Daxili işlər orqanları tərəfindən narkotik vasitələrin qanunsuz dövriyyəsi ilə mübarizə və kultivasiya yolu ilə yetişdirilən narkotik tərkibli bitkilərin aşkar edilməsi istiqamətində "Xaş-Xaş 2017" kompleks tədbirlər planına uyğun olaraq tədbirlər davam etdirilir.
Növbəti belə uğurlu tədbir Balakən RPŞ-nin əməkdaşları tərəfindən həyata keçirilib.
Balakən rayonunun Hənifə kəndində sakinlərdən birinin həyətində narkotik tərkibli bitki yetişdirməsi barədə Rayon Polis Şöbəsinə məlumat daxil olub.
RPŞ rəhbərliyinin göstərişilə yaradılan qrup tərəfindən əməliyyat-axtarış tədbirlərinə başlanıb, Hənifə kənd sakini Vüqar Əhmədova məxsus evə və həyətyanı sahəyə baxış keçirilib. Həyətyanı sahədən ümumilikdə 53 ədəd çətənə kolu aşkar edilərək götürülüb.
V.Əhmədovun evinə baxış zamanı isə evin müxtəlif yerlərində gizlədilərək saxlanan külli miqdarda narkotik vasitə aşkar edilərək götürülüb və ekspertizaya təqdim olunub.
Ekspertiza həmin narkotik vasitənin 3,5 kiloqram qurudulmuş marixuana olması barədə rəy verib.
Araşdırmalarla V.Əhmədovun həmin narkotik vasitəni satış məqsədilə saxladığı müəyyən edilib.
Faktla bağlı Rayon Polis Şöbəsində cinayət işi başlanıb.
Bu istiqamətdə tədbirlər davam etdirilir.
Natiq CAVADOV, DİN mətbuat xidmətinin əməkdaşı
