Qadir Bayramlı: “Bu sahə barədə fermerlər yetərincə məlumatlı deyillər”
Azərbaycan Standartlaşdırma İnstitutu və “Qida məhsullarının standartlaşdırılması üzrə Texniki Komitə tərəfindən ekoloji təmiz kənd təsərrüfatı məhsullarına dair milli standart layihələri hazırlanıb.
Standartlaşdırma, Metrologiya və Patent üzrə Dövlət Komitəsinin yaydığı məlumatda qeyd olunur ki, standart layihələr “Orqanik istehsal məhsulu. İstehsal, saxlanma və daşınma şərtləri”, “Orqanik qida məhsulları, “Termin və təriflər” və “Orqanik məhsulların istehsalı, emalı, markalanması və etiketlənməsi üzrə rəhbər sənəd”dən ibarətdir.
“Orqanik istehsal məhsulu. İstehsal, saxlanma və daşınma şərtləri” standart layihəsi orqanik istehsal məhsulları olan bitki, heyvan, mikrob mənşəli materiallara, həmçinin, təbii balıqçılığa, emal və təkrar emal edilmiş halda, insanın qidasında istifadə edilən, heyvanlar üçün yem kimi istifadə edilən əkilmiş və səpilmiş materiallara aid edilir və onların istehsalı (hazırlanması), saxlanması və nəql edilməsi tələblərini müəyyən edir.
“Orqanik qida məhsulları. Termin və təriflər” standart layihəsi orqanik qida məhsulları və orqanik istehsal tələblərinə cavab verən, orqanik kənd təsərrüfatı, meşə təsərrüfatı, su ekosistemləri və arıçılıq təsərrüfatı mənbələrindən istehsal edilmiş, orqanik məhsullar və onların emal məhsullarının istehsalı, tərkibi və xüsusiyyətləri sahəsində termin və tərifləri müəyyən edir.
Azərbaycan Standartlaşdırma İnstitutu tərəfindən hazırlanmış standart layihələri rəy alınması üçün aidiyyəti qurumlara təqdim olunub.
Ekoloji təmiz kənd təsərrüfatı məhsullarına dair milli standart layihələrinin hazırlanmasına münasibət bildirən Azərbaycan Dövlət İqtisad Universitetinin dosenti Qadir Bayramlı “Bakı-Xəbər”ə açıqlamasında qeyd etdi ki, ekoloji kənd təsərrüfatı məhsullarına tələb dünyada böyükdür: “İnkişaf etmiş ölkələr, xüsusilə də Avropa ölkələri idxal olunan məhsulları öz sərhədlərində yoxlamaq imkanına malikdirlər. Bunun üçün onların xüsusi laboratoriyaları var. Həmin məhsulların tərkibində hər hansı bir spesifik maddə və ya gübrə çox olarsa, o ölkələrdə məhsul qəbul olunmur. Bu səbəbdən də ölkənin daxilində ekoloji məhsulların yetişdirilməsinə, gübrə verilməsi prosesinə güclü nəzarət olunmalıdır. Eyni ilə ölkənin çıxışında da buna diqqət etmək lazımdır”.
Həmsöhbətimiz hesab edir ki, ekoloji kənd təsərrüfatı məhsullarının olması üçün ilk növbədə ölkə daxilində xüsusi laboratoriyalar yaradılmalıdır: “Laboratoriya olarsa, o məhsulların keyfiyyətinə nəzarət edilər. Həmçinin, bu sahə barədə fermerlər yetərincə məlumatlı deyillər. Fermerlərin ekoloji məhsul haqqında məlumatlı olması üçün onlara xüsusi təlimlər keçilməlidir”.
Q.Bayramlı onu da əlavə etdi ki, normalda Azərbaycan ekoloji təmiz məhsul yetişdirmək imkanına malikdir. Bu imkanlardan səmərəli istifadə olunarsa, ixracatda həmin məhsulların payını artırmaq olar.
Günel CƏLİLOVA
