Gürcüstan azərbaycanlılarının Almaniyaya köçü artır - soydaşlarımızla bağlı həssas durum...

Gürcüstanda yaşayan soydaşlarımızın üzləşdiyi istənilən problemə biganə qalmırıq, həssaslıqla yanaşırıq. Bu ölkədə yaşayan azərbaycanlıların başqa ölkələrə miqrasiya etməsi də diqqətçəkən amillərdəndir.

Soydaşlarımızın başqa ölkələrə köç etdiyi barədə yayılan xəbərlər diqqətimizi çəkməyə bilmir. Belə ölkələrin sırasında Almaniya da var. Almaniyadan sığınacaq istəyən Gürcüstan azərbaycanlılarının sayı artıb. Bu barədə “Report.az” Almaniya Miqrasiya və Qaçqınlarla iş üzrə Federal İdarəsinə (BAMF) istinadən yaydığı xəbərdə qeyd edib. 

Məlumata görə, bu ilin yanvar ayında 173 Gürcüstan vətəndaşı Almaniyaya sığınacaq üçün müraciət edib. Onlardan 12-si milliyyətcə azərbaycanlıdır. Həmin şəxslərdən 8-nin müraciəti ailə birləşməsi proseduru ilə əlaqədar olub. Qalanları isə birinci və ikinci dəfə qaçqın statusu üçün müraciət ediblər.

BAMF-nin cavabında qeyd olunub ki, 2020-ci ilin dekabrında Almaniyadan sığınacaq istəyən Gürcüstan vətəndaşlarının sayı 127 nəfər olub: “Gürcüstanın vətəndaşlarının Şengen ölkələrinə vizasız gəlişi təsdiq olunandan sonra bu ölkə vətəndaşlarının qaçqın status üçün müraciəti artıb. Hətta BAMF-nin aylıq statistikasında ilk onluğa düşüblər”.

Soydaşlarımızın Almaniyadan sığınacaq almaq istəyi nə ilə bağlı ola bilər, onların vətəni tərk edərək başqa ölkəyə köçünə səbəb nədir?

• “...az bir qismini soydaşlarımız təşkil edir”

“Borçalı” İctimai Birliyinin sədr müavini Dəyanət Osmanlı baki-xeber.com-a bildirdi ki, soydaşlarımızın Almaniyaya köç edərək o ölkədən sığınacaq istəməsi məsələsində hər hansı bir siyasi amil axtarmaq düzgün deyil. Sadəcə, Gürcüstanla Almaniya arasında münasibətlər kifayət qədər yaxşı olduğu üçün Gürcüstan vətəndaşları ora getməyə meyl göstərirlər: “Gürcüstan vətəndaşlarının sığınacaq üçün başqa ölkələrə, o cümlədən, Almaniyaya üz tutması faktı həmişə olub. Bu məlumatın da getməsini təbii hesab edirəm. O ki qaldı onların daha çox Almaniyanı seçməsi məsələsinə, bu da, zənnimcə, Gürcüstanla bu ölkənin  münasibətlərinə bağlıdır. Eduard Şevardnadzenin SSRİ xarici işlər naziri olduğu dövrdə Almaniya birləşib, burada onun böyük rolu olub. Sonralar Almaniya-Gürcüstan münasibətləri Şevardnadzenin  Gürcüstana rəhbərliyi dövründə daha da yaxşılaşıb. Bu səbəbdən də bu gün Gürcüstan vətəndaşlarının Almaniyada iş tapmasında, eləcə də yerləşməsində üstün imkanları var”.

D.Osmanlı hesab edir ki, Gürcüstan azərbaycanlılarının Almaniyaya köç etməsinin və bu ölkədən sığınacaq almasının kütləvi olduğunu demək olmaz. Onun sözlərinə görə, Almaniyadan sığınacaq almaq istəyən azərbaycanlıların sayını şişirtmək yersizdir: “Deməzdim ki, Almaniyadan sığınacaq almaq istəyən soydaşlarımızın sayı elə də çoxdur. Bu barədə yayılan statistikada da açıq göstərilir ki, Almaniyada sığınacaq almaq ümidilə Gürcüstanı tərk etmək niyyətində olanların az bir qismini soydaşlarımız təşkil edir. Məncə, onlar da kənd və rayonlardakı sıravi vətəndaşlar deyil, əsasən müxtəlif şəhərlərdə yaşayan şəxslərdir. Rayon, kənd əhalisi öz həyatını eyni vərdişlərlə davam etdirir. Gənclərimiz isə, əlbəttə, yaxşı və modern təhsil almaq üçün Türkiyə, Almaniya və digər ölkələrə gedirlər. Mən bunu da təbii və vacib sayıram” - deyə D.Osmanlı vurğuladı.

İradə SARIYEVA