Azərbaycanla bağlı siyasi parçalanma var? Ortağı Dövlət Bahçalı, hakimiyyət sütunlarından biri Binəli Yıldrım, "danışmanı" Gürşad Soylu Azərbaycanla bütün məsələləri suverenlik və daxili qanunlara hörmət üstündə qurmağı tövsiyə edirlər. Həmin anda sayın Ərdoğanın baş müşaviri Oktay Saral, AKP-nin Məclisdə qrup başqan müavini leyla Şahin isə tam fərqli mövqedə Azərbaycan hökumətinin məktəbdə hicab mövzusuna baxışını "vicdansızlıq" adlandırır..
Tibbdə "bir başda 2 fərqli ağıla"şizofreniya deyilir...
Hakimiyyətlərdə isə "2 ağılın" adı siyasi parçalanmadır....
Bunu "Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
AKP iqtidarı mütləq parçalanmaya doğru gedir. Ən azı Dövlət Bahçalının həqiqətən Türkeşdən gələn millətçi məfkurəsi varsa, dünən şahzadə Salmanı qatil, Sisini islam düşməni adlandıraraq bu gün onları pula görə qucaqlayan qeyri-stabil birinin yanında uzun müddət qalacağını düşünmürəm. Türkiyə kimi bir dövləti, onun cəmiyyətini dini təriqət hakimiyyətinin maddi-siyasi maraqları üstündə iki düşmən düşərgəyə parçalamağın çox ağır bədəli olacaq...
AKP-yə qədər qardaş Türkiyədə sadəcə rəqabətli seçki parçalanmaları var idi, çox normal idi, seçki dövründə bir-birinə sivil qaydada o ki var, deyib seçkidən sonra yenə birlikdə yola davam edirdilər. AKP iqtidarı Türkiyə cəmiyyətini maddi maraqlar, klan-tayfa mənafeləri üstündə iki qatı düşmən düşərgəyə böldü. Siyasi rəqibləri şərləyib tutmaq, siyasi rəqiblərin şəxsi yataqlarına kamera qoydurmaq kimi tərbiyəsizliyi də Türkiyəyə bu iqtidar gətirdi... Ölkə siyasətinə belə qeyri-siyasi düşmənçiliklər gətirmiş AKP iqtidarından sonra hansı iç "razborkaların" gedəcəyini təsəvvür edə bilirsiniz?
Çalışın, təsəvvür edin... Ölkənin namuslu və vətənsevər generallarını, zabitlərini öz korrupsiyaçı, klanbaz hakimiyyətini uzatmaq xatirinə dəstə ilə şərlədərək urvatsız gündə fiziki məhv etdirən, psixoloji repressiyalar mühitində onları adsız məzarlıqlarda və hətta zibilliklərdə dəfnə məhkum etdirən AKP iqtidarı başqasına din, insanlıq, vicdan, mənəviyyat dərsi keçə bilməz!...
Hicab Azərbaycanda böyük bir kəsimin dini dəyərinə çevrilib. Heç kim onu qadağan etmir. Sadəcə məktəbli forması kimi zəruri bir kurs aparılır. Şagirdlərə məktəbli forması ildə bir dəfə dövlət hesabına pulsuz verilsə çox yaxşı olar. Hələ müəllimlərin də məktəbdə olduğu vaxt pulsuz vahid geyimlə təmin olunması haqda təcili düşünmək lazımdır. Hicab ümumən bir geyim forması kimi qadağan olunsa, şıxsən mən də bu yanaşmaya qarşı çıxaram... Ancaq məktəbi məktəb, məscidi məscid, mədrəsəni mədrəsə kimi qəbul etməyi öyrənməliyik...
Azərbaycan dövləti daxili siyasətinə aid bütün məsələləri, o cümlədən hicab mövzusunu öz cəmiyyəti ilə özü sivil qaydada həll edəcək. Kimsənin kənardan müdaxiləsinə ehtiyac yoxdur... Elə bilirsiniz AKP iqtidarından, şəxsən Ərdoğanın yaxın çevrəsindən Azərbaycana gələn basqılar həqiqi islam dini, onun dəyərləri ilə bağlıdır? Azərbaycanda qadın hüquqlarından danışmaq AKP iqtidarının indi niyə yadına düşüb? Ərdoğan üçün çox təhlükəli görünən yeni "cümhurbaşqanı seçkiləri" yaxınlaşdıqca AKP iqtidarı həm daxildə siyasi repressiyaları gücləndirir, həm də "külli- cahanı siyasi islamçılığa bürətdəmək kimi eyforiyanı" qızışdırırlar. Zatən Türkiyədə seçkidə "üstü-başı örtülü dindarlardan" başqa söykənə biləcəyi heç bir qüvvə qalmayıb, neçə dəfə məhz seçki xatirinə aldatdığı kürd xalqından da əhəmiyyətli seçki dəstəyi ala biləcəyi təxmin edilmir. Ölkədə seçicilərin mütləq çoxluğunun AKP iqtidarından bezdiyini ancaq siyasi korlar və AKP iqtidarından "süd əmciyi" tutanlar görməyə bilər. Zatən 2023-cü ildəki son prezident seçkilərində Ərdoğan müxalifət hesab olunan namizəddən cəmi bir neçə yüz min artıq səs almışdı. Ötən 3 ildə AKP-nin ictimai dəstəyinin daha da kiçildiyinə inanmayanların ağlına şübhə edirəm...
