Vüqar Bayramov: “Qarşıdakı illərdə bu sahədə mövcud olan potensialdan səmərəli istifadə olunsa, əldə edilən gəlirlər daha böyük həcmdə olacaq”
Xəbər verildiyi kimi, Prezident İlham Əliyev “2018–2025-ci illərdə Azərbaycan Respublikasında şərabçılığın inkişafına dair Dövlət Proqramı”nın təsdiq edilməsi haqqında” Sərəncam imzalayıb.
Proqramda şərabçılığın inkişafına dair bir sıra tədbirlərin görülməsi nəzərdə tutulub. Proqramın məqsədi şərab və şərabçılıq məhsullarına tələbatın ortamüddətli perspektivdə yerli ehtiyac və ixracat imkanları nəzərə alınmaqla ödənilməsi, şərab istehsalı müəssisələrinin fəaliyyətinin genişləndirilməsi və müasir texnologiyalar əsasında qurulması, xammal təminatının yaxşılaşdırılması, şərabçılıq məhsullarının ixracının artırılması və kənd əhalisinin məşğulluq səviyyəsinin yüksəldilməsi üçün ölkədə üzümçülüyün və şərabçılığın inkişafını stimullaşdırmaqdan ibarətdir.
Dövlət Proqramının icrası nəticəsində Azərbaycanda şərabçılıq ənənələri bərpa olunacaq, şərabçılıq müəssisələrinin istehsal potensialından maksimum səviyyədə istifadə etməklə ölkədə şərab ixracı 2025-ci ilədək 5 dəfə artırılacaq. Həmçinin, şərab və şərabçılıq məhsullarının rəqabət qabiliyyəti yüksəldiləcək. Bununla yanaşı, üzüm bağlarının hər hektarına görə gübrə və pestisid üçün ödənilən subsidiya məbləğinə yenidən baxılacaq. Yəni buna görə verilən subsidiyaların məbləği artırılacaq.
O da məlumdur ki, qeyri-neft sektorunun tərkib hissəsi olan şərabçılıq çox gəlirli sahədir. İstər ölkə daxilində, istərsə də xaricdə şərab məhsullarına tələbat böyükdür. Ancaq o da var ki, bu sahədə böyük rəqabət var. Ona görə də Azərbaycanda bununla bağlı görüləsi vacib iş şərab məhsullarının rəqabət qabiliyyətini artırmaqdır. Bu baxımdan ekspertlərin məlum qərardan sonra gözləntiləri və təklifləri nədir? Məsələyə münasibət bildirən iqtisadçı-ekspert Vüqar Bayramovun sözlərinə görə, Azərbaycanın bu sahədə ənənələri olduğu üçün, şərabçılığın inkişafında nailiyyətlər əldə etmək mümkündür: “Azərbaycan keçmiş SSRİ ölkələr içərisində şərab istehsalı ilə məşğul olan respublikalardan biri olub. Həmin dövrdə Azərbaycan Rusiya başda olmaqla, bir sıra müttəfiq respublikalara şərab ixracatını həyata keçirirdi. Ona görə də şərabçılıq Azərbaycan üçün ənənəvi sektor olduğundan, bu sahənin yenidən inkişaf etdirilməsi mümkündür. Ancaq nəzərə almaq lazımdır ki, şərabçılıq rəqabətli bir sahədir. Bu sahədə ciddi rəqabət var. O cümlədən Azərbaycanın yerləşdiyi regionda şərabçılıqla bağlı güclü rəqabət var. Xüsusən də qonşu Gürcüstanda bu sahə çox yaxşı inkişaf edib. Nəzərə alsaq ki, regionda şərab istehsalına görə Gürcüstan kimi ölkə var, o zaman çox çalışmaq lazımdır. Ona görə də şərabçılığın inkişafı zaman tələb edir. Rəqabətin güclü olmasına baxmayaraq, Azərbaycanın mövcud iqlimi, şərabçılıq üzrə olan ənənəsi bu sektorun inkişaf etdirilməsinə imkan yaradır. Güman edirəm ki, mövcud imkanlar daxilində Azərbaycanda şərabçılığın inkişafı və xüsusən ixracın genişləndirilməsi mümkündür. Bunun üçün bazar var. Azərbaycan sözügedən bazara çıxış imkanlarını artırmaqla, daha çox şərab istehsalını və ixracını təşkil edə bilər. Ümumən Azərbaycan şərabı beynəlxalq miqyasda əvvəlki nüfuzunu bərpa edir. İştirak etdiyi sərgilərdə Azərbaycan şərabçılıq məhsullarının yüksək mükafatlara layiq görülməsi bunu sübut edir. Azərbaycanda şərab istehsalında artım da var. Belə ki, 2016-cı ildə Azərbaycanda 982 min dekalitr üzüm şərabı istehsal olunub. Bu, 2015-ci illə müqayisədə 20 faiz çoxdur. 2017-ci ildə Azərbaycandan şərab ixracı 68 faiz artıb. Belə ki, ötən il Azərbaycan 6 milyon dollar dəyərində şərab məhsulu ixrac edib. Təbii ki, bu elə də böyük rəqəm deyil, amma qarşıdakı illərdə mövcud potensialdan səmərəli istifadə olunsa, əldə edilən gəlirlər daha böyük həcmdə olacaq”.
Vidadi ORDAHALLI
