Nə beynəlxalq hüquqa, nə də koronavirus epidemiyasına məhəl qoymayan erməni separatçıları martın 31-də işğal altındakı Qarabağ torpaqlarında növbəti “seçki” keçrdilər. Erməni mənbələrinin məlumatına görə, qondarma qurumun keçmiş “dövlət naziri” Araik Arutyunyan birinci nəticəni göstərib. İkinci yerdə “xarici işlər” “naziri” Masis Mailyan, üçüncü yerdə isə sabiq “təhlükəsizlik katibi”, general Vitaliy Balasanyan olub. Lakın namizədlərdən heç biri lazım olan sayda səs toplaya bilmədiyi üçün “seçki” ikinci tura saxlanıb. Namizədlər arasında ikinci yeri tutan və müxalifətin təmsilçisi sayılan Masis Mailyan seçiciləri ikinci turda iştirak etməməyə çağırıb. O bunun səbəbini edilən saxtakarlıqlar və pandemiya dövründə seçkinin keçirilməsinin mümkünsüzlüyü ilə izah edib.
Qeyd edək ki, dünyanın bir çox ölkələri və nüfuzlu qurumları saxta “seçkilərin” nəticələrini tanımayıb və pisləyən bəyanat qəbul edib. Qoşulmama Hərəkatının Əlaqələndirmə Bürosu da Azərbaycan Respublikasının işğal edilmiş ərazilərində təşkil olunmuş qondarma “seçkilər”lə bağlı açıqlama ilə çıxış edib. BMT-dən sonra ikinci ən böyük siyasi platforma olan və 120 ölkəni birləşdirən Qoşulmama Hərəkatı ərazilərin güc yolu ilə əldə edilməsinin yolverilməz olduğunu vurğulayaraq, Azərbaycan Respublikasının ərazilərinin işğalı nəticəsində yaranmış vəziyyətin heç bir ölkə tərəfindən qanuni tanınmayacağını bəyan edib. Bununla əlaqədar olaraq, Qoşulmama Hərəkatına üzv ölkələr bu ilin 31 mart tarixində Azərbaycan Respublikasının Dağlıq Qarabağ bölgəsində keçirilən qondarma “seçkiləri” tanımadıqlarını və onları qanunsuz hesab etdiklərini ifadə edib. Sonda Qoşulmama Hərəkatının Əlaqələndirmə Bürosu Bakı Zirvə Görüşünün Yekun sənədinin 662-ci paraqrafına istinad edərək, Azərbaycan Respublikasının beynəlxalq tanınmış sərhədləri çərçivəsində suverenliyi və ərazi bütövlüyünə və Ermənistan və Azərbaycan arasında münaqişənin BMT Təhlükəsizlik Şurasının qətnamələri əsasında həllinə dəstəyini bir daha ifadə edib.
Hatəm Cabbarlı:“Nüfuzlu ölkələr ikinci tur seçkilərinin ümumiyyətlə keçirilməsinin qarşısını almağa çalışmalıdırlar”
Siyasi elmlər doktoru Hatəm Cabbarlı “Bakı-Xəbər”ə açıqlamasında bildirdi ki, qondarma qurumda “seçkilərdə” kimin “prezident” seçildiyi məlum olmayıb:“Çünki namizədlərdən heç biri 50+1 faiz səs baryerini aşa bilmədi. Bu səbəbdən də, ikinci tur elan olunub. Seçkilərin koronavirus pandemiyası dönəminə təsadüf etməsi isə bütün beynəlxalq ictimiayyətə edilən böyük sayğısızlıqdır. Seçkilərdən beş gün keçəndən sonra ikinci nəticəni göstərən Masis Mailyan ikinci turun boykotuna çağırır. Dünən isə Xankəndinin mərkəzinə 100-lərlə adam çıxıb utancverici nəticənin ləğvini tələb edib. Onlar ümumiyyətlə separatçı qurumun mövcud rəhbərliyinin hamısının istefasını tələb edirlər. Bildirirlər ki, prosesdə inzibati resurslardan istifadə edilib. Bütün bu aksiyaların təşkilatçısı Masis Mailyandır. Onun niyə 5 gündən sonra fəallaşması bəzi dairələrdə sualların yaranmasına səbəb olub. Mailyan Sorosun adamı kimi tanınır. Görünür, bu sifariş də ona Qərbdən gəlib. Faktiki olaraq, qondarma qurumda mübarizə həm də namizədlərin arxasında duran güclər arasında gedir. Qondarma qurum bu “seçki” ilə özünü bir daha rüsvay etdi. Pandemiya dövründə saxta bir “seçki” keçirməklə yanaşı, daxildə saxtakarlığın olduğu bildirilir. Əslində saxta qurumdan bundan artıq nəticə gözləməyə də dəyməzdi. Dünyanın nüfuzlu qurumları seçkini tanımayıb. Bu sırada Qoşulmama Hərəkatı üzv ölkələrinin də olması böyük nəticədir. Faktiki olaraq bu, dünyanın 120 ölkəsinin saxta “seçkilərlə” bağlı açıqladıqları mövqe anlamına gəlir. Hesab edirəm ki, beynəlxalq qurumlar, nüfuzlu ölkələr ikinci tur seçkilərinin ümumiyyətlə keçirilməsinin qarşısını almağa çalışmalıdırlar. Bunun üçün kifayət qədər hüquqi əsaslar da mövcuddur”.
Məhəmmədəli QƏRİBLİ
