Ermənilərin başqa ölkələrə qarşı ərazi iddiaları bitib-tükənmək bilmir, mütəmadi olaraq onlar bu çürük, mənasız xəyallarını gündəmə gətirirlər.
Hətta başqa ölkələrə qarşı ərazi iddiaları, terror və separatizm Ermənistanın hərbi doktrinasında da öz əksini tapır.
Ermənistanın uğradığı məğlubiyyət xaricdəki erməni diasporunu və lobbini, eləcə də ermənipərəst qüvvələri xəyal qırıqlığına uğratsa da, onların başqa dövlətlərə qarşı ərazi iddiaları irəli sürmək cəhdlərini daha da gücləndirdi.
Uzun illərdir Rusiyaya qarşı ərazi iddiasında olan ermənilər, xüsusən də bu ölkədəki “ərköyün” erməni lobbisi və diaspor üzvləri Rusiyadan burada yaşayan ermənilərə muxtariyyət tələbini get-gedə daha da artırır. Bu dəfə də belə bir iddia ilə Rusiyadakı erməni diasporunun nümayəndəsi Norayr Qriqoryan “Facebook” səhifəsində erməni xalqına müraciətində çıxış edib: “İndi bizim diasporumuzun əsas vəzifəsi paytaxtı Soçi və ya Adler şəhəri olan erməni muxtariyyətini əldə etməkdir. Bu ərazilər Ermənistanın tərkibinə daxil olacaq, daha sonra...”
Göründüyü kimi, artıq ermənilər Rusiyanın özünün başının bəlasına çevrilməkdədirlər. Azərbaycan torpaqlarında ikinci erməni dövləti qurmağa nail ola bilməyən ermənilər bu çürük xülyalarını Rusiya torpaqları hesabına reallaşdırmaq niyyətlərini ortaya qoyurlar.
Onu da deyək ki, ermənilər zaman-zaman Soçi, Krasnodar, Rostov və digər şəhərlərə qarşı iddialar qalıdırıb və bu ərazilərdə ermənilərə muxtariyyət verilməli olduğunu bəyan ediblər. Hətta Adler, Soçi kimi məkanların da erməni muxtariyyətinin paytaxtı olmalı olduğunu iddia ediblər.
“Ermənilər harada kompakt şəkildə yaşayıblarsa, oranın “sahibi” olmağa çalışıblar”
Tarixçi, tədqiqatçı Hafiz Cabbarov “Bakı-Xəbər”ə bildirdi ki, erməni diaspor nümayəndələrinin Rusiya ərazisinə iddia irəli sürməsi həm təəccüblü, həm də təəccüblü deyil, çünki ermənilərdən hər cür mənfi hərəkət gözləmək olar. “Təəccüblənmədim ona görə ki, ermənilərin əsassız ərazi iddiaları yalnız Azərbaycana qarşı deyil, regionda mövcud olan dövlətlərə, yaşayan xalqlara qarşı da bu cür mənfi niyyətlər ortaya atırlar. Ermənilərin xalqımıza qarşı həyata keçirdikləri soyqırım cinayətlərinə çox təəssüf ki, bəzi qonşu dövlətlər səssiz yanaşdılar. Onlar “mənə dəyməyən ilan yüz yaşasın” prinsipi sərgilədilər, amma düşünmədilər ki, qonşu əraziyə edilən hücumlar, irəli sürülən əsassız iddialar sabah onlara qarşı da baş verə bilər. Deyəsən, bu tədricən reallaşır. Düzdür, Gürcüstan, gürcü xalqı yüz il öncə də yaşayıb, onlar da həm keçmişdə, həm də bu gün ermənilərin əsassız ərazi iddiaları ilə qarşılaşıblar. Hətta onlar arasında müharibə də olub. Son dövrlər ermənilər Rusiya ərazisinə qarşı da iddialar irəli sürməyə başlayıblar. Əslində, bu iddialar yeni deyil, əvvəllər də olub. Çünki ermənilər harada kompakt şəkildə yaşayıblarsa, oranın “sahibi” olmağa çalışıblar, orada muxtariyyət yaratmaqla bağlı iddialar irəli sürüblər. Ermənilər çox təəssüf ki, tarixi yaddan çıxarırlar, unudurlar ki, əsassız iddialar irəli sürdükləri şəhərlərin əhalisi vaxtilə onları qəbul edib, burada ev-eşik qurmaları üçün imkan yaradıb, işlə, normal həyat şəraiti ilə təmin edib, ancaq ermənilər elə bir toxumdur, onlar yaxşılığı başqa cür anlayırlar. Öz mənafeləri baxımından bu yaxşılıqlardan su-istifadə etməyə çalışırlar. Bir də ermənilər hər zaman beynəlxalq arenada böyük dövlətlərin əlində vasitəyə, alətə çevriliblər. Yəni hər hansı bir dövlət hansısa bir bölgədə, ərazidə öz mənafeyini, siyasətini həyata keçirmək üçün məhz ermənilərdən alət kimi istifadə edib. Rusiyadan hərtərəfli bəhrələnən erməni diasporu niyə bu məsələni qaldırır? Ola bilsin ki, erməni diasporunun Rusiya ərazilərinə qarşı iddia irəli sürməsinin səbəbi bu ölkədə son günlər baş verən siyasi təlatümlərdir. Yəni Navalnıy məsələsi ilə bağlı Rusiya hökumətinin başı daxildəki siyasi müstəvidə baş verənlərə qarışıb və erməni diasporu da Rusiya hökumətinin bu vəziyyətindən sui-istifadə edərək konkret ərazilərə qarşı iddialarını irəli sürür, ermənilərə muxtariyyət tələb edir. Mən bunu, hər halda, bu faktorla bağlayıram. Amma bu bir aksiomadır ki, ermənilər həmişə başqa dövlətin, hər hansı bir siyasi qrupların əlində alətə çevriliblər”.
H.Cabbarov qeyd etdi ki, Dağlıq Qarabağ problemini də ermənilər SSRİ-nin dağılma ərəfəsində olmasından, hakimiyyət boşluğundan, hakimiyyətdə olanların məntiqsizliyindən, ağılsızlığından istifadə edərək yaratmışdılar. Ermənilərin alət olmaqdan xoşlandıqlarını deyən H.Cabbarov qeyd etdi ki, yetər ki, onların öz məkrli planlarını həyata keçirmələri üçün imkan olsun. “Düşünürəm ki, ermənilərin belə əsassız iddialara düşməsində qonşu dövlətlərin, həmçinin də Rusiyanın özünün də günahı var və o günah da qarşılarına çıxır. Onlar vaxtında ermənilərə qarşı tədbirlər görsəydilər və onların məkrli, xəyanətkar xislətini ifşa etsəydilər, belə olmazdı. Rusiya da, başqa ölkələr də yaxşı bilirlər ki, Azərbaycan haqlıdır. Rusiyanın ən yuxarı dairələrində, hətta bir vaxtlar birinci şəxs səviyyəsində ruslar etiraf edirdi ki, nəinki Qarabağ, hətta İrəvan torpaqları Azərbaycan torpaqlarıdır. Bəlkə də bunu dünyada bizdən sonra ən yaxşı bilən ermənilər və ruslardır. Çünki Rusiya bizim torpaqları işğal edərək burada erməniləri yerləşdirmişdi. Tarixi onlar da yaxşı bilir. Əgər Rusiya haqsızın deyil, haqlının yanında olsaydı, bəlkə də ermənilərin belə cəfəng iddiaları ilə üzləşməzdi” - deyə H.Cabbarov qeyd etdi.
İradə SARIYEVA