AKP-nin "trol ordusu" arta bilər, seçici ordusu yox...
Əgər seçici ordusu artıbsa, niyə müxalifətdən olan bələdiyyə sədrlərini başda İmamoğlu olmaqla, hətta qadın başqanları damlara basdırıb? Pul yeyiblər? Səbəbin bu olduğuna Türkiyədə ancaq cəhalət girdabına çəkdiyi dindarlar kütləsini inandıra bilərlər. Xalq görmür ki, Türkiyədə 900 milyardlıq "Fon korrupsiyasının " altından AKP-nin öz adamları çıxır?! Hələ illər öncəki ayaqqabı qutularında tutulmuş milyardların evdəki " şahzadəyə" aid olduğunu unutmayıblar...
AKP iqtidarının gücü yetsə Azərbaycanla yanaşı Mərkəzi Asiya türk dövlətlərində də "hicab vızılı-vızanı" salar… Çünki ona bunlar indi sırf seçki kontekstində hava-su kimi lazımdır. Soruşarsınız ki, seçkidə Türkiyə vətəndaşları səs verəcəksə, azərbaycanlıların bura nə dəxli var? Bəli, haqlı sualdır… Biz də soruşuruq ki, AKP iqtidarı öz müsəlmanlarının problemlərini həll etdi ki, böyük hay-küylə indi də bütün şərq müsəlmanlarının müdafiəsinə qalxıb?
Siz islam xəlifəsisiniz? Şərq müsəlmanlarının müdafiəsi üçün əməlli bir iş görsəydilər, üstündən keçmək olardı. Ancaq boş-boş çığırtılardan, şüarçı hay-küydən, oğlunu Türkiyəyə yeni prezident kimi sırımaq məqsədindən gələn bir neçə milyonluq Qalata körpü yürüşlərindən başqa nə etdilər? Soruşuruq ki, Türkiyə cəmiyyətinin qızıl enerjisini öz hakimiyyət maraqlarınız üçün belə ucuz xərcləmək haqqını sizlərə kim verib?! Axı o mənasız mitinqlərdə yandırılan kütləvi siyasi enerji türk xalqının sərvətidir...
Biz demirik ki, hakimiyyətə niyə öz oğlunu, ya kürəkənini gətirmək istəyirsən. Türkiyə xalqı bilər, siz bilərsiniz... Biz də bunun nə ilə bitəcəyini biləcəyik. Ancaq dediyimiz və tələbimiz budur ki, Türkiyədə emosional siyasi islam dalğasında həll etmək istədiyiniz hakimiyyət məsələsinə bizi - Azərbaycanı cəlb etməyə çalışmayın... Öz əlinizi öz başınıza çəkin...
Bizim qiymətli dindarlarımız da bilsinlər ki, AKP iqtidarı üçün Azərbaycanda hicab məsələsi üzlərinə tutduqları şirmadır… Onları həqiqi islam dəyərləri maraqlandırmır...
Həqiqi nüsəlman yalan danışar?
"Komuta qərargahım əmr etsə, papaz əlbisəsi geyinərəm" deyən adam həqiqi müsəlman sayıla bilər?! "Səudiyyə Ərəbistanı dönüb aynaya baxsın, Qəzzada cocuqların qətl edilməsində özü də iştirak edir" deyən birisi bu gün Səudiyyə ilə birlikdə şiə İrana qarşı ittifaq qurursa, ona hansı məntiqlə həqiqi müsəlman deyilir?!... Ərazisində bir müsəlman jurnalistin tikə-tikə doğranaraq yol çantalarında xaricə daşınmasının istintaq materiallarını cinayətdən 4 il sonra pulla Səudiyyəyə satanlardan həqiqi müsəlman olar?!... Suallar çoxdur...
AKP iqtidarı bu gün Türkiyənin bütün çevrə ölkələrində Türkiyənin himayəsi altında guya islama kütləvi bağlanış hərəkatının başladığı görüntüsü yaratmaqla həm özünü bəyan olunmamış "Xilafət dövləti" kimi göstərir, həm də bu dalğanın toz-dumanı içində Türkiyədə dindar kəsimin sayını artırmaqla prezident seçkilərini udmaq istəyir...
Azərbaycana hicab müdaxiləsinin arxasındakı hədəf budur...
Bizdə Ərdoğanın seçki təbliğatına qoşulanlar isə unutmasınlar ki, bura Azərbaycandır, Azərbaycanda başqa bir dövlət başçısının seçki təbliğatını aparmaq çox əndrəbadi görünür...
AKP başqadır, qardaşımız Türkiyə dövləti başqadır. AKP iqtidarı gəldi və gedəcək. Ancaq Azərbaycan - Türkiyə qardaşlığı əbədi qalacaq - orada da, burada da qanımızda türk qanı axacaq qədər...
Məgər AKP-dən qabaq Türkiyə - Azərbaycan qardaşlığı yox idi?!
Atatürkün dövründə bu qardaşlıq yox idi ki?! Var idi, həm də necə var idi...
Süleyman Dəmirəlin prezidentliyi dövründə qardaşlıq yox idi ki?! Var idi... 95-ci ildə baş nazir Tansu Çillər Azərbaycanda uğursuz dövlət çevrilişinə baş vuranda da qardaşlıq pozulmadı ki... Sadəcə Tansunun iqtidarı getdi...
Qardaşlıq isə qaldı... Yenə belə olacaq...
Tahir TAĞIYEV
