Mübariz Göyüşlü: “Azərbaycan dövləti erməni faşizminin başına ağır zərbə vurub, nə qədər başlarını qaldırmaq istəsələr də, heç nəyə nail ola bilməyəcəklər”
“Heç vaxt imkan verə bilmərik ki, erməni faşizmi bir daha başını qaldırsın”. Bunu Prezident İlham Əliyev Güləbird kəndində Azərbaycan bayrağını qaldırdıqdan sonra çıxışında deyib:
“Bu gün də Ermənistanda revanşist qüvvələr baş qaldırmağa çalışır. Azərbaycanı növbəti təxribatlarla, növbəti müharibə ilə hədələməyə çalışırlar. Onlar anlamalıdırlar ki, biz hər şeyə diqqət yetiririk, hər şeyə nəzarət edirik və heç vaxt imkan verə bilmərik ki, erməni faşizmi bir daha başını qaldırsın. Biz erməni faşizmini məhv etmişik. Düşməni öz doğma torpaqlarımızdan qovmuşuq. Onları torpaqlarımızdan rədd etmişik. Ermənistan ordusunu demək olar ki, məhv etmişik...”.
- “...bu dəfə daha ağır zərbə alacaqlar”
Azərbaycan Vətəndaş Hərəkatının idarə heyətinin üzvü, siyasi şərhçi Mübariz Göyüşlü “Bakı-Xəbər”ə bildirdi ki, 44 günlük Vətən müharibəsindən sonra bütün Ermənistan şok duruma düşüb, hakimiyyət də, toplum da, müxalifət də bu durumdadır: “Cənab Prezidentin çıxışını mən də izlədim. 44 günlük Vətən müharibəsindən sonra Ermənistan şok vəziyyətinə düşüb. Erməni toplumu, Ermənistan hakimiyyəti və müxalifəti, cəmiyyəti, siyasi partiyaları, QHT-ləri, sözün həqiqi mənasında, şokdadırlar. Bu ölkədə ən çox şoka düşənlər isə radikal birləşmələr, qruplar və faşist təmayülünə bağlı olanlardır. Bunların önündə “Daşnaksütyun” partiyası, erməni kilsəsi, xaricdəki erməni lobbi və diaspor təşkilatları gedir ki, onlar da hər zaman Qarabağ məsələsində, Azərbaycan və Türkiyə ilə bağlı məsələlərdə həmişə çox radikal mövqedən çıxış ediblər. Onlar, həmçinin, bunu erməni toplumundan da tələb ediblər, bir növ, cəmiyyəti bu radikalizmə məcbur ediblər. Lakin Vətən müharibəsində Azərbaycanın qələbəsi, cənab Prezidentin də dediyi kimi, Ermənistanın başına dəyən dəmir yumruq bu ölkənin siyasətini də, planlarını da, hərbi durumunu da, iqtisadiyyatını da və sair darmadağın etdi. Azərbaycan öz haqqı olan məsələni - Qarabağın işğaldan azad edilməsi məsələsini silah gücü ilə həll etdi, torpaqlarımızı düşməndən geri qaytardı. 30 il idi ki, biz danışıqlar aparırdıq, BMT də daxil olmaqla, xarici təşkilatlardan, aparıcı dövlətlərdən və Ermənistandan torpaqlarımızın azad olunmasını həm tələb edir, həm də istəyir, həm də gözləyirdik. Amma bu baş vermədi. Azərbaycan bir zərbə ilə bu problemi həll etdi. İndi Ermənistan daxilində olan o radikal qruplar Azərbaycan və Türkiyə ilə anlaşmaq əvəzinə, yenidən qisas çağırışları, revanşist çıxışlar edirlər və toplumu qisasa kökləməyə cəhd göstərirlər. Ermənistandakı bu radikal qruplaşmalar bu yolla həm Azərbaycandan qisas almaq istəyirlər, həm də xain elan etdikləri Paşinyanı və onun hakimiyyətini devirmək məqsədi güdürlər. Çünki onlar öz aləmlərində Paşinyanı “Qarabağı satmaq”da ittiham edirlər”.
M.Göyüşlü qeyd etdi ki, cənab Prezidentin bu mesajından Ermənistanın radikal qüvvələri nəticə çıxarmalıdır, onlar bir qarış torpağımızı belə silah gücünə zəbt etmək fikrinə düşsələr, bu dəfə daha ağır zərbə alacaqlar və bir daha başlarını qaldıra bilməyəcəklər. “Cənab Prezident açıq şəkildə bəyan etdi ki, biz erməni faşizminin baş qaldırmasına imkan verə bilmərik. Bu o deməkdir ki, erməni radikalları, faşistləri nəinki bir şəhərimizi, kəndimizi, hətta bir metr ərazimizi belə silah gücünə, zor gücünə işğal etmək niyyətinə düşsələr, bu dəfə daha ağır zərbə alacaqlar. Azərbaycan Ordusu Qafqazın ən güclü ordularından biri olduğunu 44 günlük savaşda sübut etdi. Erməni faşistləri unutmasınlar ki, Azərbaycanı bir daha müharibə ilə hədələdikləri təqdirdə Azərbaycan dövləti, Azərbaycan Prezidenti, Azərbaycan Ordusu dəmir yumruqla Ermənistanı tamamilə çökdürə, bundan da ağır duruma sala bilər. Yəni bu işin nəticəsi indikindən də ağır ola bilər. Azərbaycan dövləti erməni faşizminin başına ağır zərbə vurub, nə qədər başlarını qaldırmaq istəsələr də, heç nəyə nail ola bilməyəcəklər”.
M.Göyüşlü qeyd etdi ki, ölkə başçısı İlham Əliyev Qələbə Paradında Zəngəzurun, İrəvanın, Göyçənin Azərbaycanın tarixi torpaqları olduğunu bir daha bəyan etməklə ermənilərə kim olduqlarını, haradan gəldiklərini xatırlatdı. “Mən də həmin radikal erməni qruplaşmalarına səslənirəm ki, Azərbaycan xalqı, dövləti, ordusu unutmayıb ki, Zəngəzur, Göyçə, İrəvan, bütövlükdə isə bütün Ermənistan əraziləri qədim Azərbaycan torpaqlarıdır. Əgər Ermənistanın revanşist, qisasçı, faşist qrupları hansısa bir cəhd etsələr, nəinki Azərbaycandan bir qarış torpaq ala bilməzlər, Zəngəzurun özünü itirə bilərlər. O mənada bu revanşistlərin, qisasçıların çağırışlarını populizm və boşboğazlıq hesab edirəm və bunu Ermənistan cəmiyyəti üçün təhlükəli sayıram. Bu, bütün bölgə üçün təhlükəlidir. Revanşistlərin bu cür separatçı çağırışları Ermənistanın dövlət kimi sonunu yaxınlaşdıra və bütövlükdə, bu ölkənin yer üzündən silinməsi ilə nəticələnə bilər. Unutmasınlar ki, onların qonşuluğunda Azərbaycanla yanaşı, həm də güclü Türkiyə var, eyni zamanda, bütövlükdə, ətraflarında türk-müsəlman toplumu mövcuddur”.
M.Göyüşlü hesab edir ki, revanşist qüvvələr erməni xalqının mövcud vəziyyətini düşünməli və öz populist çıxışları ilə onları qisas ruhunda kökləməyi dayandırmalıdırlar. Eyni zamanda, onların Ermənistanın məğlubiyyəti ilə barışmalı olduğunu deyən M.Göyüşlü hesab edir ki, faşizmə, radikalizmə nə bizim bölgədə, nə də dünyada yer yoxdur.
İradə SARIYEVA
