Ermənistan Xarici işlər nazirinin müavini Robert Abisoqomonyan İrəvanda keçiriləcək COP17 sammitində Azərbaycan və Türkiyə nümayəndələrinin iştirak edib-etməyəcəyi barədə məlumatlı olmadığını bildirib. Onun sözlərinə görə, qeydiyyatı BMT-nin müvafiq katibliyi aparır və Ermənistan tərəfi yalnız qeydiyyatdan keçənlərin ümumi sayını bilir. Hazırda bu rəqəm 13 mini ötüb.
Nazir müavini sammitin təşkili üçün çəkiləcək xərclərin dəqiq məbləğini açıqlamayıb. O, BMT-nin müəyyən etdiyi ekoloji standartlara əməl edilməsinin vacibliyini vurğulayaraq, tədbirin ölkəyə siyasi və iqtisadi baxımdan imkanlar qazandıracağını bildirib. İrəvanın hava çirkliliyi ilə bağlı suala isə sammitin mövcud problemlərin həllinə töhfə vermək məqsədi daşıdığını söyləməklə cavab verib.
Abisoqomonyan Ermənistan parlamentində müzakirə olunan TRIPP layihəsi üzrə razılaşmanın oktyabrın sonunadək təqdim edilə biləcəyini qeyd edib.
Ermənistan 2024-cü ildə Bakıda keçirilən COP29 sammitində iştirak etməmişdi. İndi isə İrəvanda keçiriləcək COP17 sammitində Azərbaycan nümayəndə heyətinin iştirakı məsələsi gündəmdədir. Azərbaycan Ermənistanın COP29-da iştirak etməməsinə cavab olaraq eyni addımı atacaq, yoxsa qarşılıqlı etimadın möhkəmləndirilməsi və münasibətlərin normallaşdırılması naminə fərqli mövqe nümayiş etdirəcək?
İlqar Vəlizadə: “Ermənistan nümayəndələrinin Azərbaycanda, Azərbaycan nümayəndələrinin isə Ermənistanda keçirilən tədbirlərdə iştirakı adi hala çevrilə bilər”
Politoloq İlqar Vəlizadə “Bakı-Xəbər” qəzetinə müsahibəsində Azərbaycan və Ermənistan nümayəndələrinin qarşılıqlı beynəlxalq tədbirlərdə iştirakı ehtimallarını şərh edib. O bildirib ki, COP29-dan ötən müddətdə regionda və dünyada siyasi vəziyyət dəyişib, Azərbaycan-Ermənistan dialoqunda da əhəmiyyətli irəliləyişlər baş verib.
Politoloqun sözlərinə görə, ötən il avqustun 8-də Vaşinqtonda imzalanmış sənəd regionda yeni siyasi mühitin formalaşmasına şərait yaradıb. Son bir ildən artıq müddətdə hər iki ölkənin nümayəndə heyətlərinin qarşılıqlı səfərləri və təmasları da münasibətlərdə yeni mərhələnin yarandığını göstərir.
İlqar Vəlizadə hesab edir ki, qarşıdakı illərdə Azərbaycan və Ermənistan nümayəndələrinin bir-birinin ölkəsində keçirilən beynəlxalq tədbirlərdə iştirakı daha geniş xarakter ala bilər. O qeyd edib ki, 2027-ci ildə Ermənistanda Avropa Siyasi Birliyinin sammitinin keçirilməsi gözlənilir. 2028-ci ildə isə Azərbaycanda Avropa Siyasi Birliyinin sammitinin və MDB sammitinin təşkili gündəmdədir. Ermənistanın hər iki təşkilatla əlaqələri nəzərə alınarsa, onun nümayəndələrinin Azərbaycanda keçiriləcək tədbirlərdə iştirakı ehtimalı istisna edilmir.
Politoloq vurğulayıb ki, belə təmasların genişlənməsi üçün əsas şərtlərdən biri Azərbaycanla Ermənistan arasında sülh müqaviləsinin imzalanmasıdır. Onun fikrincə, sülh sazişi əldə olunarsa, Azərbaycan Prezidentinin İrəvana səfəri də mümkün variantlardan biri ola bilər. Hətta sazişin 2027-ci ildə Ermənistanda keçiriləcək Avropa Siyasi Birliyinin sammiti çərçivəsində imzalanması ehtimalını da istisna etmək olmaz. Bununla belə, Vəlizadə bu ssenariyə ehtiyatla yanaşdığını bildirib.
İlqar Vəlizadə hesab edir ki, yüksək səviyyəli siyasi təmaslar üçün sülh müqaviləsinin imzalanması mühüm əhəmiyyət daşısa da, nazir və digər yüksəkvəzifəli rəsmilər səviyyəsində qarşılıqlı səfərlər bundan əvvəl də baş verə bilər. O, İrəvanda keçiriləcək beynəlxalq iqlim tədbirində Azərbaycanın nümayəndə heyətinin iştirakını da mümkün sayıb və bu təmsilçiliyin ən azı Muxtar Babayev səviyyəsində ola biləcəyini ehtimal edib.
Politoloqun qənaətinə görə, Azərbaycan və Ermənistan nümayəndələrinin qarşılıqlı beynəlxalq tədbirlərdə iştirakı tədricən adi praktikaya çevrilə bilər. Bu proses iki ölkə arasında münasibətlərin normallaşmasına və siyasi dialoqun genişlənməsinə töhfə verə bilər.
Akif NƏSİRLİ
