ABŞ-da Konqresə aralıq seçkilərə iki həftədən bir qədər çox qalmış ölkə daxilində "No Kings" ("Krallar Yoxdur") hərəkatı tərəfindən tədbirlər təşkil edilib. Prezident Donald Trampın siyasətinə qarşı çıxmaq və seçiciləri səfərbər etmək məqsədi daşıyan bu təşəbbüs çərçivəsində 50 ştatın hamısında 3000-dən çox tədbir keçirilərək, “Kral istəmirik!” şüarları səsləndirilib. "No Kings: Erkən Səs Verin" şüarı altında keçirilən kampaniyanın təşkilatçıları amerikalıları 3 noyabr seçkilərindən əvvəl erkən səsvermə imkanlarından yararlanmağa çağırıblar.
Təşəbbüsün əsas məqsədi seçki prosesində vətəndaş iştirakçılığını artırmaqdır. Nyu-York, Los-Anceles, Çikaqo, Filadelfiya və Atlanta da daxil olmaqla, bir çox Amerika şəhərində etiraz tədbirləri keçirilib. "No Kings" etirazları kütləvi toplaşmalar əvəzinə avtomobil yürüşləri və konsertlərlə yadda qalıb. Bəzi şəhərlərdə kampaniya çərçivəsində genişmiqyaslı mitinqlər əvəzinə avtomobil yürüşlərinə, konsertlərə və yerli icma görüşlərinə üstünlük verilib. Poçt vasitəsilə erkən səsvermə isə ABŞ-da siyasi mübahisə mövzusu olaraq qalır. Donald Tramp saxtakarlıq riskini əsas gətirərək bu təcrübəyə dəfələrlə qarşı çıxıb, lakin iddialarını təsdiqləyəcək tutarlı sübutlar təqdim edə bilməyib. Demokratlar iddia edirlər ki, Trampın tətbiq etməyə çalışdığı poçtla səsverməyə dair məhdudiyyətlər seçicilərin müəyyən qruplarının səsvermədə iştirakına mane ola bilər; ictimai rəy sorğularına əsasən, Demokrat seçicilər bu sistemdən Respublikaçılara nisbətən daha tez-tez istifadə edirlər. 2025-ci ildə yaranan "No Kings" hərəkatı Trampı avtoritar idarəetmə üslubunda və demokratik institutları zəiflətməkdə ittiham edir. Təşkilatçıların sözlərinə görə, aralıq seçkilər ABŞ Nümayəndələr Palatasına və Senata hansı partiyanın nəzarət edəcəyini müəyyənləşdirəcək. Son sorğular göstərir ki, Demokrat Partiyası Nümayəndələr Palatasında çoxluğu yenidən əldə edə bilər, Senat uğrunda mübarizə isə olduqca gərgin keçir.
SAMİRƏ
