Son illər ölkəmizin bütün bölgələrində polis veteranlarının təcrübəsindən, bilik və bacarıqlarından daha geniş və səmərəli istifadə edilir, onların ictimai təhlükəsizliyin təminində, cinayətlərin profilaktikası və açılmasında, təqsirləndirilən şəxslərin axtarışı tədbirlərinin planlaşdırılmasında, şəxsi heyətin təlim-tərbiyəsində, peşəkarlıqlarının artırılmasında, əhali arasında hüquqi biliklərin təbliğində fəaliyyətləri güclənib.
Bu barədə baki-xeber.com-a DİN Mətbuat Xidmətinin əməkdaşı, polis baş leytenantı Natiq Cavadov açıqlama verib.
N.Cavadovun sözlərinə görə, əksər ərazi polis orqanlarında veteranlar şuralarına xidməti otaqların ayrılması isə onlara fəaliyyətlərini lazımi tələblər səviyyəsində qurmağa imkan verir. Şuranın üzvləri qarşıya qoyulan vəzifələrin icrasında xüsusi fəallıq göstərir, vaxtaşırı təhsil müəssisələrində olur, ictimaiyyətin ayrı-ayrı təbəqələrini təmsil edən şəxslərlə görüşlərdə dini ekstremizmin, radikal cərəyanların, cəmiyyətin insanlıq əleyhinə cinayət, birgəyaşayış qaydalarına zidd olması, eləcə də narkotiklərin qanunsuz dövriyyəsinin zərəri, erkən nikahların fəsadları barədə ətraflı məlumat verirlər. Gənclərin vətənpərvərlik, milli-mənəvi dəyərlərimizə sədaqət ruhunda tərbiyəsinə xüsusi diqqət yetirilir. Təkcə bu ilin birinci rübü ərzində respublikanın müxtəlif bölgələrində polis veteranları orta məktəblərdə, lisey və gimnaziyalarda gənclərlə 980 görüş keçirib. Onların iştirakı ilə 1550 cinayət hadisəsinin açılması təmin olunub. Səmərəli fəaliyyətlərinə görə veteranlardan bir neçəsi DİN rəhbərliyi və Respublika Müharibə, Əmək və Silahlı Qüvvələr veteranları təşkilatı tərəfindən mükafatlandırılıb. Əməyin qiymətləndirilməsi isə görülən işin keyfiyyətinin artması ilə yanaşı, həm də qoyulan məqsədə doğru fəaliyyətin stimullaşdırılması deməkdir.
