Məlum olduğu kimi, bu günlərdə Ermənistan mediasında Azərbaycanla sərhəddə yerləşən Sünik (Zəngəzur) vilayətinin bölgələri barədə məlumat yaymaq üçün ölkənin Milli Təhlükəsizlik Xidmətindən xüsusi icazə almaq tələb olunur. Belə ki, mətbuat nümayəndələri sərhədyanı bölgələr barədə xəbər yazmazdan əvvəl Milli Təhlükəsizlik Xidmətinə yazılı müraciət etməlidirlər. Bütün bunlara əsas səbəb həmin vilayətlə bağlı artan qalmaqal və bəzi sərhədyanı ərazilərin Azərbaycana təhvil verilməsi haqda erməni mediasında yayılan məlumatlardır.
Erməni mediası yazır ki, bu xüsusda İrəvan və Bakı arasında gizli razılıq var. Ermənistan parlamentinin "İşıqlı Ermənistan" fraksiyasının deputatı Karen Simonyan bu xüsusda bildirir: "Baş nazirin müavini Tiqran Avinyanın parlamentdə səsləndirdiyi cavabdan güman edə bilərəm ki, bəli, ikitərəfli, yəni 9 noyabr və 11 yanvar sənədindən başqa daha bir Əliyev-Paşinyan gizli sənədi var". Erməni deputat bildirib ki, yazılı sorğu göndərməyə və nəticələr barədə ictimaiyyətə məlumat verməyə hazırlaşır. Simonyanun sözlərinə görə, gizli sənəd var, Azərbaycan Süniki ələ keçirməyə hazırlaşır. Qeyd edək ki, baş nazirin müavini Tiqran Avinyan heç bir gizli sənədin olmadığını bildirib. O, Sünikdə bəzi ərazilərin 10 noyabr və 11 yanvar bəyanatlarında "mübahisəli bölgələr" olduğunu demişdi. Amma Ermənistanda hakim "Mənim addımım" blokundan olan millət vəkili Ayk Qevorqyan qeyd edir ki, Sünikdə Qafana gedən yolun bir hissəsi Azərbaycanın beynəlxalq səviyyədə tanınmış ərazisindən keçir: "Bilirsiniz ki, 21 km uzunluğundakı Gorus-Qafan yolunun bir hissəsi Ermənistanın beynəlxalq səviyyədə tanınmış sərhədləri xaricindən, yəni Azərbaycan ərazisindən (beynəlxalq səviyyədə tanınmış) keçir. Bu yol bağlanmamışdı. Məsələ heç bir razılaşma ilə tənzimlənməməlidir, bu onsuz da razılaşmaların nəticəsidir". Beynəlxalq təhlükəsizlik məsələləri üzrə erməni ekspert Armen Manvelyan isə məsələni fərqli prizmadan şərh edir: “Səlahiyyətlilərin qəbul etdiyi siyasət özündə gizli, örtülü addımları birləşdirir, bu addımlar noyabrın 10-da və bundan sonra gördüyümüz və başa düşdüyümüz kimi, bir qayda olaraq, Ermənistan Respublikası üçün milləti məhv edən nəticələrə malik olur. Eyni prinsiplə də gizli saxlanmış memorandumun mövcudluğunu analiz etmək lazımdır. Artıq bu fonda Sünikin təhvil verilməsi prosesi gedir”. Məhz belə bir vaxtda internetdə Azərbaycan, Rusiya və Ermənistan rəhbərlərinin noyabrın 9-da imzalanmış birgə bəyanatının 9-cu bəndi ilə bağlı ikitərəfli memorandum yayılıb. “Yerkir.am” nəşri yazır ki, bu memorandumla Gorus-Davit Bek-Qafan-Tsakaten avtomobil yolunun təhlükəsiz istifadə şərtləri müəyyənləşdirilir: “2020-ci il dekabrın 27-də Nikol Paşinyan Ermənistan parlamentində bildirmişdi ki, 9 noyabr bəyanatında yer tapmamış çoxsaylı fəaliyyətlər şifahi razılaşma ilə həyata keçirilir. Ermənistan parlamentinin vitse-spikeri Alen Simonyan isə bundan sonra açıq şəkildə bildirib ki, məlum sənəddən (9 noyabr sənədi) əlavə hər hansı başqa sənəd mövcud deyil. Lakin artıq internetdə yayılmış sənəd bunun əksini sübut edib. Belə ki, məlum kapitulyasiya sənədindən başqa ən azı bir sənəd də var. Süniklə bağlı gizli sənəd imzalanıb, bu sənəddə Qapan əvəzinə Qafan qeyd olunub.”
Ermənistanın müdafiə nazirinin keçmiş birinci müavini Artak Zakaryan da eyni mövqedədir: “Əgər ağlımızı başımıza toplamasaq, çox tezliklə Süniki itirəcəyik. Azərbaycan Sünikdən ermənilərin çıxarılmasına başlayıb. Sünikdəki 13 sərhəd kəndinin boşaldılıması ilə bağlı aktiv proses gedir, bundan sonra növbə Qafana və bu şəkildə davam edərək bütün Sünikə çatacaq”.
Erməni mediası yazır ki, Sünik məsələsində Rusiyanın İrəvanın yanında olmamasi Ermənistanın vəziyyətini daha da ağırlaşdırır. Rusiyalı hərbi ekspert İqor Korotçenko isə qeyd edir ki, Moskvanın bu gün İrəvanın yanında yer alması mümkünsüzdür. Onun sözlərinə görə, Rusiya Ermənistandan daha çox Azərbaycanı postsovet məkanında özünün mühüm strateji tərəfdaşı hesab edir: “Siyasət, iqtisadiyyat, mədəni əlaqələr sahəsində Azərbaycanla Rusiyanın münasibətləri əladır. Ən başlıcası, ölkələrimizə çox güclü prezidentlər rəhbərlik edir. Bu çox vacibdir. Müasir dünyada kənardan diqtənin, daxili və xarici proseslərə təsir göstərmək cəhdlərinin hər hansı formalarını inkar edən, müstəqil, suveren siyasət yürütməyi bacaran ölkələrin sayı azdır, yəqin ki, belə ölkələrin sayı 10-dan çox olmaz. Şübhəsiz, həmin ölkələr arasında Rusiya və Azərbaycan da var. Dövlətlərimizin başçıları arasında çox səmimi, dostcasına münasibətlər var, Azərbaycan və Rusiya liderləri bir-birinə qarşılıqlı hörmət edir”. Korotçenkonun sözlərinə görə, həqiqətən ədalətli müharibə, işğal olunmuş ərazilərin azad edilməsi uğrunda Vətən müharibəsi olmuş İkinci Qarabağ savaşında qələbə Azərbaycanın nüfuzunu və gücünü göstərdi: “Şəxsən mən hesab edirəm ki, Azərbaycanın qələbəsi bir sıra amillərə görə qanunauyğun və labüd idi. 2020-ci il noyabrın 10-da imzalanmış üçtərəfli bəyanatı Ermənistanın qeyd-şərtsiz kapitulyasiyası aktı adlandırmaq olar. Ermənistanın hərbi-siyasi iflası elə bir amildir ki, onu hər hansı siyasətçinin hakimiyyətə qaytarılması yolu ilə inkar etmək mümkün deyil”.
Samirə SƏFƏROVA
