Məhərrəm Zülfüqarlı: “Azərbaycana qarşı kampaniyanın sərhədlərin açılması üçün edildiyini qəbul etmirəm”
Son günlər Türkiyə ilə Ermənistan arasında aktivləşən diplomatik təmaslar, bu kontekstdə Türkiyənin xarici işlər naziri Hakan Fidanın ermənistanlı həmkarı Ararat Mirzoyanla apardığı telefon danışığı və infrastruktur layihələri ətrafındakı müzakirələr Cənubi Qafqazda diqqəti yenidən bu xəttə yönəldib.
Bu arada Ermənistanın xarici işlər naziri Ararat Mirzoyan bildirib ki, Türkiyə ilə sərhədlər açıla bilər: “Türkiyə ilə münasibətlərimizi normallaşdırırıq. Hələlik sərhəd bağlıdır, lakin düşünürəm ki, proses artıq kifayət qədər irəliləyib və tamamilə mümkündür ki, sabah səhər yuxudan oyandıqda xəbərlərdə "Ermənistan-Türkiyə sərhədi açıldı" başlığını görək”.
O da məlumdur ki, Türkiyənin hakim partiyası olan AKP-nin timsalında Azərbaycana qarşı hicabla, Fələstinlə bağlı müəyyən kampaniya aparılır. Maraqlıdır, AKP-dən Azərbaycana qarşı kampaniyaların məqsədi bu ola bilərmi ki, türk ictimaiyyətində Azərbaycanın neqativ imici yaradılsın, daha sonra Ermənistanla sərhədi açsınlar?
Sözügedən məsələni baki-xeber.com-a şərh edən tarix elmləri doktoru, professor Məhərrəm Zülfüqarlının fikrincə, Ermənistan-Azərbaycan, Ermənistan-Türkiyə münasibətlərinin normallaşması mərhələ-mərhələ davam edir: “8 avqust 2025-ci ildə Vaşinqtonda Azərbaycan və Ermənistan arasında tarixi sülh sazişinin layihəsi paraflanıb və birgə bəyannamə imzalanıb. Görüş ABŞ Prezidenti Donald Trampın vasitəçiliyi və iştirakı ilə baş tutub. Bundan sonra tərəflər arasında sülh prosesi gedir. Baxmayaraq ki, Azərbaycanla Ermənistan arasında hələ sülh sazişi imzalanmayıb. Buna mane olan qüvvələrin olmasına baxmayaraq proses gedir. Onu da qeyd edim ki, Türkiyə-Ermənistan, Azərbaycan-Ermənistan danışıqları paralel gedir. Artıq bir sıra uğurlar əldə edilib, bəzi nəticələr var. Paşinyanın bəyanatlarında da görsənir ki, bu cür niyyət var. Qaldı buna mane olan qüvvələrə, birinci növbədə Rusiya buna mane olur. Moskva istəməz ki, tərəflər arasında problemlər həll olunsun. Türkiyədə çoxsaylı ideologiyalar, partiyalar var. Bunların içərisində türkçülüyü, Azərbaycan ideologiyasını dəstəkləyənlər də var. Buna soyuq münasibət bəsləyənlər də. İndiki dövrdə hicabla bağlı Türkiyədə bəzi qüvvələr Azərbaycana qarşı xoşagəlməz fəaliyyətlə məşğul olurlar. Onlar əlbəttə, Türkiyə-Azərbaycan qardaşlığının əleyhinə olan qüvvələrdir. Türkiyə-Ermənistan sərhədlərinin açılması, Türkiyə-Azərbaycan münasibətlərinə soyuqluq gəirməyəcək. Bununla bağlı heç nə yoxdur. Əsas məsələ Rusiyanın Cənubi Qafqazdan caynağının çəkilməsidir. Türkiyə sərhədi ona görə bağlamışdı ki, Ermənistan ərazilərimizi işğal etmişdi. İşğal ortada qaldırılıb, münasibətlər normallaşır. Ona görə də sərhədlərin açılması Azərbaycanla Ermənistan arasında sülh sazişiin imzalanmasına dəstək ola bilər. Azərbaycana qarşı kampaniyanın sərhədlərin açılması üçün edildiyini qəbul etmirəm. Ayrı-ayrı türk rəsmilərinin səsləndirdiyi fikirlər Türkiyənin dövlət siyasətinə heç bir dəxli yoxdur”.
Vidadi ORDAHALLI
