SpaceX şirkətinin milyarder sahibi Elon Maskın sözlərinə görə, Starlink sistemləri hücum hərbi əməliyyatları üçün nəzərdə tutulmayıb.
"Starlink-in istifadəsi mülki və ya müdafiə fəaliyyətləri ilə məhdudlaşır və hərbi hücum əməliyyatları üçün istifadə edilə bilməz, çünki bu cür istifadə kommersiya şirkəti üçün uyğun deyil" - deyə o, X-də yazıb.
Mask bunu Ukraynanın keçmiş müdafiə naziri Mixaylo Fedorovun Ukrayna PUA-larının Starlink şəbəkəsinə bağlantısının tədricən bərpası ilə bağlı açıqlamasına cavab olaraq bildirib. Daha əvvəl Ukrayna SpaceX-in Ukrayna Silahlı Qüvvələrinin dronları üçün bağlantını məhdudlaşdırdığını iddia etmişdi.
Fedorovun keçmiş müşaviri Sergey Sternenkonun sözlərinə görə, dron 60-70 km/saat sürətə (əvvəlki 160 km/saat əvəzinə) çatdıqda Starlink-in internet bağlantısı işləməyib və bu da bir neçə əməliyyatı pozub. 14 oktyabr gecəsinə qədər heç bir əlaqə məhdudiyyəti yox idi və ukraynalılar Starlink-dən yalnız ölkənin beynəlxalq səviyyədə tanınmış ərazisində istifadə edə bilirdilər. Ukrayna Prezidentinin müşaviri Sergey Beskrestnov bildirib ki, bu, Starlink-in hərbi seqmenti olan Starshield-ə qoyulan məhdudiyyətlərə aiddir.
Maskın sözlərinə görə, Starshield ABŞ hökumətinə məxsusdur və ABŞ Prezidenti tərəfindən idarə olunur. O yazıb: "İstənilən sürət və ya istifadə məhdudiyyətləri ABŞ ordusu tərəfindən müəyyən edilir".
Fedorov öz növbəsində Maskı Ukrayna Silahlı Qüvvələrinin Starlink internetinə çıxışını tam bərpa etməyə çağırıb. O yazıb ki, "Starshield şəbəkəsində sürət limitinin tamamilə qaldırılması hazırda Ukraynanın müdafiəsi üçün çox vacibdir".
Prezident Zelenski isə vurğulayıb ki, Rusiya təyyarələri və digər PUA-larla mübarizə aparan Ukrayna müdafiə dronlarının uğurlu fəaliyyəti "əhəmiyyətli dərəcədə" Starlink şəbəkəsindən asılıdır. O əlavə edib ki, Rusiya ordusu hazırda Ukrayna Silahlı Qüvvələrinin rabitə problemlərindən istifadə etməyə çalışır.
Tahir TAĞIYEV
