Zaur İbrahimov: “Əslində isə bu cür fikirlərin söyləniməsi manipulyasiya cəhdidir”
Ermənistanın baş naziri Nikol Paşinyan hökumətin iclasında Azərbaycanla humanitar sahədə bəzi həll edilməmiş məsələlər qalır. N.Paşinyan burada mina xəritələrini, itkin düşmüş şəxslərlə bağlı məlumat mübadiləsini və Bakıda mühakimə olunmuş və barələrində hökm çıxarılmış separatçılarla bağlı məsələləri vurğulayıb. Paşinyanın sözlərindən belə çıxır ki, iki məsələnin-mina xəritələri və əsir və itkin düşmüş, girov götürülmüş Azərbaycan vətəndaşları haqda məlumatın müqabilində separatçıları azad etmək istəyirlər.
Bu üç məsələnin bir yerdə vurğulanması əslində ona işarədir ki, separatçıları azad etdirə bilsinlər.
Yəni Paşinyan “Azərbaycan separatçıları azad etsə biz də minalanmış ərazilərin xəritələrini verəcəyik, itkin düşmüş şəxslərlə bağlı məlumatları da sizinlə paylaşacağıq”-demək istəyir. Yəni Ermənistanın belə bir alver etmək niyyəti ortalıqda görsənir
Politoloq Zaur İbrahimov baki-xeber.com-a bildirdi ki, müharibə qanunları, beynəlxalq humanitar hüquq və Cenevrə konvensiyaları çərçivəsində tərəflərin qeyd-şərtsiz təmin etməli olduğu, mülki insanların həyatına və ailələrin taleyinə birbaşa bağlı olan öhdəliklərdir. “Ermənistan tərəfi indiyədək təqdim etdiyi xəritələrin dəqiqliyinin çox aşağı olduğunu özü də etiraf edib. Azərbaycan qanunvericiliyinə görə, separatçı rejimin rəhbərləri (hərbi cinayətlər, terrorçuluq, dövlət çevrilişinə cəhd və qanunsuz silahlı birləşmələr yaratmaqda ittiham olunanlar) hərbi əsir deyil, konkret ağır cinayətlərdə təqsirləndirilən şəxslərdir. Paşinyan bunları eyni cümlədə sadalamaqla beynəlxalq ictimaiyyətin gözündə belə bir təəssürat yaratmağa çalışır ki, hər iki tərəf humanitar məsələlərdə güzəştə getməlidir. Əslində isə bu cür fikirlərin söyləniməsi manipulyasiya cəhdidir”.
Z.İbrahimovun fikrincə, Ermənistan daxilində radikal müxalifət Paşinyanı “Qarabağ liderlərini” taleyin ümidinə buraxmaqda ittiham edir. “Paşinyan bu məsələni gündəmdə saxlamaqla həm daxili tənqidləri neytrallaşdırmaq, həm də məsuliyyəti Azərbaycanın üzərinə atmaq niyyəti güdür. Paşinyan məqsədli şəkildə, həm hüquqi, humanitar mahiyyəti fərqli olan məsələri ümumi humanitar öhdəliklər kimi qələmə verir. Azərbaycan ölkəmizə qarşı hərbi, insanlıq əlehinə cinayətlər törətmiş şəxsləri geri qaytarmaq öhdəliyinə malik deyil. Bu hər hansı beynəlxalq konvensiya, yaxud razılaşma ilə də müəyyən edilməyib. Əksinə Azərbaycanın bu şəxsləri mühakimə etmək hüququ var və onların məhkəmə qarşısında cavab verməsi təmin olunub. Onların cinayətləri tam sübuta yetirilib, onlara məhəkəmədə özlərini müdafiə etmək üçün bütün şərait yaradılıb. Paşinya yenə su bulandırır, dinc Bərdəmizə, Gəncəmizə raketlə atəş əmrini verən, ölkmizə qarşı hərbi əməliyyatlar aparmaq üçün silahlı dəstələr yaradan, silahlandıran, dinc insanları kütləvi qətl edənləri necə geri verə bilərik? Paşinyan humanaitar öhdəliklər deməklə bu gerçəklik yox ola bilməz. Hərbi cinayətlərdə və separatizmdə ittiham olunanlar məhkəmə qarşısında cavab veriblər, onların "hərbi əsir" statusu yoxdur. Dəqiq mina xəritələrinin verilməsi və itkinlərin taleyinin aydınlaşdırılması isə Ermənistanın humanitar öhdəliyidir və heç bir siyasi şantaj predmeti ola bilməz”-deyə politoloq qeyd etdi.
İradə SARIYEVA
