Akif Nağı: “Azərbaycan Prezidenti bir daha o təşkilatların başa düşəcəyi dildə onlara çatdırdı ki, siz saxtakarlıqla, riyakarlıqla məşğulsunuz, anaxronizm və atavizm də siyasətdə, tarix elmində heç kəs tərəfindən qəbul olunmur”
Azərbaycan Prezidenti İlham Əliyev Bakıda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) 7-ci Zirvə Toplantısındakı çıxışı zamanı Avropa Şurası və Avropa Parlamentini beynəlxalq münasibətlərdə anaxronizm və atavizmin iki nümunəsi kimi qiymətləndirib.
Prezident Əliyev bildirib: “Beynəlxalq münasibətlərdə anaxronizm və atavizmin iki nümunəsi olan Avropa Parlamenti və Avropa Şurası davamlı təcavüz qurbanı olan Azərbaycanı hədəfə alırdı və təcavüzkar Ermənistanı həvəsləndirirdi”.
Azad Vətən Partiyasının sədri Akif Nağı baki-xeber.com-a bildirdi ki, anaxronizm və atavizm bir-birini tamamlayan terminlərdir.
“Anaxronizm-hər hansı bir hadisənin, əşyanın, sözün və ya ideyanın öz tarixi dövrünə uyğun gəlməməsi, zaman baxımından səhv salınmasıdır. Atavizm- uzaq əcdadlarda mövcud olmuş, lakin təkamül nəticəsində itmiş bioloji əlamətlərin və ya xüsusiyyətlərin növbəti nəsillərdə qəfildən yenidən ortaya çıxmasıdır. Bu terminlər siyasi, tarixi və bioloji anlamda işlədilir.
Bu məsələ Prezident İlham Əliyevin qeyd etdiyi kimi, Avropa Parlamentində və Avropa Şurasında Azərbaycana qarşı qərəzli mövqenin göstəricisidir. Bu qurumlar əvvəldən Azərbaycanın dünənki siyasətinə də aid olmayan məsələləri ortaya atıb ölkəmizi əsassız yerə ittiham etməyə çalışırdılar. Bunun kökü 1992-ci ilin oktyabr ayına gedir. O vaxtlar ABŞ Konqresi Azərbaycana qarşı Azadlıq aktının 907-ci düzəlişini qəbul etdi və buna heç bir ehtiyac da yox idi. Tamamilə anaxronik bir mövqe idi. Azərbaycanı Ermənistanı guya blokadada saxlamaqda ittiham etdilər. Əslində, 1992-ci ilin oktyabrında Azərbaycanın keçmiş Dağlıq Qarabağ bölgəsi bütövlükdə Ermənistan silahlı qüvvələri tərəfindən işğal olunmuşdu, üstəlik də, tarixi Azərbaycan şəhəri Şuşa işğala məruz qalmışdı, eyni zamanda Dağlıq Qarabağın inzibati sərhəddlərindən kənara çıxaraq Laçını da işğal etmişdilər. Yəni işğala məruz qalan faktiki olaraq Azərbaycan olduğu halda Azərbaycanı “işğalçı” kimi təqdim etdilər. Yəni o dövrdən Azərbaycana qarşı Qərbin qeyri-səmimi, qeyri-obyektiv mövqeyi olub. Ondan sonra da bütün dövrlərdə, keçən əsrin 90-cı illərində, 2000-ci illərdə Azərbaycana qarşı həmişə qərəzli mövqedən çıxış edilib. Xüsusən də burada Avropa Parlamenti və Avropa Şurası çalışıb və bu gün də o siyasəti davam etdirirlər. Dünən etdikləri səhvləri etiraf etmək əvəzinə Azərbaycanı yenə də ittiham edirlərlər”.
A.Nağı qeyd etdi ki, Azərbaycan öz torpaqlarını BMT Nizamnaməsinin 51-ci maddəsinə uyğun olaraq müharibə yolu ilə düşmənin həm işğalına qarşı, həm də növbəti hücumlarına cavab verərək torpaqlarını işğaldan azad etdi. A.Nağı vurğuladı ki, Azərbaycan 2023-cü ilin sentyabrında növbəti addımı ataraq antiterror tədbirləri həyata keçirərək bütün ərazilərində suveren hüquqlarını bərpa etdi.
“Bu dünya qanunlarına da tam şəkildə uyğun gəlir. Amma buna baxmayaraq hər iki təşkilat bu məsələyə yenə də anaxronik mövqedən yanaşaraq və atavizm yanaşmasına sadiq qalaraq Azərbaycanı etmədiyi, həyata keçirmədiyi işlərdə ittiham edirlər. Bu səbəbdən də Prezident bu mesajı onların diqqətinə çatdırır ki, sizin dedikləriniz o vaxt da yalan idi, real deyildi, bu gün də onları təkrar etməklə bir daha özünüzü rüsvay edirsiniz, anaxronik mövqe nümayiş etdirirsiniz, reallığa uyğun olmayan mövqe sərgiləyirsiniz. Eyni zamanda nə vaxtsa dedikləri, hamının, hətta ermənilərin də unutduqları məsələləri yenidən gündəmə daşımağa çalırlar. Ermənistan rəhbərliyi Azərbaycanın ərazi bütövlüyünü və Qarabağdan ermənilərin çıxması faktını qəbul edir, Azərbaycanı bunda ittiham etmir, amma bu iki təşkilat yenə də atavizmdən, köhnə mövqedən əl çəkə bilmirlər, heç bir əsas olmadan Azərbaycanı yalançı iddialarla ittiham edirlər.
Azərbaycan Prezidenti bir daha o təşkilatların başa düşəcəyi dildə onlara çatdırdı ki, siz saxtakarlıqla, riyakarlıqla məşğulsunuz, anaxronizm və atavizm də
siyasətdə, tarix elmində heç kəs tərəfindən qəbul olunmur. Olunmayacaq da. Yalanlarla heç nə etmək mümkün deyil. Bunu Azərbaycan Prezidenti növbəti dəfə o təşkilatların diqqətinə çatdırdı”-deyə A.Nağı vurğuladı.
İradə SARIYEVA
