Xəyal Bəşirov: “...Bundan şou yaratmaq məqsədi güdür”
Ermənistanda saxlanılan Azərbaycan Ordusunun əsgəri Nəsimi Rasim oğlu Musayev istintaqa ifadə verib. Onun istintaqa verdiyi ifadənin bəzi detalları Ermənistan mediasında (xüsusilə “Joxovurd” qəzetində) yayılıb. Əsgərimizin ifadəsində hadisə ilə bağlı məqamlar yer alıb. Nəsimi Musayev dindirmə zamanı Zəngəzur vilayətinin Şəki kəndində daxil olduğu evdə heç kimə xəsarət yetirmək və ya zərər vurmaq niyyətinin olmadığını bildirib.
O, ev sahibəsindən (Ani Avetisyan) onu buraxmasını dəfələrlə xahiş etdiyini, lakin qadın onun silahından yapışaraq əlindən almağa cəhd etdiyi üçün özünü müdafiə məqsədilə atəş açmaq məcburiyyətində qaldığını vurğulayıb. Əsgərimiz yazılı izahatında atəş hadisəsindən sonra qadın və ailə üzvlərinin ona hücum etdiyini, bıçaqla xəsarətlər yetirdiyini və onu döydüklərini bəyan edib.
Qeyd edək ki, Laçın istiqamətində xidmət edən Nəsimi Musayev sentyabrın 26-da naməlum şəraitdə itkin düşüb. Oktyabrın 1-də onun Ermənistan ərazisində saxlanıldığı məlum olub və oktyabrın 2-də barəsində yerli məhkəmə tərəfindən 2 aylıq həbs qətimkan tədbiri seçilib. Hazırda Beynəlxalq Qızıl Xaç Komitəsi (BQXK) əsgərimizlə bağlı müvafiq qurumlarla təmasları davam etdirir.
Erməni qadını Ani Avetisyan əsgərimiz Nəsimini Ermənistanda niyə saxlamaq istəyirdi?
Hüquqşünaslar və ekspertlər erməni tərəfinin bu iddialarını daxili siyasi məqsədlərə xidmət edən və əsgərimizin geri qaytarılmasını gecikdirmək üçün qurulmuş bir ssenari hesab edirlər.
Siyasi və Hüquqi Araşdırmalar Mərkəzinin (SHAM) sədri Xəyal Bəşirov baki-xeber.com-a bildirdi ki, Azərbaycan əsgəri Nəsimi Musayevlə bağlı məlumatlar Ermənistan tərəfindən yayılmaqda davam edir. Əsgərimizin hansı şəraitdə Ermənistan tərəfə keçməsini təbii ki, istintaq araşdırmalıdır. Ermənistan tərəfi obyektiv araşdırma aparsa və yaxud da Azərbaycanın müvafiq qurumları ilə birlikdə araşdırma aparmağa razılıq versə, biz obyektiv araşdırmanın nəticələrini görə bilərik. Təbii ki, bu başqa sualdır. Amma hər bir halda biz nəzərə alaq ki, Nəsimi Musayevlə bağlı Azərbaycanın hüquq-mühafizə orqanları da cinayət işi başlayıb. Azərbaycan Cinayət qanunvericiliyinə görə hərbi xidmət yerini 3 gündən 10 günə qədər tərk edən şəxslər barəsində özbaşına hərbi xidmət yerini tərk etmə maddəsi ilə cinayət işi açılır. Onun cəzası o qədər də ciddi və yaxud məsuliyyəti o qədər də ağır deyil. Səhv etmirəmsə 1 ilə qədər intizam xarakterli hərbi hissədə saxlama cəzası nəzərdə tutulur. Amma 10 gündən artıq artıq fərarlılıq maddəsinin təsiri altına düşür. Orada da, onun cəzası və məsuliyyəti daha ağırdır. Nəzərə alsaq ki, özünəməxsus olan silahı da özü ilə götürüb, bu, biraz da onun məsuliyyətini ağırlaşdırır. Amma nəzərə alaq ki, 10 gün ərzində geri qayıtmasına mane olan amillər var. Şəxs artıq Azərbaycan ərazisində deyil, Azərbaycan ərazisini tərk edib və Ermənistan ərazisindədir. Ermənistanın müvafiq qurumları tərəfindən saxlanılıb. O, istəsə belə ölkəyə və ya hərbi xidmət yerinə qayıtmaq imkanı yoxdur. Bunlar da yəqin ki, araşdırmada nəzərə alınacaq. Amma düşünürəm ki, Ermənistan tərəfinin zamanla fərqli-fərqli fikirlər səsləndirməsi, mövqe sərgiləməsi yenə