Qadir Bayramlı: “Arıçılıqla məşğul olan şəxslərə köməklik göstərilməli, fermerlər müəyyən preparatlarla təmin olunmalı və onlara güzəştli şərtlərlə kredit ayrılmalıdır”
Artıq bir neçə ildir davamlı olaraq Bakıda bal yarmarkası keçirilir. Bu il keçirələcək bal yarmarkası üçün sahibkarlar öz məhsullarını artıq təqdim ediblər. Yarmarkaya ölkə üzrə 371 sahibkardan 150 ton süzmə bal daxil olub. Bunun 5 tonu çərçivə halındadır. Qeyd edək ki, daha çox məhsul Lənkəran və Aran iqtisadi rayonlarından göndərilib.
Ancaq təqdim olunan məhsullar arasında saxta bala da rast gəlinib. Azərbaycan Arıçılar Assosiasiyasının sədri Bədrəddin Həsrətov media nümayəndələrinə açıqlamasında qeyd edib ki, Azərbaycanda keyfiyyətsiz arıçılıq məhsulları, o cümlədən keyfiyyətsiz bal daha çox Astara və Daşkəsən rayonlarında hazırlanır: “Həmin rayonlarda hər il maarifləndirmə tədbirləri görülsə də, sahibkarlar qoyulan normalara əməl etmirlər”.
Qida Təhlükəsizliyi Agentliyinin baytarlıq nəzarəti şöbəsinin müdiri Qalib Əbdüləliyev isə qeyd edib ki, yarmarkaya çıxarılması planlaşdırılan 3 974 adda məhsuldan 900-ü, yəni təxminən 30 ton məhsul ekspertizanın nəticələrinə görə yararsızdır.
Saxta bal məhsulları ilə mübarizə aparılması üçün müəyyən işlər görüləcək. Belə ki, arıçılıq məhsullarının sərgi-satış yarmarkasına saxta bal məhsulları təqdim etmiş fermerlər müəyyən edildikdən sonra onların təsərrüfatlarına baxış keçiriləcək. Q.Əbdüləliyev jurnalistlərə açıqlamasında qeyd edib ki, agentliyin əməkdaşları bu fermerlərin məhsulu hansı şəraitdə istehsal etməsi ilə yaxından tanış olacaq, onların səhvlərini müəyyənləşdirəcək və onlarla müvafiq iş aparılacaq.
Saxta bal istehsalı ilə mübarizə aparılmasının əhəmiyyəti barədə danışan Azərbaycan Dövlət İqtisad Universitetinin dosenti Qadir Bayramlı “Bakı-Xəbər”ə açıqlamasında qeyd etdi ki, saxta balın olmaması üçün bölgələrdə və iri şəhərlərdə də keyfiyyətli yoxlama məntəqəsi yaradılmalıdır. Bal satışa çıxarılmazdan öncə sahibkara həmin məhsulla bağlı sertifikat verilməlidir: “Saxta bal məhsulunun qarşısını almaq üçün fermerlər arasında müəyyən maarifləndirmə işi aparılmalıdır. Eyni zamanda, saxta məhsul təqdim edənlər müəyyən məbləğdə cərimələnməlidir. Əhalinin sağlamlığına təsir edən məhsulu bazara çıxaran şəxs cəzalandırılmalıdır. Nəzərə almaq lazımdır ki, hər kəsin bahalı bal almağa imkanı yoxdur. Vəziyyətdən istifadə edən bəzi sahibkarlar istehsal etdikləri balın tərkibinə şəkər əlavə edirlər. Belə olan halda, həmin məhsulun keyfiyyəti aşağı düşür və o təbii bal sayılmır. Təbii bal yetişdirən insanlara müəyyən köməklik göstərilməlidir. Fermerlər arıçılıq məhsulları ilə bağlı preparatlarla təmin olunmalıdır. Daha sonra fermerlərə güzəştli şərtlərlə kredit ayrılmalıdır. Süni maneələrin aradan qaldırılması üçün arıçılıqla məşğul olanlara şərait yaradılmalıdır”.
Günel CƏLİLOVA
