Türkiyə prezidenti Rəcəb Tayyib Ərdoğan "WhatsApp" tətbiqindən istifadədən imtina edib. T.Ərdoğanın messencerdən imtina etməsinə səbəb "WhatsApp"ın gizlilik siyasətindəki dəyişikliklər olub.
Bildirilir ki, təhlükəsizlik problemləri ilə əlaqədar Türkiyə prezidenti Administrasiyası daha əvvəl "WhatsApp"da olan qruplarını "Turkcell Iletisim Hizmetleri AS"a məxsus olan BiP tətbiqinə keçirəcək. T.Ərdoğandan sonra ölkənin Müdafiə Nazirliyi də BiP tətbiqinə keçib. Türkiyə prezidentinin ofisi jurnalistləri də BiP tətbiqinə keçməyə çağırıb. Qeyd edək ki, “WhatsApp” mesencerinin istifadəçi müqaviləsinə əlavə olunmuş yeni bəndinə görə, istifadəçi bundan sonra öz şəxsi məlumatlarını Facebook şirkətinə təqdim etməlidir. Facebook şirkətinin bir parçası olan “WhatsApp” öz istifadəçilərinin zövqünü, vərdişlərini təhlil etmək üçün onların şəxsi məlumatlarını şirkətin "tətbiqlər ailəsi" ilə paylaşacaq. Xatırladaq ki, Facebook korporasiyasına “Instagram” və “Facebook Messenger” də daxildir.
Göründüyü kimi, Türkiyə ən ali səviyyədə “WhatsApp”la bağlı yaşananları hətta dövlətçilik üçün təhlükə sayır və alternativ milli platformalardan istifadənin zəruriliyini bəyan edir. Belə təhlükə varsa, Azərbaycan hansı addımları atmalıdır?
Media məsələləri üzrə ekspert Azər Həsrət “Bakı-Xəbər”ə açıqlamasında bildirdi ki, "WhatsApp" ətrafında yaradılan ajiotaj başadüşüləndi: “Xüsusilə də ABŞ prezidenti Trampın başına gətirilən oyunlardan sonra dünya da sosial mediada yaşananlarla bağlı ciddi əndişə içərisindədir. Hesab olunur ki, sosial şəbəkəni idarə edənlər ağlına gələn yeniliyi tətbiq edə bilər. Həm şəxsi, həm də dövlət təhlükəsizliyi ilə bağlı ciddi narahatlıqlar yaranıb. Bu səbəbdən də alternativlər barədə düşünmək normaldır. Türkiyə prezidentinin "WhatsApp"dan imtina edib, həmin ölkənin özünə məxsus olan bir şəbəkəyə keşməyin zəruriliyi ilə bağlı çağırış etməsi çox ağlabatan hərəkətdir. Söhbət Azərbaycandan gedirsə, mən neçə gündür bu barədə düşünürəm. Çox sağ olun ki, bu yöndə fikirlərimi bölüşmək üçün şərait yaratdınız. Azərbaycan Türkiyə ilə birlikdə özünün bu cür xidmətlərini inkişaf etdirməlidir. İndiki şəraitdə Azərbaycan BiP-dən istifadə edə bilər. Mən artıq dünəndən Türkiyəyə məxsus olan bu şəbəkədə qydiyyatdan keçmişəm. Düzdür BiP hələ ki, dünyadakı digər tanınmış tətbiqlər kimi funksional deyil. Həm bizim, həm də Türkiyənin mütəxəsisləri birlikdə işləyib, qısa müddətdə ona "WhatsApp"da istifadə etdiyimiz funksiyaları əlavə edə bilərlər. O zaman biz qlobal güclərin sosial media asılılığından canımızı qurtarmış olarıq. Biz mütləq mənada bunu etməliyik. Çünki günün birində həmin güclərin ağlına nəsə gələcək və hansısa sosial media platformasını ölkəmiz üçün bağlayacaq. Onda biz nə edəcəyik? Alternativimiz masa üzərində olmalıdır. Biz paralel şəkildə həm qlobal sosial media platformalarından, həm də ortaq türk platformalırından istifadə etməliyik. Görürəm ki, artıq ölkəmizdə xeyli insan BiP-də qeydiyyatdan keçib. Perspektivdə bunu bütün türk coğrafiyasında genişləndirməliyik. Alternativin olması bizə yalnız fayda verə bilər. Çinin özündə illərdir ki, daxili sosial media xidmətlərindən istifadə edilir. Bu məsələdə heç bir dünya gücü Çinə nəsə diqtə edə bilməz. Biz də tez bir zamanda öz alterfnativimizi təqdim etməliyik”.
Ekspertin sözlərinə görə, belə olan təqdirdə bütün serverlər və onların idarə edilməsi bizim əlimizdə olacaq: “Şəxsən mənim də internet təsərrüfatım ABŞ-da yerləşir. Trampla bağlı yaşananlardan sonra düşünürəm ki, saytlarımın ABŞ-dakı serverdə oturması məqsədəuyğun deyil. Dövlətimiz bu istiqamətdə addımlar atmalıdır ki, biz resurslarımızı öz ölkəmizə daşıyaq. Təəssüflər olsun ki, əlaqədar qurumlar bu istiqamətdə ciddi yeniliklər etmir. Ölkə başçısı bu məsələyə əl qoymalıdır ki, ölkəmizdə uyğun alternativlər inkişaf etsin”.
Məhəmmədəli QƏRİBLİ