də bu ölkənin qərəzliyindən, obyektiv olmamasından xəbər verir. Əvvəlcə iddia etdilər ki, qadına hücum edib, xəsarət yetirib, amma sonradan özünün ifadəsindən bəlli oldu ki, o, özünü qorumaq məqsədilə edib. Hər bir halda ekspertiza nəticəsində bəlli olacaq ki, Nəsimi Musayevin psixoloji durumu nə vəziyyətdə olub və yaxud indi nə vəziyyətdədir. Amma psixoloji durumu normal olan şəxs Ermənistan ərazisində hər hansı bir erməni vətəndaşına xəsarət yetirməsi mümkün olmaz. Əgər onun psixoloji durumu yerində olmayıbsa, bu da onun cinayət məsuliyyətini istisna edən hallardan biri ola bilər. Fikrimcə, Ermənistan tərəfi bundan şou yaratmaq məqsədi güdür. Ermənistan tərəfindən onun haqqında bir neçə maddə ilə cinayət işi başlayıb. Yəni kifayət qədər maddələr sadalaya bilərlər ki, o maddələrlə onun haqqında cinayət işi başlasınlar. Ermənistan tərəfin bu məsələ ilə bağlı nə dərəcədə obyektiv araşdırma apardığı da bizim üçün sual altındadır. Nəsimi Musayevin ifadələrini təzyiq altında verib-vermədiyi də bizə bəlli deyil. Düşünürəm ki, Ermənistan tərəfi bundan öncəki presidentlərdə Azərbaycan tərəfinin özünün bir əsgərinə, bir zabitinə, bir vətəndaşına görə səfərbər olması amilini nəzərə almaya bilməz. Yəni, yəqin ki, onlar bunu nəzərə alıblar. Məsələn, biz Milli Qəhrəmanımız şəhid Mübariz İbrahimovun nəşinin Ermənistandan alınması üçün bütün imkanlarımızı, resurslarımızı səfərbər etdik, dövlət olaraq, xalq olaraq biz bu məsələnin sonuna qədər arxasınca getdik. Daha sonra bizim vətəndaşlarımız Dilqəm və Şahbazın geri qaytarılması üçün Azərbaycan dövləti nələrdən keçdi. Digər presedentlər də, təcrübələr də var. Onlar çox gözəl anlayırlar ki, Azərbaycan əlindən gələni edəcək ki, onu geri qaytarsın. Onların bu sülh prosesi dönəmində ondan Azərbaycana qarşı istifadə etmək niyyətləri də ola bilər. Təbii ki, bu, sülhə mane olan hallardan biri olacaq”.
X.Bəşirov qeyd etdi ki, bu Ermənistan tərəfinin qeyri-səmimiliyini, qeyri-obyektivliyini ortaya qoyacaq. X.Bəşirovun sözlərinə görə, eyni zamanda zaman-zaman Ermənistan tərəfindən bəzi fikirlər səsləndirilir ki, Azərbaycanda ədalət mühakiməsi qarşısına çıxarılan separatçıları geri qaytarsınlar: “O terrorçu qruplaşmaları, separatçıları, Azərbaycanın Qarabağ ərazisində uzun müddət ağır cinayətlər törətmiş şəxsləri ədalət mühakiməsi qarşısına çıxarıb. Ermənistan onların əsgərimizlə dəyişdirilməsi ilə bağlı bu məsələdən bazarlıq predmeti kimi də istifadə edə bilər. Təbii ki, bütün bunlar yanlış yanaşmadır. Belə olarsa Ermənistanın sülh prosesinə qeyri-səmimi yanaşdığını ortaya qoyacaq. Amma hər bir halda mən düşünürəm ki, Ermənistan tərəfi həmişə olduğu kimi belə məsələlərdən istifadə etdiyi kimi, bu dəfə də belə bu məqsədlərlə istifadə etməsi istisna deyil.
Amma düşünürəm ki, Azərbaycan tərəfi də artıq Ermənistanla hansı dildə danışmalı olduğunu bilir. Ermənistan unutmamalıdır ki, indi nə Cənubi Qafqazdakı reallıq o reallıqdır, nə də vəziyyət əvvəlki vəziyyətdir. “İndiki Azərbaycan və eyni zamanda indiki Ermənistan da əvvəlki Azərbaycan və yaxud Ermənistan deyil ki, Ermənistan bu cür ucuz yollarla Azərbaycana qarşı hansısa bir təxribat törədə bilsin”-deyə X.Bəşirov qeyd etdi.
İradə SARIYEVA
