Samir Əliyev: “Ötən il nağdsız əməliyyatlarla bağlı qəbul olunan qanundan sonra debet kartlarına daxil olanların sayı daha da artdı”
Azərbaycan Mərkəzi Bankı rəqəmsal ödənişlərin istifadəsinin artırılması məqsədilə cari ildə ölkə üzrə kütləvi təbliğat və təşviqat kampaniyasının təşkil edilməsini planlaşdırır. Bu istiqamətdə artıq kommunikasiya planı hazırlanıb. Mərkəzi Bank Maliyyə Bazarlarına Nəzarət Palatası, Azərbaycan Banklar Assosiasiyası və bank ictimaiyyəti ilə birgə kommunikasiya planını icra edəcək.
Mərkəzi Bank sədrinin birinci müavini Alim Quliyev bildirib ki, ölkədə nağdsız ödənişlərin inkişafı Mərkəzi Bankın fəaliyyətinin mühüm prioritetlərindən biridir və bu istiqamətlərdə Azərbaycan Banklar Assosiasiyası, aidiyyəti dövlət qurumları, bank sektoru ilə birlikdə davamlı tədbirlər həyata keçirilir, layihələr reallaşdırır.
Onun sözlərinə görə, nağdsız ödənişlərin artırılması istiqamətində aparılmış məqsədyönlü tədbirlər nəticəsində son 5 il ərzində ödəniş kartları ilə aparılan nağdsız əməliyyatların həcmi 4,8 dəfə, POS-terminal vasitəsilə aparılan nağdsız əməliyyatların həcmi 4,6 dəfə, elektron ticarət vasitəsilə aparılan əməliyyatların həcmi isə təxminən 4 dəfə artıb.
Son 5 ildə ödəniş kartları ilə aparılan nağdsız əməliyyatların həcminin 5 dəfə artmasına münasibət bildirən iqtisadçı-ekspert Samir Əliyev “Bakı-Xəbər”ə açıqlamasında qeyd etdi ki, ödəniş kartları 2 yerə bölünür: Debet və kredit kartları: “Debet kartlarına təqaüd, əməkhaqqı və müavinətlər daxildir. Ötən il nağdsız əməliyyatlarla bağlı qəbul olunan qanundan sonra debet kartlarına daxil olanların sayı daha da artdı. Çünki əksər şirkətlər əməkhaqqını artıq kart hesabına otuzdurur.
Kredit kartları ilə bağlı vəziyyət fərqlidir. Devalvasiyaya qədər kredit kartlarında artım var idi. Ancaq devalvasiyadan sonra kredit kartlarının sayında azalma yaşandı. Bunun da bir səbəbi bankların bağlanmasıdır. Həmçinin, kredit şərtlərinin sərtləşdirilməsi kredit kartlarının sayına təsir etdi. Beləliklə, kredit kartlarının sayı təxminən 2 dəfəyə qədər azalıb”.
Həmsöhbətimizin sözlərinə görə, debet kartlarının artım prosesi davam edir.
Günel CƏLİLOVA
