, etiraf edib ki, aləti görəndə əvvəlcə qorxub. “Onu təyinatı üzrə istifadə etməyə söz verirəm”. Bundan əvvəl Köçəryan demişdi ki, Paşinyanın çəkicinə cavab olaraq əlinə hansısa alət almağa hazırlaşmır, çünki onun yumruğu çəkic kimi möhkəmdir. Məhz bu vəziyyətdə postseçki dövründə qarşıdurmalar istisna olunmur. Görünür, elə bu səbəbdəndir ki, ABŞ-ın Ermənistandakı səfirliyi Birləşmiş Ştatlar vətəndaşlarını qarşıdakı 2 həftə ərzində ehtiyatlı olmağa, ayıq-sayıqlıq nümayiş etdirməyə çağırıb. Səfirliyin xəbərdarlığında deyilir ki, Ermənistandakı ABŞ vətəndaşları qarşıdakı 2 həftə ərzində ehtiyatlı olmalı, insanların toplaşdığı yerlərdən uzaq durmalı və yaxınları ilə əlaqəni kəsməməlidir. Bu xəbərdarlıq iyunun 20-də keçiriləcək parlament seçkiləri ilə bağlıdır və səfirlik seçkisonrası iğtişaşları istisna etmir. Bundan əvvəl Ermənistanda seçkisonrakı toqquşmalar barədə keçmiş prezidentlər Robert Köçəryan və Levon Ter-Petrosyan da xəbərdarlıq edib. Seçki kampaniyası zamanı Nikol Paşinyan və onun əsas rəqibləri arasında çox sərt ritorika hökm sürməkdədir, tərəflər bir-birinə divan tutmaqla hədələyir.

Nahid SALAYEV

 

Son xəbərlər