Əli Mustafa: “Əks təqdirdə dünyada münaqişələrin sayı daha da artacaq və BMT gərəksiz bir təşkilata çevriləcək”
Prezident İlham Əliyev AQEM-in 7-ci Zirvə Toplantısında çıxışı zamanı bəyan edib ki, BMT qətnamələrinin icrasını təmin edən mexanizmlər hazırlanmayana qədər münaqişələr davam edəcək:
“Mən bu məsələ üzərində ətraflı dayandım, çünki bu, qlobal əhəmiyyət daşıyır. BMT-nin Təhlükəsizlik Şurasının və digər beynəlxalq təşkilatlarının qəbul etdiyi qərar və qətnamələrin icrasını təmin edən mexanizmlər hazırlanmayana qədər müharibələr və münaqişələr davam edəcək və yeniləri meydana çıxacaq. Əgər işğal, soyqırımı və etnik təmizləməyə görə Ermənistana vaxtında sanksiyalar tətbiq edilsəydi, Azərbaycan döyüş meydanında erməni faşizminin belini qırmağa məcbur qalmazdı. Təcavüzkarın cəzasız qalması onun həyasızlığının miqyasını yalnız daha da artırırdı”.
Sözügedən məsələyə aydınlıq gətirən siyasi şərhçi Əli Mustafa baki-xeber.com-a açıqlamasında bildirdi ki, bu gün BMT dünyada hamının qəbul etdiyi beynəlxalq təhlükəsizliyə məhsul olan bir təşkilatdır: “Dünyanın ən nüfuzlu təşkilatı deyə bilərik. O cümlədən, dünyanın ən səlahiyyətli beynəlxalq qurumu deyə bilirik. Ancaq dünyada sülhə və təhlükəsizliyə cavabdeh olan bu qurumun həqiqətən də qəbul edən qərarların həyata keçirilmə mexanizmi yarımçıqdır. BMT Təhlükəsizlik Şurasının qətnamələrinin icra mexanizminin effektiv işləməməsi müasir beynəlxalq hüququn və qlobal təhlükəsizliyin ən böyük problemlərindən biri olaraq qalır. Bunun bir neçə səbəbi var. Təhlükəsizlik Şurasının 5 daimi üzvü (ABŞ, Rusiya, Çin, Böyük Britaniya və Fransa) geniş veto hüququna malikdir. Qəbul edilməsi planlaşdırılan hər hansı bir qərar bu dövlətlərdən birinin milli və ya geosiyasi maraqlarına toxunursa, qətnamə dərhal veto edilir. Digər tərəfdən böyük dövlətlər ikili standartlardan çıxış edərək öz müttəfiqlərini qorumaq üçün beynəlxalq hüququn pozulmasına göz yumur və ya sanksiya qərarlarını bloklayır. Göründüyü kimi, BMT qərarlar qəbul edir, amma icrasını təmin edə bilmir. Ona görə də sözügedən məsələ çox aktualdır. Həqiqətən də BMT qalacaqsa və beynəlxalq sülhə, təhlükəsizliyə cavabdehlik daşıyarsa, o halda onun qəbul etdiyi qərarların icra mexanizmlərini təmin etmək lazımdır. Ona görə ki, BMT praktiki olaraq sülhə və təhlükəsizliyə təhdid olan hər hansı bir məsələni zərərsizləşdirə bilsin. Bunun BMT-ni real, praktiki mexanizmləri olmalıdır. Əks təqdirdə dünyada münaqişələrin sayı daha da artacaq və BMT gərəksiz bir təşkilata çevriləcək”.
Vidadi ORDAHALLI
