Köçəryan Paşinyana hücumları gücləndirir və Rusiyanın "qucağına" daha çox düşür…

Elşən Mustafayev: “Bu heç də o anlama gəlmir ki, Rusiya Köçəryana yaşıl işıq yandıracaq”

img

Ermənistanda seçki kampaniyasının başa çatmasına üç gün qalmış keçmiş prezident Robert Köçəryan rəqibi Nikol Paşinyana hücumları artırmaqla yanaşı, Rusiyaya ünvanlanmış açıq mesajlar da verir. Məsələn, o bildirir ki, Rusiyanın Ermənistandakı hərbi iştirakını gücləndirmək lazımdır. Bir gün əvvəl isə Köçəryan Ermənistandakı “Soros şəbəkəsinin” fəaliyyətinin dayandırılacağını demişdi.

Seçicilərlə görüşündə Köçəryan bildirib ki, qarşıda həm Ermənistanın müharibədə məğlub olmuş ordusunu bərpa etmək, həm də Rusiyanın hərbi iştirakını “daha müasir” hala gətirmək vəzifəsi dayanır. Onun fikrincə, buna nail olmaq mümkündür və lazımdır. Xüsusən də regiondakı proseslərin inkişafını nəzərə alanda.

Köçəryan Türkiyə prezidenti Rəcəb Tayyib Ərdoğanın Bakıda sülh, əməkdaşlıq, o cümlədən Rusiya və İranın da iştirak etdiyi 3+3 formatında regional əməkdaşlıq çağırışları etdiyi bir vaxtda regionda baş verənləri Türkiyə-Rusiya geosiyasi qarşıdurması kimi qələmə verməyə çalışıb:

“Biz Türkiyənin regionda artan rolunu görürük. Xəritəyə baxanda aydın olur ki, Türkiyənin ekspansiyası üçün yeganə çəkindirici amil Rusiyadır. Bundan çıxış edərək, biz Rusiya ilə onun burada hərbi iştirakını gücləndirmək üçün çox ciddi proses başlatmalıyıq. Lakin ölkənin güclənməsi təkcə Rusiyanın hərbi iştirakı ilə şərtləndirilməli deyil”. Bundan əvvəl isə Köçəryan Ermənistanda şərti olaraq “Soros şəbəkəsi” adlandırılan vətəndaş cəmiyyəti institutlarını təhlükə adlandırmışdı və bildirmişdi ki, hakimiyyətə gələndən sonra onların fəaliyyətini dayandıracaq. Aydındır ki, burada söhbət Paşinyanı hakimiyyətə gətirən, Qərbə bağlı vətəndaş cəmiyyəti institutlarından gedir.

Ermənistandakı seçkiqbağı təbliğatda müxalif namizədin Rusiyanın roluna bu şəkildə önəm verməsi nə ilə bağlıdır?

Politoloq Elşən Mustafayev “Bakı-Xəbər”ə bildirdi ki, Ermənistanda seçkiqabağı vəziyyətin gərginliyi göz qabağındadır: “Faktiki olaraq, iki klan arasında savaş gedir. Bunun da tarixi çox yaxın zamana gedir.

Qeyd edək ki, 2008-ci ilin 1 mart hadisələri Robert Köçəryanın hakimiyyəti Serj Sarkisyana ötürməsinə etirazlar sərgiləndiyi zaman baş vermişdi və 10-dan çox müxalifətçi güllələnərək öldürülmüşdü. Məhz həmin hadisələrə görə Paşinyan bir neçə il həbsxanada qalmalı oldu. İndiki ilə müqayisədə Ermənistanda vəziyyət xeyli normal olduğu halda qanlı hadisələr baş vermişdisə, deməli, 20 iyundan sonra  həmin silahların işə düşəcəyi proqnozlaşdırıla bilər. Real vəziyyət budur ki, məğlubiyyətə imza atmasına baxmayaraq, hələ də Nikol Paşinyan Qarabağ klanına və digər müxaliflərə qarşı mübarizədə irəlidədir.  R.Köçəryanın yenə də Rusiyaya sığınması, prezident Putinlə telefon danışığı müzakirə mövzusudur. Ancaq bu heç də o anlama gəlmir ki, Rusiya Köçəryana yaşıl işıq yandıracaq. Çünki revanşist mahiyyətli bu insanın hakimiyyətə gəlişi Rusiyanın vasiytəçiliyi ilə imzalanan razılaşmanı da poza bilər. Sarkisyan və Köçəryan hətta Zəngəzur dəhlizinə də “yox” deyir. Belə olan vəziyyətdə Kremlin Köçəryan-Sarkisyan komandasını yenidən iqtidar etmək istəməsi şübhəli görünür. Əslində bu vəziyyət bizi narahat etməməlidir. Çünki Azərbaycan istəyinə nail olub və Türkiyə ilə də Şuşa Bəyannaməsini imzaladı. Bölgədəki yeni reallığa tam nəzarət edə bilər. Yəqin ki, Köçəryanın bu jestləri Rusiyadan birmənalı dəstək almaq məqsədi güdür”.

Məhəmmədəli QƏRİBLİ

Son xəbərlər