Bütün proseslər, onların təhlili və nəticələri onu göstərir ki, Ermənistanın hədəfi həmişə dinc, sivil Azərbaycan əhalisi olub. Ermənilər Birinci Qarabağ müharibəsində Xocalıda dinc azərbaycanlılara qarşı törətdikləri genosid, kütləvi qırğın hərəkətlərini 28 ildən sonra da davam etdirərək, 44 günlük müharibə zamanı Azərbaycanın mülki əhalisini qadağan edilmiş kütləvi qırğın silahları, raketlərlə atəşə tutdular, nəticədə xeyli sayda dinc azərbaycanlı həyatını itirdi, neçə-neçə insan isə ağır şəkildə yaralandı, əlil oldu.
44 günlük müharibədə dinc, sivil azərbaycanlılara qarşı Ermənistanın həyata keçirdiyi terror cinayətləri 28 il bundan əvvəl Xocalıda törətdiyi soyqırımın, kütləvi qırğının davamı oldu. Ermənilər Gəncədə, Bərdədə, Ağdamda, Tərtərdə dinc əhalini qətlə yetirməklə göstərdilər ki, onlar 28 il bundan əvvəlki mənfur siyasətlərini davam etdirirlər.
“Beynəlxalq təşkilatlar Ermənistanın 28 ildən sonra Gəncədə, Bərdədə, Tərtərdə, Ağdamda öz qətliam siyasətini davam etdirməsi faktına reaksiya verməlidirlər”
“Qarabağa aparan yol” qəzetinin baş redaktoru, şair-publisist Əli Mahmud bizimlə söhbətində bildirdi ki, ermənilər Xocalı sakinlərinə qarşı qətliam, soyqırım aktları törətməklə XX əsrin əvvəllərində həyata keçirdikləri terror, qətliam cinayətlərini davam etdiriblər, 28 il sonra isə Xocalıda etdikləri cinayətləri 44 günlük müharibə zamanı təkrarlayıblar: “XX əsrin əvvəllərindən başlayaraq ermənilər bir sıra terror təşkilatları yaradıblar, bu təşkilatlar tərəfindən xüsusi terrorçu qruplar, canilər yetişdirilib. Ermənilərin bu terror qruplarını yaratmaqda məqsədləri azərbaycanlıları kütləvi olaraq qətlə yetirmək, bizim ərazilərimizə sahib olmaq olub. 28 il bundan əvvəl Xocalıda dinc azərbaycanlılara qarşı həyata keçirilən soyqırım cinayətlərini törədən canilərin davamçıları 44 günlük müharibədə yenə də Azərbaycanın dinc sakinlərini hədəfə alıb, insanlarımızı vəhşicəsinə, vandalcasına qətlə yetirdilər, öldürdülər. Bu onu göstərir ki, Ermənistanın hədəfi dinc azərbaycanlılar olub. Ermənistan bir terror dövləti, separatizm, neofaşizm ölkəsidir. Bunu sübut etməyə ehtiyac yoxdur, çünki hər şey göz qabağındadır.
Ermənilərin Xocalıda həyata keçirdikləri qətliam siyasətini Gəncədə, Bərdədə, Tərtərdə və digər ərazilərimizdə təkrarlaması onu göstərir ki, bu qəbilə təfəkkürlü topluma rəhbərlik edənlər Azərbaycan xalqını hədəfə alıblar. Xocalıda da əsas hədəfləri dinc əhalini öldürmək, kütləvi şəkildə qətlə yetirmək olub.
Qadağan olunmuş ağırçaplı silahlarla Gəncənin, Bərdənin, Tərtərin dinc əhalisini atəşə tutmaqla, insanlarımızı qətlə yetirməklə ermənilər öz terrorçuluğunu, caniliyini ortaya qoyub.
Müharibə zamanı Ermənistanın qadağan olunmuş kütləvi qırğın silahlarından istifadə etməklə dinc sakinlərimizi öldürməsi faktına beynəlxalq aləm göz yummamalıdır. Beynəlxalq təşkilatlar Xocalı soyqırımı törətdiklərinə görə ermənilərə qarşı heç bir addım atmayıblar, heç olmasa 44 günlük müharibə dövründə ermənilər tərəfindən dinc sakinlərimizə qarşı həyata keçirilən terror hadisələrinə münasibət bildirsinlər. Beynəlxalq təşkilatlara və xarici havadarlarına arxayın olan ermənilərin Xocalıda dinc azərbaycanlılara qarşı törətdikləri soyqırımı sonradan da davam etdirməsi bu toplumun mahiyyətini ortaya qoyur. Müharibə dövründə Ermənistan tərəfindən Gəncənin, Bərdənin və Tərtərin bir neçə dəfə qadağan olunmuş kütləvi qırğın silahlarından atəşə tutulması, dinc əhalinin qətlə yetirilməsi Xocalı hadisələrinin davamıdır. Çünki bu şəhərlərimizdə də qətlə yetirilənlər dinc əhali - qadınlar, uşaqlar və yaşlılar olub, Xocalıda da belə olmuşdu. Bir məqamı da deyim ki, terrorçu Ermənistan Xocalıda, 28 il sonra digər şəhərlərimizdə törətdiyi cinayətləri əsasən gecə saatlarında, əhalinin yatdığı vaxt həyata keçirib”. Ə.Mahmud hesab edir ki, beynəlxalq təşkilatlar, dünya ictimaiyyəti bütün bu faktlardan xəbərdar olsalar da, amma xristian təəssübkeşliyi göstərir, Ermənistana qarşı heç bir cəza tədbirləri görmürlər. “Bütün hallarda, Ermənistanın terrorçu silahlı birləşmələrinin Xocalıda dinc əhaliyə qarşı törətdikləri qətliamı, soyqırımı sonradan Gəncədə, Bərdədə, Tərtərdə təkrar etməsi dünyanı narahat etməlidir. İnsanlıq əleyhinə törədilən bu cinayətlərdə birbaşa Ermənistan hakimiyyətinin, terror təşkilatlarının əli var. Ona görə də beynəlxalq təşkilatlar Ermənistanın 28 ildən sonra Gəncədə, Bərdədə, Tərtərdə, Ağdamda öz qətliam siyasətini davam etdirməsi faktına reaksiya verməlidirlər. Eyni zamanda da Ermənistanın qadağan olunmuş kütləvi qırğın silahlarından mülki azərbaycanlılara qarşı istifadə etdiyini öz hesabatlarında, bəyanatlarında əks etdirməlidirlər”.
Ə.Mahmud qeyd etdi ki, Azərbaycanın rəsmi dairələri 44 günlük müharibədə ermənilərin dinc azərbaycanlıları qətlə yetirməsi ilə bağlı bütün faktları beynəlxalq təşkilatlara çatdırıb və bir sıra xarici ölkələrin KİV nümayəndələri bu dəhşətli mənzərəni gözləri ilə görüb və işıqlandırıblar.
İradə SARIYEVA
