Məlum olduğu kimi, Azərbaycan Ordusunun 3 generalı Nəcməddin Sadıxov, Xəqani Cəbrayılov və Rövşən Əkbərov səssiz olaraq ordudan uzaqlaşdılar. Belə ki, birlik komandirləri general-leytenant Rövşən Əkbərov və general-mayor Xəqani Cəbrayılov ehtiyata buraxılıb. Digər general - Baş Qərargahın sabiq rəisi Nəcməddin Sadıxov da hazırda hərbi xidmətdə deyil. Onun Moskvada olduğu deyilir. Sözügedən generalların Vətən müharibəsindən sonra təltif edilməməsi və səssizcə olaraq ordudan uzaqlaşması cəmiyyətdə müxtəlif söz-söhbətlərə səbəb olub.
Çünki onların hansı neqativ səbəblər üzündən ordudan uzaqlaşması maraq doğurur. Məsələ ondadır ki, döyüşlərin getdiyi vaxt, daha dəqiq desək, oktyabrın 25-də Ali Baş Komandan İlham Əliyevin rəhbərliyilə Müdafiə Nazirliyinin Mərkəzi Komanda Məntəqəsində Müdafiə Nazirliyinin rəhbər heyəti və cəbhə bölgəsində yerləşən birlik komandirlərinin iştirakı ilə keçirilən müşavirədə Prezident bəzi neqativ məqamları qeyd edib. Prezidentin fikrincə, hərbi əməliyyatlarımız elə aparılmalıdır ki, onların səmərəsi daha da təsirli olsun, vaxt itirməyək: “Bəzi hallarda yubanmalar var. Bəzi hallarda yubanmalara heç bir əsas gətirə bilmirlər. Biz bütün bunları təhlil edirik, təhlil edəcəyik”.
Maraqlıdır, Prezidentin sözügedən müşavirədə səsləndirdiyi məlum neqativlərdə bu üç generalın nə qədər məsuliyyəti ola bilərdi?
Məsələn, camaat arasında gəzən söz-söhbətlərə görə, Murovda iki yüksəklik uğrunda xüsusi təyinatlılarımızın uğurlu yürüşünə məhz X.Cəbrayılovun ləng hərəkəti və ya hərəkətsizliyi mane olub. O baxımdan bütün bunları ekspertlər necə dəyərləndirirlər?
“Onların buraxdığı səhvlər üzündən müharibə dövründə əməliyyatların gedişində ciddi redaktələr edildi”
Məsələyə münasibət bildirən hərbi ekspert İbrahim Rüstəmlinin fikrincə, sadalanan neqativlərin buraxılmasında adıçəkilən generalların rolunun olduğu barədə deyilənlər həqiqəti əks etdirir: “Təəssüf ki, bu belədir və acı reallıqdır. Bir dəfə cənab Prezident hərbi hissələrdən birinə səfər edəndə ona məruzələr edildi. O zaman X.Cəbrayılov özünü general Cəbrayıl Xəqaniyev kimi təqdim etdi. Yəni adıyla soyadını tərsinə dedi. Bir general Ali Baş Komandana məruzə edəndə bu cür kobud səhvə yol verirsə, buna nə deyəsən? O cümlədən, N.Sadıxov 30 il idi orduda xidmət edirdi, amma Azərbaycan dilində bir kəlmə də bilmirdi. Deməyim odur ki, bütün bunlar bir-birilə zəncirvari şəkildə bağlıdır. Sözügedən 3 general orduda neqativlərin birbaşa memarlarıdır. O cümlədən, orduda korrupsiyanın yaranmasında onların rolu olub. Onların buraxdığı səhvlər üzündən müharibə dövründə əməliyyatların gedişində ciddi redaktələr edildi. Belə ki, əməliyyatların gedişində, planlama işlərində ciddi redaktələr oldu. Ən böyük redaktəni cənab Prezidentin kadr məsələsinə münasibətində gördük. Müharibə başlayandan bir neçə gün sonra N.Sadıxov oyundankənar vəziyyətə salındı. Bunun da konkret səbəbi vardı. Çünki Nəcməddin uzun illər Azərbaycan Ordusunda vətənə, millətə bağlı olan hərbçiləri sıradan çıxardı. Necə deyərlər, onları məhv etdi. Bir zamanlar pozuntulara yol verərək haqlı olaraq xaric olunan zabitləri Nəcməddin yenidən orduya qaytardı. Onları rütbə, vəzifə ilə mükafatlandırdı. Bütün bunların arxasında Nəcməddin dayanırdı. Bunlar çox ciddi problemlərdir. Ötən il cənab Prezidentin müşavirədə səsləndirdiyi iradlar reallığa əsaslanırdı”.
Hərbi ekspert onu da qeyd etdi ki, Prezident İlham Əliyevin vaxtında gördüyü çevik tədbirlər ordumuzun döyüşlərdə böyük itki verməsinin qarşısını aldı.
Vidadi ORDAHALLI
