Vahid Məhərrəmov: “O üzdən, istehsal olunan məhsulun keyfiyyətinə və bazarda rəqabətə davamlılığına xüsusi fikir vermək lazımdır”
Azərbaycan Birləşmiş Ərəb Əmirlikləri (BƏƏ) ilə sənaye, logistika və nəqliyyat sahələrində birgə müəssisələrin yaradılmasında maraqlıdır. Bu fikirləri Azərbaycanın Dubaydakı ticarət nümayəndəsi Elnur Əliyev mətbuata açıqlamasında bildirib. Onun sözlərinə görə, Azərbaycan tərəfi çox sayda ərəb şirkətinin ölkəyə cəlb edilməsində maraqlıdır: “Çünki Azərbaycan yerləşdiyi yerə görə regionda qonşu ölkələrin əsas bazarlarına çıxışı olan xarici investorlar üçün ideal bazardır”.
Bu günə qədər BƏƏ-nin 250-dən çox şirkəti Azərbaycanda fəaliyyət göstərir. İki ölkə arasında Bakı-Dubay-Bakı, Bakı-Şarja-Bakı aviareysləri fəaliyyət göstərir.
Əliyevin sözlərinə görə, Azərbaycandan BƏƏ-yə ixracda əsas paya kənd təsərrüfatı məhsulları malikdir. Həmin məhsulların tədarük olunduğu yer Dubayda yerləşir: “Dubaya böyük həcmdə tərəvəz və meyvələr ixrac edilir. Az miqdarda ət ixrac edilir. Dubay bazarının tələbatını nəzərə alaraq gələcəkdə artan ət istehlakını Azərbaycan hesabına təmin etmək olar”.
Ticarət nümayəndəsinin açıqlamasından o da məlum olub ki, Azərbaycan BƏƏ-dən əsasən yüksək texnologiyalı məhsullar, elektronika, sənaye malları və tikinti materialları idxal edir: “BƏƏ-nin kənd təsərrüfatı məhsullarının ən böyük idxalçılarından biri olduğunu nəzərə alaraq, yüksək keyfiyyətli məhsullarımızın bu perspektivli bazarda yer tutacağını gözləyirik”.
Ticarət nümayəndəsi hesab edir ki, BƏƏ-nin ixrac üçün ciddi potensiala malik olduğunu nəzərə alaraq, Azərbaycanın mallarının BƏƏ bazarına çıxması gələcəkdə Fars körfəzinin digər ölkələrinin bazarlarına yerli məhsulların çıxarılmasına kömək edə bilər. Bu o deməkdir ki, Dubay vasitəsilə Azərbaycan bir sıra digər Körfəz ölkələrinə də kənd təsərrüfatı məhsulları ixrac edə bilər.
Ümumən bununla bağlı imkan və perspektivləri ekspertlər necə dəyərləndirirlər?
Məsələyə münasibət bildirən kənd təsərrüfatı sahəsi üzrə mütəxəssis Vahid Məhərrəmovun sözlərinə görə, bu məsələdə bütün tərəflərin maraqları nəzərə alınmalıdır: “Çünki kənd təsərrüfatı məhsulu baha başa gəlir. Məhsul dotasiya, subsidiya ilə ərsəyə gətirilir. Bu, bütün dünya ölkələrində belədir. Ona görə də kənd təsərrüfatı məhsullarının ixracı ilə bağlı hökumətlər xüsusi olaraq qərar qəbul edirlər. Yəni yalnız istehsal olunan məhsulun artıq qalan hissəsini ixrac edirlər. Məsələn, heyvandarlıq məhsulu istehsal olunursa, onun artıq olan hissəsi ixrac olunur. Bu o deməkdir ki, daha çox məhsul istehsal edəndə artıq qalan məhsul ixrac edilir. Bəli, Ərəb ölkələri kənd təsərrüfatı məhsullarını əsasən idxal edirlər və Azərbaycan ora bu məhsulları ixrac edə bilər. Ancaq gərək biz özümüz daxili tələbatı tam ödəyək və ondan sonra bu məhsulları ixrac edək. Nəzərə balmaq lazımdır ki, daxili bazar daha dayanıqlıdır, nəinki xarici bazar. Xarici bazarda rəqabət olduğu üçün, tələbat tez-tez dəyişə bilər. Zaman-zaman bu tendensiya dünya bazarında özünü göstərir. O üzdən, istehsal olunan məhsulun keyfiyyətinə və bazarda rəqabətə davamlılığına xüsusi fikir vermək lazımdır. Nəzərə almaq lazımdır ki, daha çox kənd təsərrüfatı məhsulu istehsal olunacaqsa, o zaman ixrac problemi olmayacaq. Azərbaycan istehsal etdiyi kənd təsərrüfatı məhsullarını anbarlarda bir müddət saxlayıb, sonra mərhələ-mərhələ bazarlara buraxmalıdır. O zaman daxili tələbat, mövsümdən asılı olmayaraq, dayanıqlı şəkildə təmin olunacaq. Eyni zamanda həmin məhsulların bir hissəsini xaricə ixrac etmək olar. Ona görə də bunun üçün xüsusi anbarlar tikilməlidir”.
Vidadi ORDAHALLI
