İyulun 22-də Bakı şəhər sakini olan bir qadın evindən qızıl əşyalarının oğurlanması barədə Səbail RPİ-nin 39-cu Polis Bölməsinə ərizə ilə müraciət edib. O, izahatında 6000 manat dəyərində qızıl-zinət əşyalarının bir müddət əvvəl oğurlandığını, aradan ötən vaxt ərzində özünün evinə gəlib-gedən yaxın tanışlarından kimlərin bunu edəcəyi ilə maraqlandığını, lakin bir nəticə əldə etmədiyini bildirib.
Məlumatla əlaqədar yaradılan əməliyyat qrupu tərəfindən müvafiq araşdırmalara başlanıb. Görülmüş tədbirlərlə oğurluğun mənzil sahibəsinin tanışları Elşad və Qismət adlı şəxslər tərəfindən törədilməsinə dair şübhələr yaranıb.
Əməliyyat-axtarış tədbirləri ilə qısa vaxt ərzində olduqları yer müəyyənləşdirilib və onlar şübhəli şəxs qismində saxlanaraq 39-cu Polis Bölməsinə gətirilib.
Araşdırmalarla onların Abşeron rayon sakini Qismət Nəsibov və Ağdam rayon sakini Elşad Hüseynov olduqları müəyyən edilib.
Əsaslı dəlillər qarşısında adıçəkilən şəxslər həmin tanışlarının mənzilindən mart ayından etibarən nəzərə çarpdırmadan müxtəlif qızıl əşyalarını oğurladıqlarını etiraf edib.
Faktla əlaqədar cinayət işi başlanıb.
Natiq CAVADOV DİN mətbuat xidmətinin əməkdaşı
