Qarabağdakı qondarma separatçı kriminal rejimin rəhbərinin xüsusi məsələlər üzrə nümayəndəsi Boris Avakyan evsiz qalmış ermənilər üçün yeni qəsəbə tikintisi haqda danışıb. Bu barədə Xankəndidəki separatçı erməni nəşrləri məlumat yayıblar.
Məlumata görə, xunta qalıqlarının oyuncaq başçısı Araik Arutyunyanın da razılığıyla 2 min nəfərlik yeni qəsəbənin layihəsi bəyənlilib.
Separatçı-terrorçu rejimin qanunsuz “ərazi idarəetmə naziri” sayılan Ayk Xanumyan isə qəsəbənin Xocalı rayonunun “Noraqyux” adlandırılmış Təzəbinə kəndi yaxınlığında ayrılmış 10 hektar ərazidə tikilməsini təklif edib. Nəticədə A.Arutyunyanın da razılığı ilə 2 min nəfərlik yeni qəsəbənin layihəsi bəyənlilib.
Bütün bunlar separatçıların azğınlaşmağından xəbər verir. Çünki bundan əvvəl separatçılar Azərbaycanın Xocavənd rayonunun “Varanda” adlandırdıqları Qaradağlı kəndində 100 fərdi evdən ibarət yaşayış sahəsinin tikintisi üçün layihə eskizini hazırlayıblar. Xocalı rayonunun “Astxaşen” adlandırılan Daşbulaq kəndində 150 evin tikinti layihəsinin icrası üçün artıq topoqrafik işlərə başlanıb. Əsgəranda 246, Xocavənddə 130 mənzilli binaların tikilməsi planlaşdırılır. Tərtər rayonunun “Aknaberd” adlandırılmış Umudlu kəndində də 100-ə yaxın fərdi ev tikməyi planlaşdırırlar.
“Separatçıların qanunsuz tikinti layihələrinə mane olmaq üçün Azərbaycan siyasi, diplomatik və hərbi təzyiq rıçaqlarını işə salmalıdır”
Sözügedən məsələ ilə bağlı fikirlərini “Bakı-Xəbər”lə bölüşən siyasi ekspert Ramil Hüseynovun fikrincə, bu kimi məlumatlar narahatlıq doğulur: “Belə görünür ki, rus sülhməramlıların Qarabağa yerləşməsindən ruhlanan separatçılar yeni-yeni planlar üzərində çalışırlar. Bu isə yolverilməzdir. Ona görə ki, sözügedən işlər tamamilə qanunsuzdur. Görünən odur ki, 44 günlük müharibə zamanı rəzil vəziyyətə düşən, Qarabağdan qaçan separatçılar yenidən öz çirkin niyyətlərini həyata keçirmək istəyirlər. Bunun bir səbəbi rus sülhməramlılarının egidası altında Dağlıq Qarabağı tərk edən ermənilərin bir qisminin geri qayıtması ilə bağlıdır. Rusiya tərəfinin yaydığı məlumata görə, noyabrın 10-dan sonra 50 min nəfərədək erməni geri dönüb. Bu, bir qədər şişirildilmiş rəqəm olsa da, fakt ondan ibarətdir ki, ermənilər öz mənfur niyyətlərindən əl çəkmək istəmirlər. Belə görünür ki, 44 günlük müharibə zamanı ermənilərin başına endirilən dəmir yumruq separatçılara dərs olmayıb. Onlar hesab edirlər ki, regionda sülhməramlılar var deyə istədiklərini edə biləcəklər. Ancaq əsla belə olmamalıdır. Hesab edirəm ki, separatçıların qanunsuz tikinti layihələrinə mane olmaq üçün Azərbaycan siyasi, diplomatik və hərbi təzyiq rıçaqlarını işə salmalıdır. Danışıqlarda bu məsələ qaldırılmalı və onlara xəbərdarlıq edilməlidir. Çünki bu kimi qanunsuz təşəbbüslər 10 noyabr razılaşmasının prinsiplərinə ziddir”.
Siyasi ekspert hesab edir ki, bütün vasitələrlə belə hallar əngəllənməlidir.
Vidadi ORDAHALLI
