Məhəmməd Əsədullazadə: “Tramp bununla nəinki Ukraynanı, bütün düyanı təhdid altında qoymaq istəyir”
Birləşmiş Ştatlar Rusiyanın neft sənayesinə endirilən zərbələrə görə Ukraynanı kəşfiyyat məlumatlarının ötürülməsini məhdudlaşdırmaqla hədələyib.
“Financial Times” qəzetinin yaydığı məlumata görə, Mayamidə keçirilən danışıqlar zamanı Amerika tərəfi Ukrayna nümayəndə heyətinə xəbərdarlıq edib ki, əgər rəsmi Kiyev Rusiyanın neft emalı zavodlarına zərbələri dayandırmasa, kəşfiyyat məlumatlarının mübadiləsi azaldıla bilər. Ukrayna belə bir öhdəlik götürməkdən imtina edib və neft emalı sənayesinin birbaşa Rusiya ordusunu yanacaqla, eləcə də dövlət büdcəsini gəlirlə təmin etdiyini vurğulayıb.
Trampın utanmadan Rusiya ilə dizel sövdələşməsinə getməsi azmış kimi, indidə ABŞ Ukraynanı kəşfiyyat məlumatlarını kəsəcəyi ilə hədələyir.
Sözügedən məsələni baki-xeber.com-a şərh edən politoloq Məhəmməd Əsədullazadənin fikrincə, Birləşmiş Ştatlar prezidenti Tramp dizel yanacağı ilə bağlı müqavilə imzalaması təbii ki, Ukrayna-Rusiya arasında vasitəçiliyə bir növ kölgə saldı: “Yəni bir daha aydın oldu ki, Tramp birmənalı şəkildə bu məsələdə Rusiyanı dəstəklədi və neytrallığı açıq şəkildə pozdu. Tramp bununla nümayişkaranə şəkildə Ukraynaya təzyiqləri artırır. ABŞ prezidenti Rusiyanı enerji atəşkəsinə məcbur etmək əvəzinə, Ukraynaya kəşfiyyat dəstəyini kəsəcəyi ilə bağlı təhdid edir. Bu isə tamamilə absurd yanaşmadır. Təbii ki, Ukrayna bunu qəbul etməyəcək. Yəni Rusiyanın enerji infrastrukturuna zərbələri davam etdirəcək. Məsələ ondadır ki, Trampın məlum qərarı ABŞ-da birmənalı qarşılanmayıb. ABŞ konqresmenlərinin bir çoxu bu qərarı kəskin tənqid ediblər. Yəni Trampın bu qərarına qarşı ABŞ daxilində müqavimət artır. ABŞ kəşfiyyat dəstəyini kəssə belə, Böyük Britaniya, Fransa, Almaniya kəşfiyyat məlumatlarını verəcək. Ancaq göründüyü kimi, Ukraynanın cəbhədə bir sıra uğurlara imza atdığı bir vəziyyətdə Tramp dəstəyi dayandırdı. Hesab edirəm ki. bu, bir növ Rusiya maraqlarına xidmət edir. Ancaq istənilən halda Ukrayna Trampın bu təzyiqləri qarşısında geri çəkilməyəcək, təslim olmayacaq və müqaviməti davam etdirəcək. Tramp bununla nəinki Ukraynanı, bütün duyanı təhdid altında qoymaq istəyir. Çünki Rusiya beynəlxalq hüquqa hörmət etməyən bir dövlətdir. Rusiyanın Ukraynada qalib olması beynəlxalq münasibətlər sisteminin təhlükəsizlik riskini artıracaq. Ona görə buna yol vermək olmaz”.
Vidadi ORDAHLLI
